Bigg Boss 7 Telugu: “ఈ తింగరి సమాధానాలే వద్దు”: శోభా శెట్టిపై అర్జున్, రతిక పైర్: వీడియో

Bigg Boss 7 Telugu Day 71 Promo: బిగ్‍బాస్ తెలుగు 7వ సీజన్ 11వ వారం షురూ అయింది. 10వ వారం భోలే షావలి ఎలిమినేట్ అయ్యారు. దీంతో 11వ వారం నామినేషన్ల ప్రక్రియ సోమవారం నేటి (నవంబర్ 13) ఎపిసోడ్‍లో జరగనుంది. ప్రతీసారిలాగే నామినేషన్లలో ఈసారి కూడా మాటల యుద్ధాలు జరిగాయి. ఇందుకు సంబంధించిన ప్రోమో వచ్చింది. గత వారం కెప్టెన్‍గా వ్యవహరించిన శోభా శెట్టిపై రతిక, అంబటి అర్జున్ ఫైర్ అయ్యారు. పల్లవి ప్రశాంత్, అర్జున్ మధ్య కూడా వాదన హాట్‍గా సాగింది. ప్రోమోలో ఏముందంటే..

నామినేషన్లలో నాన్చకుండా మాట్లాడాలని రతికకు శివాజీ చెప్పారు. టాలెంట్ చూపాలని, అవతలివారు తనను ప్రశ్నించే పరిస్థితి రాకుండా చూసుకో అంటూ రతికకు శివాజీ కోచింగ్ ఇచ్చారు. ఇక్కడి నుంచి మొదలుపెడితే గేమ్ ఆఖరి రోజు వరకు కూడా అపకు అని రతికకు ఉపదేశించారు. ఆ తర్వాత నామినేషన్ల ప్రక్రియ షురూ అయింది.

నామినేట్ చేసే వారు కారణాలు చెప్పాక.. నామినేట్ అయిన వారి తలపై బాటిల్ పగులగొట్టాలని కంటెస్టెంట్‍లకు బిగ్‍బాస్ చెప్పారు. ముందుగా శోభా శెట్టిని రతిక నామినేట్ చేశారు. “కెప్టెన్ అయ్యాక 100 శాతం ఇచ్చావని నువ్వు ఎంత వరకు అనుకుంటున్నావ్” అని శోభను రతిక ప్రశ్నించారు. అయితే, తాను 200 శాతం బాగా చేశానని శోభ సమర్థించుకున్నారు. “అంకెల్లో చెప్పడం కాదు.. అసలు ఏం చేశావో అది చెప్పు” అని రతిక అన్నారు. కెప్టెన్ అంటే బ్యాడ్జ్ పెట్టుకోవడం మాత్రమే కాదు అని రతిక గట్టిగా అరిచారు.

ఆ తర్వాత శోభా శెట్టిని అంబటి అర్జున్ నామినేట్ చేసి.. ప్రశ్నలు వేశారు. కెప్టెన్‌గా ఉన్నప్పుడు హౌస్‍లో పనులు చేయలేదని వారించారు. “నువ్వు కిచెన్‍లో ఉన్నావా” అని అర్జున్ గట్టిగా అడిగారు. లేనా అని శోభ తిరిగి ప్రశ్నించారు. “నువ్వుసలు వీఐపీ రూమ్ దాటి బయటికి వచ్చావా అసలు” అని అర్జున్ కౌంటర్ వేశారు. దీంతో.. “పొద్దున్నే లేచి బ్రేక్ ఫాస్ట్ చేసి.. లంచ్ చేసి అక్కడే పడుకున్నాను” అని వెటకారంగా సమాధానం చెప్పారు శోభ. దీంతో చిరాకు పడిన అర్జున్.. “ఈ తింగరి సమాధానాలే వద్దు” అని అన్నారు. శోభకు సపోర్టుగా అమర్ వచ్చారు.

రతిక టీచర్ కాదని, ఆమె అడిగిన ప్రతీ ప్రశ్నకు సమాధానం చెప్పాలా అని ప్రియాంక చిరాకు పడ్డారు. దీంతో తన పాయింట్‍కు సమాధానం చెప్పాలని రతిక గట్టిగా వాదించారు. ప్రియాంకను రతిక నామినేట్ చేశారు.

“సొంతంగా ఎప్పుడైనా ఎవరినైనా నువ్వు నామినేషన్ వేశావా” అని పల్లవి ప్రశాంత్‍తో అర్జున్ వాదించారు. శివాజీ చెబితేనే ప్రశాంత్ నామినేట్ చేస్తున్నారనేలా అర్జున్ మాట్లాడారు. “గేమ్స్ ఎలా ఆడాలో నీకు శివాజీ చెబుతున్నారా” అని అర్జున్ అన్నారు. “నువ్వు ఓడిపోయావ్” అని అర్జున్.. అంటే ఓడిపోలే అని ప్రశాంత్ అరిచారు. ఈవారం ఎవరెవరూ నామినేట్ అయ్యారన్నది నేటి ఎపిసోడ్‍లో తెలియనుంది.