Odisha Assembly election results : నవీన్​ పట్నాయక్​ ఇలాకాలో బీజేపీ జోరు.. బీజేడీ అధినేత సుదీర్ఘ ప్రస్తానికి ముగింపు!

Odisha Assembly election results 2024 : ఒడిశా రాజకీయాల్లో పెను సంచలనం! 2000 నుంచి అధికారంలో కొనసాగుతున్న బిజూ జనతాదళ్​కు అక్కడి ప్రజలు గుడ్​బై చెప్పినట్టు కనిపిస్తోంది. అధికార బీజేడీకి షాక్​ ఇస్తూ.. ఒడిశాలో బీజేపీ ప్రభుత్వ ఏర్పాటుకు అతి చేరువలో ఉంది.

ఒడిశా అసెంబ్లీ ఎన్నికల ఫలితాలు..

2024 లోక్​సభ ఎన్నికలతో పాటు 2024 ఒడిశా అసెంబ్లీ ఎన్నికలు సైతం జరిగాయి. మొత్తం 147 సీట్లకు పోలింగ్​ జరగ్గా.. ప్రస్తుతం ఓట్ల లెక్కింపు ప్రక్రియ కొనసాగుతోంది. కాగా.. అధికార బీజేడీ ఇక్కడ కేవలం 48 సీట్లలోనే ఆధిక్యంలో ఉంది. కాంగ్రెస్​ 13 చోట్ల లీడ్​లో ఉంది. ఇతరులు 5 చోట్ల ఆధిక్యంలో ఉన్నారు.

కానీ.. బీజేడీకి షాక్​ ఇస్తూ.. ఒడిశాలో బీజేపీ 81 స్థానాల్లో దూసుకెళుతోంది. మెజారిటీ మార్క్​ 74 కన్నా ఇది ఎక్కువే. ఇదే ట్రెండ్​ కొనసాగితే.. 2000 తర్వాత.. ఒడిశాలో తొలిసారిగా బీజేడీయేతర పార్టీ అధికారంలోకి వస్తుంది.

Odisha Assembly election results BJD : ఇండియాలో సుదీర్ఘకాలంపాటు సీఎంగా పని చేసిన వారి జాబితాల్లో ప్రస్తుతం రెండో స్థానంలో ఉన్నారు 77ఏళ్ల నవీన్​ పట్నాయక్​. 2024 ఒడిశా అసెంబ్లీ ఎన్నికల్లో గెలిస్తే.. మొదటి స్థానంలో నిలిచేవారు. కానీ తాజా పరిస్థితులు అందుకు భిన్నంగా ఉన్నాయి.

ఎన్​డీఏలో లేకపోయినా.. నవీన్​ పట్నాయక్​కు ప్రధానమంత్రి నరేంద్ర మోదీతో మంచి మైత్రి ఉంది. కేంద్రంలో మోదీకి నవీన్​ పట్నాయక్​ పరోక్షంగా మద్దతిస్తూ ఉండేవారు. అలాంటిది.. తాజా అసెంబ్లీ ఎన్నికల్లో కీలక పరిణామాలు కనిపించాయి. ఎన్నికలకు ముందు నవీన్​ పట్నాయక్​పై బీజేపీ ప్రత్యేక ఫోకస్​ పెట్టింది. అది.. ఫలితాల్లో స్పష్టంగా కనిపిస్తోంది.

రాష్ట్రంలో ప్రధాని మోదీ అనేకమార్లు స్వయంగా పర్యటించారు. నవీన్​ పట్నాయక్​ వయస్సు, రాష్ట్ర అభివృద్ధి వంటి అంశాలను లేవనెత్తారు. అది క్లిక్​ అయినట్టే కనిపిస్తోంది.

2024 Lok Sabha election results : వాస్తవానికి.. 2019 అసెంబ్లీ ఎన్నికల నుంచే బీజేడీ బలహీన పడినట్టు కనిపిస్తోంది. నాటి ఎన్నికల్లో 147 సీట్లకు గాను బీజేడీ 112 చోట్ల గెలిచింది. కాంగ్రెస్​ 9కే పరిమితమైంది. 2014తో (10) పోల్చుకుంటే అనూహ్యంగా పుంజుకున్న బీజేపీ.. 23 స్థానాల్లో గెలిచింది. ఇది.. కమలదళానికి మేజర్​ బూస్ట్​ ఇచ్చింది. ఆ తర్వాత 5 ఏళ్ల పాటు.. నవీన్​ పట్నాయక్​ టీమ్​ని వీలు కుదిరినప్పుడల్లా టార్గెట్​ చేస్తూ వచ్చింది. చివరికి.. 2024 ఒడిశా అసెంబ్లీ ఎన్నికల్లో గెలుపునకు చేరువైంది.

కేంద్రంలో మాత్రం..

ఒడిశాలో అధికారం దిశగా బీజేపీ కదులుతున్నా.. కేంద్రంలో మాత్రం ఆశించిన స్థాయిలో ప్రదర్శన కనిపించకపోవడం కమలదళాన్ని ఆందోళనకు గురిచేస్తోంది. ఎన్​డీఏ కూటమి ఈసారి బలమైన ప్రదర్శన చేస్తుందని చెప్పిన ఎగ్జిట్​ పోల్స్​ అంచనాలు తారుమారు అయ్యాయి. ఎన్​డీఏకి విపక్ష ఇండియా కూటమి గట్టి పోటీ ఇస్తోంది. ఫలితాలకు ముందు.. బీజేపీ సొంతంగా మెజారిటీ దాటిపోతుందని అనుకున్నారు. కానీ ఇప్పుడు ఆ పరిస్థితులు కనిపించడం లేదు. పూర్తి వివరాల కోసం ఇక్కడ క్లిక్​ చేయండి.