Kalki 2898 AD team at Mannat: షారుక్ ఖాన్ ఇంటి ముందు కల్కి 2898 ఏడీ టీమ్ ప్రమోషన్లు.. వైరల్ అవుతున్న ఫొటో

Kalki 2898 AD team at Mannat: ప్రభాస్ నటిస్తున్న కల్కి 2898 ఏడీ మూవీ తమ ప్రమోషన్లను వినూత్నంగా చేస్తోంది. ఇందులో భాగంగా ఏకంగా బాలీవుడ్ నటుడు షారుక్ ఖాన్ ఇంటి ముందు ఈ మూవీలోని పాత్రలు కల్కి పోస్టర్ పట్టుకొని కనిపించాయి. ఇది చూసి అటుగా వెళ్తున్న అభిమానులు షాక్ తిన్నారు. వాటిని ఫొటోలు తీసి సోషల్ మీడియాలో పోస్ట్ చేశారు.

కల్కి 2898 ఏడీ మూవీ మే 9వ తేదీన రిలీజ్ చేస్తున్నట్లు మేకర్స్ అనౌన్స్ చేసిన శుక్రవారం (జనవరి 12) రోజే ఈ ఫొటోలు కూడా వైరల్ అయ్యాయి. షారుక్ ఇల్లు అయిన మన్నత్ ముందు కల్కి టీమ్ కనిపించింది. అచ్చూ సినిమాల్లోని పాత్రల్లాగే మాస్కులు ధరించిన ముగ్గురు వ్యక్తులు ఇలా తమ మూవీని ప్రమోట్ చేస్తుండటం విశేషం. వాళ్ల వెనుక గోడపై మన్నత్ అనే ఇంగ్లిష్ అక్షరాలు రాసి ఉన్నాయి.

ప్రభాస్‌కు కూడా షారుక్ కావాలా?

ఇవి ముంబైలోని షారుక్ ఖాన్ ఉండే ఇల్లు. ఈ ముగ్గురిలో మధ్యలో ఉన్న వ్యక్తి కల్కి పోస్టర్ పట్టుకొని కనిపించారు. ఇదే ఫొటోను చాలా మంది అభిమానులు సోషల్ మీడియాలో పోస్ట్ చేస్తూ కామెంట్స్ చేస్తున్నారు. అయితే కొందరు నెగటివ్ గానూ స్పందిస్తున్నారు. ప్రభాస్ ను షారుక్ కంటే పెద్ద స్టార్ అన్నారు.. మరి షారుక్ ఇంటి ముందు అతని సినిమా ప్రమోట్ చేస్తున్నారంటే.. ప్రభాస్ కు కూడా షారుక్ కావాలా అని ప్రశ్నిస్తున్నారు.

ఈ ఇద్దరు స్టార్లూ ఈ మధ్యే క్రిస్మస్ సమయంలో బాక్సాఫీస్ దగ్గర ఫైట్ చేసిన విషయం తెలిసిందే. షారుక్ డంకీ, ప్రభాస్ సలార్ సినిమాలు ఒక రోజు గ్యాప్ లో రిలీజయ్యాయి. హిందీ మార్కెట్ లో సలార్ కంటే డంకీ స్పష్టమైన ఆధిక్యం సాధించగా.. ప్రపంచవ్యాప్తంగా కలెక్షన్లు చూస్తే మాత్రం సలార్ పైచేయి కనిపించింది. ఈ నేపథ్యంలో షారుక్, ప్రభాస్ ఫ్యాన్స్ మధ్య సోషల్ మీడియా యుద్ధం కూడా నడించింది.

ఇలాంటి పరిస్థితుల్లో ప్రభాస్ నెక్ట్స్ మూవీ కల్కి 2898 ఏడీ ప్రమోషన్ ను షారుక్ ఇంటి ముందు చేస్తుండటం చాలా మందిని ఆశ్చర్యానికి గురి చేసింది. కల్కి ఓ సైంటిఫిక్ థ్రిల్లర్ మూవీగా రానుంది. దీనికి మన హిందూ పురాణాలను జోడించి డైరెక్టర్ నాగ్ అశ్విన్ తీసుకురానున్నాడు. ఏకంగా రూ.600 కోట్ల భారీ బడ్జెట్ తో ఈ సినిమా తెరకెక్కుతోంది.

వైజయంతీ మూవీస్ కు బాగా కలిసి వచ్చిన మే 9వ తేదీన కల్కి 2898 ఏడీని రిలీజ్ చేస్తున్నట్లు శుక్రవారమే మేకర్స్ ప్రకటించారు. ఈ మూవీ గ్రాఫిక్స్ వర్క్ శరవేగంగా జరుగుతోంది. మరో రెండున్నర నెలల్లో మూవీ ట్రైలర్ తీసుకురావడానికి ఏర్పాట్లు చేస్తున్నారు. పాన్ ఇండియా లెవల్లో రానున్న ఈ సినిమాలో దీపికా పదుకోన్, కమల్ హాసన్, అమితాబ్ బచ్చన్ కూడా నటిస్తున్నారు.