OTT Malayalam Movie: ఓటీటీలోకి వచ్చేస్తున్న టొవినో థామస్ లేటెస్ట్ మలయాళం బ్లాక్‌బస్టర్ మూవీ

OTT Malayalam Movie: మలయాళం ఇండస్ట్రీ నుంచి ఈ ఏడాది వచ్చిన బ్లాక్ బస్టర్ మూవీ ఏఆర్ఎం. దీని పూర్తి పేరు అజయంతే రందమ్ మోషనం. అంటే తెలుగులో అజయన్ చేసిన రెండో దోపిడీ అని అర్థం. టొవినో థామస్ నటించిన ఈ సినిమా సుమారు రెండు నెలల తర్వాత ఓటీటీలోకి అడుగుపెడుతోంది. వచ్చే వారమే ఈ మూవీ డిజిటల్ ప్రీమియర్ కానుంది.

ఏఆర్ఎం ఓటీటీ రిలీజ్ డేట్

మలయాళ స్టార్ హీరో టొవినో థామస్ నటించిన ఏఆర్ఎం మూవీ సెప్టెంబర్ 12న థియేటర్లలో రిలీజైంది. రూ.30 కోట్ల బడ్జెట్ తో తెరకెక్కించిన ఈ సినిమా బాక్సాఫీస్ దగ్గర రూ.100 కోట్లకుపైగా వసూలు చేసింది. ఇప్పుడీ సినిమా నవంబర్ 8 నుంచి డిస్నీ ప్లస్ హాట్‌స్టార్ ఓటీటీలో స్ట్రీమింగ్ కానుంది.

"మూడు తరాలు.. ఒక హీరో. ఈ నవంబర్ 8న ఏఆర్ఎం డిస్నీ ప్లస్ హాట్‌స్టార్ లోకి వస్తోంది. అల్టిమేట్ మలయాళం అడ్వెంచర్ చూడటానికి సిద్ధంగా ఉండండి" అనే క్యాప్షన్ తో డిస్నీ ప్లస్ హాట్‌స్టార్ మలయాళం ఎక్స్ అకౌంట్ వెల్లడించింది.

ఏఆర్ఎం మూవీ గురించి..

అజయంతే రందమ్ మోషనం సినిమానే సింపుల్ గా ఏఆర్ఎం పేరుతో థియేటర్లలో రిలీజ్ చేశారు. జితిన్ లాల్ డైరెక్ట్ చేసిన ఈ సినిమాను మ్యాజిక్ ఫ్రేమ్స్, యూజీఎం ఎంటర్టైన్మెంట్ సంయుక్తంగా నిర్మించాయి. ఇందులో టొవినో థామస్ తోపాటు కృతి శెట్టి, సురభి లక్ష్మి, ఐశ్వర్య రాజేష్, బేసిల్ జోసెఫ్, రోహిణి లాంటి వాళ్లు నటించారు. 3డీలోనూ ఈ సినిమా రిలీజైంది. సెప్టెంబర్ 12న థియేటర్లలోకి రాగా ప్రపంచవ్యాప్తంగా వసూళ్ల వర్షం కురిపించింది. మొదటి షో నుంచే పాజిటివ్ రివ్యూలు రావడంతో బాక్సాఫీస్ కళకళలాడింది.

టొవినో థామస్ కెరీర్లో ఓ ల్యాండ్‌మార్క్ సినిమాగా నిలిచిపోనుంది. అతడు ట్రిపుల్ రోల్స్ లో కనిపించిన మూవీ ఇది. కుంజి కేలు, మణియన్, అజయన్ అనే మూడు వేర్వేరు కాలాలకు సంబంధించిన పాత్రల్లో టొవినో నటించడం విశేషం. ఈ సినిమా స్టోరీ భిన్నంగా ఉన్నా దానిని స్క్రీన్ పై ప్రజెంట్ చేసిన విధానం అంత గొప్పగా లేదన్న రివ్యూలు వచ్చాయి. అయితే టొవినో నటన మాత్రం చాలా బాగుందని ప్రశంసించారు.

గతంలో కేరళలో వచ్చిన వరదల నేపథ్యంలో టొవినో నటించిన 2018 మూవీ బ్లాక్ బస్టర్ గా నిలిచిన సంగతి తెలుసు కదా. ఇప్పుడీ ఏఆర్ఎం కూడా అతనికి అలాంటి గొప్ప విజయాన్ని అందించింది. థియేటర్లలో సూపర్ హిట్ అయిన ఈ సినిమా ఇప్పుడు ఓటీటీలో ఎంతమేర ప్రేక్షకులను ఆకట్టుకుంటుందో చూడాలి.