Diwali Release Movies: టాలీవుడ్‌కు క‌లిసొచ్చిన దీపావళి - మూడు సినిమాల‌కు పాజిటివ్ టాక్ - క‌లెక్ష‌న్స్‌లో టాప్ ఏదంటే?
Diwali Release Movies: దీపావ‌ళికి రిలీజైన క, ల‌క్కీ భాస్క‌ర్‌తో పాటు అమరన్ సినిమాల‌తో టాలీవుడ్ బాక్సాఫీస్ క‌ళ‌క‌ళ‌లాడుతోంది. డిఫ‌రెంట్ కాన్సెప్ట్‌ల‌తో రూపొందిన ఈ మూడు సినిమాలు పాజిటివ్ టాక్‌ను సొంతం చేసుకున్నాయి. తొలిరోజు అదిరిపోయే వ‌సూళ్ల‌ను రాబ‌ట్టాయి.
Diwali Release Movies: ఈ దీపావళి టాలీవుడ్‌కు బాగా క‌లిసొచ్చింది. పండుగ‌కు ప్రేక్ష‌కుల ముందుకొచ్చిన స్ట్రెయిట్ సినిమాలు ల‌క్కీ భాస్కర్, క‌తో పాటు డ‌బ్బింగ్ మూవీ అమరన్ పాజిటివ్ టాక్‌ను సొంతం చేసుకున్నాయి.
మూడు సినిమాలు హౌజ్‌ఫుల్ క‌లెక్ష‌న్స్‌తో దూసుకుపోతున్నాయి. క‌ల్కి, దేవ‌ర త‌ర్వాత స‌రైన హిట్టు లేక వెల‌వెల‌బోయిన బాక్సాఫీస్ వ‌ద్ద ఈ మూడు సినిమాలు మ‌ళ్లీ జోష్‌ను తీసుకొచ్చాయి. పండుగ‌కు రిలీజైన అన్ని సినిమాలు హిట్ కావ‌డం టాలీవుడ్‌లో చాలా అరుదు. అలాంటి అరుదైన రికార్డుకు ఈ దీపావళి వేదిక‌గా మారింది.
రికార్డ్ కలెక్షన్స్...
క, ల‌క్కీ భాస్క‌ర్‌తో పాటు అమరన్ సినిమాలు డిఫ‌రెంట్ కాన్సెప్ట్‌ల‌తోనే తెర‌కెక్కాయి. కాన్సెప్ట్‌ల‌లో కొత్త‌ద‌నం ఉండ‌టం, నాయ‌కానాయిక‌ల యాక్టింగ్ బాగుండ‌టం ఈ సినిమాల‌కు ప్ల‌స్ పాయింట్‌గా మారింది. బాక్సాఫీస్ ప‌రంగా క, ల‌క్కీ భాస్క‌ర్‌తో పాటు అమరన్ తొలిరోజు రికార్డ్ కలెక్షన్స్ రాబ‌ట్టాయి.
కిర‌ణ్ అబ్బ‌వ‌రం కెరీర్‌లో హయ్యెస్ట్...
క మూవీ కిర‌ణ్ అబ్బ‌వ‌రం కెరీర్‌లోనే హయ్యెస్ట్ కలెక్షన్స్ సాధించింది. తొలిరోజే 5.75 కోట్ల గ్రాస్‌ను...3.20 కోట్ల షేర్ కలెక్షన్స్ ద‌క్కించుకున్న‌ది. ఈ మూవీలో వాసుదేవ్ అనే పోస్ట్‌మెన్‌గా కిర‌ణ్ అబ్బ‌వ‌రం అద‌ర‌గొట్టాడ‌నే కామెంట్స్ వినిపిస్తోన్నాయి. కృష్ణ‌గిరి అనే ఊళ్లో వ‌రుస‌గా అమ్మాయిలు మిస్స‌వుతుంటారు. ఆ మిస్సింగ్ వెన‌కున్న సీక్రెట్‌ను వాసుదేవ్ ఎలా ఛేదించాడ‌నే పాయింట్‌తో ద‌ర్శ‌క‌ద్వ‌యం సుజీత్‌, సందీప్ మిస్టిక్ థ్రిల్ల‌ర్ గా ఈ మూవీని తెర‌కెక్కించారు.
