Brahmamudi Serial: బ్రహ్మముడి సీరియల్ టైమ్ మారిపోతోంది.. షాక్‌లో అభిమానులు.. స్టార్ మాలోకి సరికొత్త సీరియల్

Brahmamudi Serial: బ్రహ్మముడి సీరియల్ టైమింగ్ వచ్చే వారం నుంచి మారిపోతుందని తెలిసి ఫ్యాన్స్ షాకవుతున్నారు. ఈ మధ్యే కొత్త సీరియల్ అనౌన్స్ చేసిన స్టార్ మా.. ఆ సీరియల్ ను ఈ బ్రహ్మముడి సమయంలో టెలికాస్ట్ చేయనున్నట్లు వెల్లడించింది. ఈ ట్విస్ట్ ఎవరికీ అంతుబట్టడం లేదు. ఎందుకంటే చాలా నెలలుగా బ్రహ్మముడి టీఆర్పీల్లో టాప్ లో ఉంటోంది.

బ్రహ్మముడి టైమ్ చేంజ్

బ్రహ్మముడి సీరియల్ స్టార్ మాలో సోమవారం నుంచి శనివారం వరకు రాత్రి 7.30 గంటలకు టెలికాస్ట్ అవుతోంది. ప్రైమ్ టైమ్ కావడం, ఈ సీరియల్ స్టోరీలైన్ నచ్చడంతో ప్రేక్షకులు ఎంతగానో ఆదరిస్తున్నారు. ఎన్నో నెలలుగా తెలుగు టీవీ సీరియల్స్ టీఆర్పీ రేటింగ్స్ లో నంబర్ వన్ గా కొనసాగుతోంది. అలాంటి సీరియల్ టైమ్ ను ఇప్పుడు స్టార్ మా ఓ కొత్త సీరియల్ కోసం మారుస్తుండటం అభిమానులకు మింగుడు పడటం లేదు.

టాప్ సీరియల్ ను ఓ కొత్త సీరియల్ కోసం తప్పించడం ఏంటి? బ్రహ్మముడి అయిపోతోందా? మరి బ్రహ్మముడి ఎప్పుడొస్తుంది? స్టార్ మాలో ఈ పాలిటిక్స్ ఎందుకు?.. ఇలా అభిమానులు రకరకాల ప్రశ్నలు సంధిస్తున్నారు. పైగా కొత్త సీరియల్ ప్రోమో, నటీనటులను చూస్తుంటే కొత్తగా ఏమీ అనిపించడం లేదని కూడా కొందరు అంటున్నారు. మరి దీనిపై స్టార్ మా ఎలా స్పందిస్తుందో చూడాలి.

స్టార్ మాలో కొత్త సీరియల్

స్టార్ మాలో కొత్తగా ఇల్లు ఇల్లాలు పిల్లలు సీరియల్ వస్తోంది. వచ్చే మంగళవారం (నవంబర్ 12) నుంచి ఈ సీరియల్ ప్రారంభం కానుంది. సోమవారం నుంచి శనివారం వరకు ప్రతి రోజూ రాత్రి 7.30 గంటలకు టెలికాస్ట్ కానుంది.

ఇంతకుముందే సీరియల్ ప్రారంభం తేదీని వెల్లడించిన స్టార్ మా.. తాజాగా టైమ్ కూడా రివీల్ చేస్తూ ఓ ప్రోమోను రిలీజ్ చేసింది. అంటే సరిగ్గా బ్రహ్మముడి వచ్చే సమయంలోనే ఈ ఇల్లు ఇల్లాలు పిల్లలు రాబోతోంది. స్టార్ మా సడెన్ గా తీసుకున్న ఈ నిర్ణయంతో బ్రహ్మముడి విషయంలో ప్రశ్నలు తలెత్తుతున్నాయి.

ఇల్లు ఇల్లాలు పిల్లలు సీరియల్ గురించి..

ఇల్లు ఇల్లాలు పిల్ల‌లు సీరియ‌ల్‌లో టీవీల్లో సీనియర్ నటుడు ప్ర‌భాక‌ర్‌తో పాటు సీనియ‌ర్ హీరోయిన్ ఆమ‌ని ఓ కీల‌క పాత్ర‌లో క‌నిపించ‌బోతోంది. ఈ సీరియ‌ల్‌లో రామ‌రాజు గా ప్ర‌భాక‌ర్‌, వేద‌వ‌తి పాత్ర‌లో ఆమ‌ని నటిస్తున్నారు. ముగ్గురు కొడుకుల‌కు తండ్రిగా ప్ర‌భాక‌ర్ ఈ సీరియ‌ల్‌లో క‌నిపించ‌నుండటం విశేషం. ఈ సీరియ‌ల్‌లో నితిన్‌, ప్ర‌శాంత్ కీల‌క పాత్ర‌లు పోషిస్తున్నారు.

ఇంట్లో రామ‌రాజు మాటే శాస‌నం. అత‌డి మాట‌కు భార్య‌తో పాటు కొడుకులు ఎదురుచెప్ప‌రు. ప్రేమ వ్య‌వ‌హ‌రాల‌కు త‌న కొడుకులు ఆమ‌డ దూరం ఉంటార‌ని రామ‌రాజు గొప్ప‌లు చెబుతుంటాడు. తాను చెప్పిన అమ్మాయిల మెడ‌లోనేమూడుముళ్లు వేస్తార‌ని రామ‌రాజు అనుకుంటాడు.

కానీ రామ‌రాజు కొడుకులు మాత్రం తండ్రి ముందు సిన్సియ‌ర్‌గా న‌టిస్తుంటారు. ప్రేమ‌లో మునిగితేలుతుంటారు. తండ్రికి ప్రేమ‌పెళ్లిళ్లు ఇష్టం లేక‌పోవ‌డంతో...త‌మ ల‌వ్‌స్టోరీస్‌ను అరెంజ్‌డ్ మ్యారేజీలుగా మార్చే ప్ర‌య‌త్నాల్లో ఉంటారు. ముగ్గురు త‌న‌యుల నాట‌కాల‌ను రామ‌రాజు ఎలా తెలుసుకున్నాడు? భార్య పుట్టింటితో రామ‌రాజుకు ఉన్న గొడ‌వ‌లు ఏమిట‌నే అంశాల‌తో ఈ సీరియ‌ల్ సాగ‌నున్న‌ట్లు స‌మాచారం.

త‌మిళంలో విజ‌య‌వంత‌మైన పాండియ‌న్ స్టోర్స్ 2 సీరియ‌ల్‌కు రీమేక్‌గా ఇల్లు ఇల్లాలు పిల్ల‌లు తెర‌కెక్కుతోంది. పాండియ‌న్ స్టోర్స్ 2 సీరియ‌ల్ స్టార్ విజ‌య్‌లో టెలికాస్ట్ అవుతోంది. త‌మిళ సీరియ‌ల్స్‌లో టీఆర్‌పీ ప‌రంగా టాప్‌లో ఉంది.