Dhanush Nene Vastunna Teaser: నేనే వస్తున్నా టీజర్ వచ్చేసింది.. మాటల్లేకుండా కేవలం యాక్షన్‌తోనే అదరగొట్టిన ధనుష్

Dhanush Nene Vastunna Teaser Released: కోలీవుడ్ హీరో ధనుష్ ఇటీవల తిరు చిత్రంతో సూపర్ హిట్‌ను తన ఖాతాలో వేసుకున్నాడు. ఈ సినిమా వంద కోట్లకు పైచిలుకు వసూళ్లతో అదరగొట్టింది. ప్రస్తుతం వరుస పెట్టి సినిమాలు చేస్తున్న ఈ హీరో అప్పుడే మరో చిత్రాన్ని ప్రేక్షకుల ముందుకు తీసుకొచ్చేందుకు సిద్ధమయ్యాడు. అదే నానే వరువాన్(Naane Varubean).. తెలుగులో ఈ సినిమాను నేనే వస్తున్నా అనే పేరుతో విడుదల చేయనున్నారు. తాజాగా చిత్రబృందం ఈ సినిమాకు సంబంధించిన టీజర్‌ను రిలీజ్ చేసింది.

మాటలేవి లేకుండా విడుదల చేసిన నేనే వస్తున్న టీజర్ ఆకట్టుకుంటోంది. కేవలం యాక్షన్ సన్నివేశాలతోనే నింపిన ఈ టీజర్ సినిమాపై ఆసక్తిని రేకెత్తిస్తుంది. ఆద్యంతం ఉత్కంఠగా సాగే ఈ టీజర్‌లో ధనుష్ తనదైన పర్ఫార్మెన్స్‌తో అదరగొట్టాడు. సంభాషణలు లేకపోయినా.. కేవలం యాక్టింగ్‌తో ప్రేక్షకులను కట్టిపడేయగనని మరోసారి నిరూపించాడు.

ఈ టీజర్‌ను చూస్తుంటే అడవి నేపథ్యంలో రూపొందిన యాక్షన్ థ్రిల్లర్ అని తెలుస్తోంది. ధనుష్ విభిన్న లుక్స్‌లో కనిపించాడు. ద్విపాత్రాభినయం చేస్తున్నట్లు తెలుస్తోంది. ఒకటి యంగ్ మ్యాన్ లుక్‌లో కాగా.. మరో పాత్రలో మిడిల్ ఏజ్ పర్సన్‌గా కనిపించాడు. రెండింటిలో తన యాక్టింగ్‌తో ఆకట్టుకున్నాడు ధనుష్.

నేనే వస్తున్నా సినిమాకు ధనుష్ సోదరుడు సెల్వ రాఘవన్ దర్శకత్వం వహించారు. ఇందులో యోగిబాబు, ఇందుజా రవిచంద్రన్, ఎల్లీ అవ్రామ్, సెల్వరాఘవన్ తదితరులు కీలక పాత్రలు పోషించారు. ఈ నెలలోనే ఈ చిత్రాన్ని ప్రేక్షకుల ముందుకు తీసుకురానున్నారు. తెలుగు రాష్ట్రాల్లో ప్రముఖ నిర్మాత అల్లు అరవింద్ విడుదల చేయనున్నారు. వీ క్రియేషన్స్ పతాకంపై కలైపులి ఎస్ థాను ఈ చిత్రాన్ని నిర్మించారు. యువన్ శంకర్ రాజా సంగీతాన్ని సమకూర్చారు. ఈ నెలలోనే ఈ సినిమాను ప్రపంచ వ్యాప్తంగా ప్రేక్షకుల ముందుకు తీసుకురావాలని మేకర్స్ నిర్ణయించారు.