Pallavi Prashanth: బిగ్ బాస్ పల్లవి ప్రశాంత్ హీరోగా సినిమా ఆఫర్స్.. మ్యాటర్ లీక్ చేసిన సింగర్
Bigg Boss Pallavi Prashanth Film Offers: బిగ్ బాస్ 7 తెలుగు విన్నర్ పల్లవి ప్రశాంత్‌కు సినిమా ఆఫర్లు వస్తున్నాయంటూ సింగర్, కంటెస్టెంట్ భోలే షావలి తాజాగా ఓ ఇంటర్వ్యూలో చెప్పుకొచ్చాడు. పల్లవి ప్రశాంత్ సినిమాల్లో హీరోగా చేస్తున్నాడని మ్యాటర్ లీక్ చేశాడు.
Pallavi Prashanth As Hero In Movies: బిగ్ బాస్ 7 తెలుగు సీజన్‌లోకి రైతుబిడ్డగా, కామన్ మ్యాన్‌గా అడుగుపెట్టాడు పల్లవి ప్రశాంత్. కట్ చేస్తే బిగ్ బాస్ తెలుగు సీజన్‌ 7కు విన్నర్‌గా నిలిచిన ప్రశాంత్ తెలుగు ప్రేక్షకుల మన్ననలు పొందాడు. హౌజ్‌లో హీరో శివాజీ సహాయంతో తన ఆటతీరును మార్చుకుని ఫైనల్‌గా విజేతగా నిలిచాడు. అయితే, గ్రాండ్ ఫినాలే అనంతరం ప్రశాంత్ శాంతి భద్రతల ఉల్లంఘన కారణంగా అరెస్ట్ కావాల్సి వచ్చింది.
పోలీసులు హెచ్చరించిన కూడా శాంతి భద్రతలకు విఘాతం కల్పించేలా ప్రశాంత్ చేయడంతో అతనిపై కేసు నమోదు చేసి రిమాండ్‌కు పంపించిన విషయం తెలిసిందే. ఇటీవలే బెయిల్ మీద బయటకు వచ్చిన ప్రశాంత్ తన బిగ్ బాస్ ఫ్రెండ్స్‌ను కలిసి పార్టీ చేసుకున్నాడు. ఈ నేపథ్యంలో బిగ్ బాస్ హౌజ్‌లో రైతుబిడ్డ ప్రశాంత్‌కు సన్నిహితంగా ఉన్న పాటబిడ్డ, సింగర్ భోలే షావలి ఓ ఇంటర్వ్యూలో ఆసక్తికర విషయాలు బయటపెట్టాడు.
"పల్లవి ప్రశాంత్‌కు చాలా సినిమా ఆఫర్లు వచ్చాయి. హౌజ్ నుంచి బయటకు రాకముందే అతనికి చాలా సినిమాల్లో అవకాశాలు రావడం సంతోషంగా అనిపించింది. మా కాంబోలో అంటే రైతుబిడ్డ హీరోగా పాటబిడ్డ మ్యూజిక్ కంపోజర్‌గా వస్తే సినిమాలు చేస్తామంటూ చాలా మంది నన్ను అప్రోచ్ అయ్యారు. విన్నర్‌గా బయటకు రాగానే ఈ గుడ్ న్యూస్ అతనికి చెప్పాలనుకుంటే అరెస్ట్ అయి లోపలికి వెళ్లడం, ఇదంతా జరిగింది" అని సింగర్ భోలే తెలిపాడు.
"రైతుబిడ్డ పల్లవి ప్రశాంత్‌కు ఇప్పటికైనా సినిమాల్లో అవకాశాలు వస్తాయి. కానీ, అతడు నటిస్తాడా లేదా అన్నది ప్రశాంత్‌తో ఇంకా చర్చించలేదు. అవకాశాలు మాత్రం బాగానే వస్తున్నాయి. అతడు ఇష్టపడితే సినిమాల్లో చూడటానికి కూడా ఎక్కువ కాలం పట్టదు" అని సింగర్ భోలే ఓ ఇంటర్వ్యూలో అసలు మ్యాటర్ లీక్ చేశాడు.
