Dhanush: నేనే వ‌స్తున్నా సెకండ్ సింగిల్ రిలీజ్‌- డ్యూయ‌ల్ రోల్ లో ధ‌నుష్‌

Dhanush: త‌మిళంలో ధ‌నుష్‌, సెల్వ‌రాఘ‌వ‌న్ ల‌ది సూప‌ర్ హిట్ కాంబినేష‌న్‌గా చెబుతుంటారు. ఈ సోద‌రుల క‌ల‌యిక‌లో వ‌చ్చిన కాద‌ల్ కొండెన్‌, పుదుపెట్టై, మ‌యాక్కం ఎన్న సినిమాలు పెద్ద విజ‌యాల్ని సాధించాయి. వీరిద్ద‌రి క‌ల‌యిక‌లో వ‌స్తున్న నాలుగో చిత్రం నానే వ‌రువ‌న్.

ఈ సినిమాను నేనే వ‌స్తున్నా పేరుతో తెలుగులో గీతా ఆర్ట్స్ రిలీజ్ చేస్తోంది. సెప్టెంబ‌ర్ 29న ఈ సినిమా రిలీజ్ కానుంది. కాగా నేనే వ‌స్తున్నా సినిమాలోని సెకండ్ సింగిల్ ను ఆదివారం రిలీజ్ చేశారు. ఒకే ఒక ఊరిలోనా రాజులేమో ఇద్ద‌రంటా అంటూ సాగిన ఈ పాట‌ను చంద్ర‌బోస్ రాశారు. నేనే వ‌స్తున్నా సినిమాలో ధ‌నుష్ డ్యూయ‌ల్ రోల్ చేస్తున్నాడు. ఇద్ద‌రి వ్య‌క్తిత్వాల‌ను ఈ పాట‌లో చూపించారు. యువ‌న్ శంక‌ర్ రాజా సంగీతాన్ని అందించారు.

ఎస్‌.పి అభిషేక్ దీప‌క్ బ‌బ్లూ ఆల‌పించారు. యాక్ష‌న్ ఎంట‌ర్‌టైన‌ర్‌గా రూపొందిన ఈ సినిమాలో నెగెటివ్‌, పాజిటివ్ రెండు షేడ్స్ క‌లిగిన పాత్ర‌లో ధ‌నుష్ క‌నిపించ‌బోతున్న‌ట్లు స‌మాచారం. ఎల్లి అవ్రామ్‌, ఇందుజా ర‌విచంద్ర‌న్ ప్ర‌ధాన పాత్ర‌ల‌ను పోషిస్తున్నారు. త‌మిళంతో పాటు తెలుగులో ఒకేరోజున ఈ సినిమా రిలీజ్ కానుంది.