కాన్సెప్ట్‌, క్లైమాక్స్ ఎపిసోడ్‌తో పాటు హీరో క్యారెక్ట‌రైజేష‌న్‌కు సంబంధించి వ‌చ్చే ట్విస్ట్‌లు ఆడియెన్స్‌ను మెప్పిస్తోన్నాయి. చాలా రోజుల త‌ర్వాత ఈ మూవీతో క‌మ‌ర్షియ‌ల్ హిట్‌ను త‌న ఖాతాలో వేసుకున్నాడు కిర‌ణ్ అబ్బ‌వ‌రం. ఈ సినిమాలో న‌య‌న్ సారిక, త‌న్వీరామ్ హీరోయిన్లుగా న‌టించారు.
తొలిరోజే స‌గం రిక‌వ‌రీ...
శివ‌కార్తికేయ‌న్‌, సాయిప‌ల్ల‌వి జంట‌గా న‌టించిన త‌మిళ్ డ‌బ్బింగ్ మూవీ అమరన్ తెలుగులో తొలిరోజు అద‌ర‌గొట్టింది. గురువారం రోజు తెలుగు వెర్ష‌న్ 4.50 కోట్ల గ్రాస్‌ను..2.80 కోట్ల షేర్ క‌లెక్ష‌న్స్‌ను రాబ‌ట్టింది. తెలుగులో ఐదు కోట్ల బ్రేక్ ఈవెన్ టార్గెట్‌తో ఈ మూవీ రిలీజైంది. తొలిరోజు స‌గం రిక‌వ‌రీ సాధించింది. వ‌ర‌ల్డ్ వైడ్‌గా ఫ‌స్ట్ డే అమరన్ మూవీ అన్ని భాష‌ల్లో క‌లిపి 35 కోట్ల కలెక్షన్స్ ద‌క్కించుకున్న‌ది.
ఆర్మీ ఉద్యోగుల జీవితాల‌తో...
ఆర్మీ మేజ‌ర్ ముకుంద్ వ‌ర‌ద‌రాజ‌న్ జీవితం ఆధారంగా తెర‌కెక్కిన ఈ మూవీని క‌మ‌ల్‌హాస‌న్ ప్రొడ్యూస్ చేశారు. వృత్తికి, కుటుంబ బాధ్య‌త‌ల‌కు నిర్వ‌ర్తించే క్ర‌మంలో ఆర్మీ ఉద్యోగులు ఎదుర్కొనే సంఘ‌ర్ష‌ణ తో పాటు ఉగ్ర‌వాదుల ఏరివేత‌కు సంబంధించి ఆర్మీ అధికారులు చేప‌ట్టిన సీక్రెట్ ఆప‌రేష‌న్స్ నేప‌థ్యంలో ద‌ర్శ‌కుడు రాజ్‌కుమార్ పెరియాసామి అమరన్ మూవీని తెర‌కెక్కించారు.
ల‌క్కీ భాస్కర్ కలెక్షన్స్...
దుల్క‌ర్ స‌ల్మాన్ హీరోగా న‌టించిన ల‌క్కీ భాస్కర్ తెలుగుతో పాటు త‌మిళం, మ‌ల‌యాళ భాష‌ల్లో హిట్టు టాక్‌ను తెచ్చుకున్న‌ది. బ్యాంకు స్కామ్ నేప‌థ్యంలో పీరియాడిక‌ల్ థ్రిల్ల‌ర్‌గా తెర‌కెక్కిన ఈ మూవీలో దుల్క‌ర్ స‌ల్మాన్ న‌ట‌న అద్భుత‌మంటూ ఆడియెన్స్ ప్ర‌శంస‌లు కురిపిస్తోన్నారు.
ఓ సామాన్యుడు వంద‌ల కోట్ల స్కామ్ ఎలా చేశాడు? ఈ క్ర‌మంలో అత‌డు ఎదుర్కొన్న ఆటుపోట్ల చుట్టూ ద‌ర్శ‌కుడు వెంకీ అట్లూరి ఈ మూవీని రూపొందించాడు. ల‌క్కీ భాస్కర్ మూవీ ల‌క్కీ భాస్కర్ మూవీ తొలిరోజు ఏడున్న‌ర కోట్ల వ‌ర‌కు కలెక్షన్స్ ద‌క్కించుకున్న‌ది. ఈ మూవీలో మీనాక్షి చౌద‌రి హీరోయిన్‌గా న‌టించింది.
