Kajol: సోషల్ మీడియా నుంచి బ్రేక్ తీసుకున్న బాలీవుడ్ సీనియర్ హీరోయిన్.. “కఠినమైన పరీక్షలు ఎదుర్కొంటున్నా”

Kajol - Social Media: బాలీవుడ్ సీనియర్ హీరోయిన్ కాజోల్ అనూహ్య నిర్ణయం తీసుకున్నారు. సోషల్ మీడియాలో ఎప్పుడూ యాక్టివ్‍గా ఉంటూ ఫొటోలు, వీడియోలను షేర్ చేసే ఆమె అభిమానులకు బ్యాడ్ న్యూస్ చెప్పారు. సోషల్ మీడియా నుంచి బ్రేక్ తీసుకుంటున్నానని ప్రకటించారు. ఈ మేరకు ఇన్‍స్టాగ్రామ్, ట్విటర్‌లో పోస్ట్ చేశారు.

సోషల్ మీడియా నుంచి విరామం తీసుకుంటున్నానని కాజోల్ తెలిపారు. దీంతో పాటు ఓ వాక్యాన్ని కూడా పోస్ట్ చేశారు. “జీవితంలో కఠినమైన పరీక్షలను ఎదుర్కొంటున్నా” అని వెల్లడించారు. అయితే, ఆ కష్టాలు, సవాళ్లు ఏంటో కాజోల్ వివరాలు పేర్కొనలేదు. ఒక వ్యాక్యాన్ని మాత్రమే పోస్ట్ చేశారు. కాగా, ఇన్‍స్టాగ్రామ్‍లో ఇది వరకు పోస్ట్ చేసిన ఫొటోలను, వీడియోలను కూడా కాజోల్ డిలీట్ చేశారు. ప్రస్తుతం ఇన్‍స్టాగ్రామ్ లో ఆమెకు 1.45కోట్ల మందికిపైగా ఫాలోవర్లు ఉన్నారు.

సోషల్ మీడియా నుంచి కాజోల్ బ్రేక్ తీసుకోవటంపై నెటిజన్లు రకరకాలుగా స్పందిస్తున్నారు. “మీరు క్షేమంగానే ఉన్నారని ఆశిస్తున్నాం. టైమ్ తీసుకోండి క్వీన్” అని ఓ యూజర్ కామెంట్ చేశారు. “ఎలాంటి పరిస్థితుల్లోనైనా మా ప్రేమ మీతోనే ఉంటుంది” అని మరో ఫ్యాన్స్ రాసుకొచ్చారు. ఇక భర్త అజయ్ దేవ్‍గన్‍తో కాజోల్‍కు ఏమైనా గొడవ అయిందా అని ఓ యూజర్ కామెంట్ చేశారు. రానున్న ప్రాజెక్టు కోసం ప్రమోషన్‍లలో భాగంగానే కాజోల్ ఇలా చేశారని కొందరు యూజర్లు అనుమానాలు వ్యక్తం చేశారు.

ఇంటర్నేషనల్‍గా సూపర్ హిట్ అయిన గుడ్‍వైఫ్ సిరీస్ ఆధారంగా రూపొందించిన సలామ్ వెంకీలో చివరిసారిగా కాజోల్ కనిపించారు. నెట్‍ఫ్లిక్స్ ఓటీటీ ప్లాట్‍ఫామ్‍లోకి రానున్న లస్ట్ స్టోరీస్ 2లో కూడా కాజోల్ నటించారు. ఈ సిరీస్ జూన్ 29న స్ట్రీమ్ కానుంది. తమన్నా భాటియా, నైనా గుప్తా, విజయ్ వర్మ ఈ సిరీస్‍లో ప్రధాన పాత్రల్లో నటించారు.

కాగా, తాను నటించిన దుష్మన్ సినిమాకు 25 సంవత్సరాలు పూర్తయిన సందర్భంగా ఇటీవలే కాజోల్ సెలెబ్రేట్ చేసుకున్నారు. కాజోల్ డబుల్ రోల్ చేసిన ఆ మూవీ అప్పట్లో సూపర్ హిట్ అయింది. ఆ మూవీని కాజోల్ గుర్తు చేసుకుంటూ సోషల్ మీడియాలో సంతోషాన్ని వ్యక్తం చేశారు.