OMG 2 Teaser date: ‘ఓఎంజీ 2’ టీజర్ డేట్ ఫిక్స్.. శివుడి వేషంలో అక్షయ్ కుమార్.. ప్రోమోకు ఫ్యాన్స్ రియాక్షన్ ఇలా..

OMG 2 Teaser date: బాలీవుడ్ స్టార్ హీరో అక్షయ్ కుమార్ నటించిన ఓ మై గాడ్ (OMG) చిత్రం 2012లో సూపర్ హిట్ అయింది. విభిన్న కథాంశంతో తెరకెక్కింది. వేరే భాషల్లోనూ ఈ సినిమా రీమేక్ అయింది. ఇప్పుడు 11 ఏళ్ల తర్వాత ఓ మై గాడ్ సినిమాకు సీక్వెల్ చేస్తున్నాడు అక్షయ్ కుమార్. ఓఎంజీ 2 (ఓ మై గాడ్ 2) పేరుతో ఈ చిత్రం ప్రస్తుతం రూపొందుతోంది. ఇప్పటికే వచ్చిన ఫస్ట్ లుక్ ఈ చిత్రంపై ఆసక్తిని విపరీతంగా పెంచింది. టీజర్ కోసం చాలా మంది నిరీక్షిస్తున్నారు. ఈ తరుణంలో టీజర్ గురించి అక్షర్ కుమార్ ప్రకటించాడు. ఓఎంజీ2 టీజర్ రిలీజ్ డేట్‍ను ఓ ప్రోమో వీడియోతో వెల్లడించాడు.

తాను శివుడి వేషంలో ఉన్న ఓ వీడియోను అక్షయ్ కుమార్ సోషల్ మీడియాలో పోస్ట్ చేశాడు. నలుపు రంగు దుస్తులు ధరించి.. పొడవైన జుట్టు, కళ్లకు కాటుక, నుదుటిపై నామాలతో అక్షయ్ ఈ వీడియోలో కనిపించాడు. శివుడి వేషధారణలో చాలా ఇంటెన్స్‌గా ఈ ప్రోమోలో నడిచాడు అక్షయ్. బ్యాక్‍గ్రౌండ్‍లో ‘హర హర మహాదేవ్’ నినాదాలు మారుమోగాయి. ఇక, ఓఎంజీ 2 టీజర్‌ను జూలై 11వ తేదీన విడుదల చేయనున్నట్టు అక్షయ్ కుమార్ తెలిపాడు. అంటే మరో రెండు రోజుల్లో టీజర్ రానుంది. ఓఎంజీ 2 సినిమా.. థియేటర్లలో ఈ ఏడాది ఆగస్టు 11న విడుదల కానుంది.

ఓఎంజీ 2 మూవీలో అక్షయ్ కుమార్‌తో పాటు పంజక్ త్రిపాఠి, యామీ గౌతమ్, అరుణ్ గోవిల్, గోవింద్ నమ్‍దేవ్ ప్రధాన పాత్రలు పోషించారు. ఈ చిత్రానికి అమిత్ రాయ్ దర్శకత్వం వహిస్తుండగా.. మంగేశ్ దక్డే సంగీతం అందిస్తున్నాడు.

కాగా, అక్షయ్ పోస్ట్ చేసిన ప్రోమోకు అభిమానులు ఫిదా అవుతున్నారు. మరో మాస్టర్ పీస్ మూవీ వచ్చేస్తోందంటూ సంతోషపడుతున్నారు. అయితే, ఈసారైనా ఎవరి మనోభావాలు దెబ్బతీయకుండా జాగ్రత్త పడాలని మరికొందరు చిత్రయూనిట్‍కు సూచించారు.

ఓఎంజీ 2 టీజర్.. 1 నిమిషం 34 సెకన్ల పాటు ఉంటుందని తెలుస్తోంది. ఈ టీజర్‌కు సెన్సార్ బోర్డు యూ సర్టిఫికేట్ ఇచ్చిందని సమాచారం బయటికి వచ్చింది.

ఆగస్టు 11న విడుదల కానున్న సన్నీ డియోల్ మూవీ గాదర్ 2తో బాలీవుడ్ బాక్సాఫీస్ వద్ద ఓఎంజీ 2 తలపడనుంది. ఆరోజే రిలీజ్ కావాల్సిన యానిమల్ వాయిదా పడడంతో పోటీ కాస్త తగ్గింది.