Business idea : ఈ ఆంధ్ర అబ్బాయి ఒక ట్రెండ్​ సెట్టర్​! 'స్విగ్గీ'తో బిలియన్​ డాలర్ల వ్యాపారం..

‘స్విగ్గీ’.. భారత దేశంలో ఈ పేరు వినని వ్యక్తి బహుశా ఎవరూ ఉండకపోవచ్చు! ఒక విప్లవాత్మక ఆలోచనతో పుట్టుకొచ్చిన ఈ ప్రముఖ ఫుడ్​ డెలివరీ సంస్థ ఇప్పుడు దేశ నలుమూలలకు విస్తరించి సక్సెస్​ఫుల్​ బిజినెస్​గా నడుస్తోంది. అయితే, స్విగ్గీ జర్నీలో ఓ ఆంధ్ర అబ్బాయి కీలక పాత్ర పోషించాడని మీకు తెలుసా? ఆయనే శ్రీహర్ష మాజేటి. స్విగ్గీ ఐపీఓ సబ్​స్క్రిప్షన్​, లిస్టింగ్​ నేపథ్యంలో కంపెనీ కో-ఫౌండర్​, సీఈఓ శ్రీహర్ష గురించి మీకు తెలియని ఎన్నో విషయాలను ఇక్కడ చూసేయండి..

స్విగ్గీ సీఈఓ శ్రీహర్ష మాజేటి..

ఆంధ్రప్రదేశ్​లో జన్మించిన శ్రీహర్ష ప్రస్తుత వయస్సు 38ఏళ్లు. ఆయన తల్లి డాక్టర్​ అని, తండ్రికి రెస్టారెంట్​ వ్యాపారం ఉండేదని తెలుస్తోంది. శ్రీహర్ష మాజేటి 2008లో బిట్స్​ పిలానీ నుంచి ఇంజనీరింగ్‌లో బ్యాచిలర్స్ పూర్తి చేసి, భౌతిక శాస్త్రంలో మాస్టర్స్‌ను కూడా అభ్యసించారు. తరువాత సీఎఫ్​ఏ ప్రోగ్రామ్‌లో నమోదు చేసుకున్నారు. కానీ అది తనకు సూట్​ అవ్వడం లేదని తెలుసుకున్నారు. తరువాత ఆయన ఐఐఎం కోల్​కతా నుంచి పోస్ట్-గ్రాడ్యుయేట్ డిప్లొమా పొందారు. అక్కడ రిక్రూట్‌మెంట్ కోఆర్డినేటర్‌గానూ కూడా ఉన్నాడు.

నోమురా ఇంటర్నేషనల్‌లో అసోసియేట్‌గా తన కెరీర్​ని ప్రారంభించారు శ్రీహర్ష. లండన్‌లో ఒక సంవత్సరం పనిచేసిన తర్వాత, తనకు ఇష్టమైన పని చేయాలని నిర్ణయించుకుని ఉద్యోగాన్ని విడిచిపెట్టారు.

“నేను పోర్చుగల్ నుంచి గ్రీస్‌కు 3 నెలల పాటు సైకిల్‌పై 3500 కిలోమీటర్లు ప్రయాణించాను. పబ్లిక్ ట్రాన్స్‌పోర్ట్- హిచ్‌హైకింగ్ ద్వారా టర్కీ నుంచి కజాఖ్‌స్థాన్ వరకు ట్రావెల్​ చేశాను. కెరీర్ స్విచ్ నుంచి కొంత దృక్పథాన్ని పొందడానికి, మనం నివసించే ప్రపంచం గురించి మరింత తెలుసుకోవడానికి సమయాన్ని ఉపయోగించడం ఇప్పటి వరకు నా అత్యంత ప్రతిఫలదాయకమైన నిర్ణయం," అని స్విగ్గీ సీఈఓ శ్రీహర్ష గతంలో తన లింక్డ్ఇన్ ప్రొఫైల్​లో రాసుకున్నారు.

2013లో లాంచ్​ అయిన బండల్​ అనే కంపెనీకి శ్రీహర్ష సహ-స్థాపించారు. ఇది భారతదేశం అంతటా బహుళ కొరియర్ భాగస్వాములను సమీకరించడానికి, వారికి 1-స్టాప్ సెల్యూషన్​ అందించడానికి, ఈ-కామర్స్ వ్యాపారులకు సహాయపడే శక్తివంతమైన కంపెనీగా మారింది.

స్విగ్గీని నిర్మిస్తూ, శ్రీహర్ష మార్కెట్‌ను లోతుగా విశ్లేషించారు. ప్రత్యేకమైన డెలివరీ సిస్టమ్ అవసరాన్ని గ్రహించారు.బండల్​ని ఆన్-డిమాండ్ ఫుడ్ డెలివరీ సిస్టమ్‌గా రీబ్రాండ్ చేయాలని నిర్ణయించుకున్నారు. అలా.. 2014లో దేశంలోనే అతిపెద్ద ఆన్‌లైన్ ఫుడ్ ఆర్డర్ ప్లాట్‌ఫామ్‌గా స్విగ్గీ పుట్టుకొచ్చింది. బెంగళూరులోఒక చిన్న గదిలో ఆపరేషన్స్​ జరిగేవి. 2014లోనే 12 నగరాల్లో స్విగ్గీ యాప్​ని లాంచ్​ చేశారు. అప్పటికి జొమాటో ఇంకా ఫుడ్​ డెలివరీ రంగంలోకి అడుగుపెట్టలేదు. చాలా తక్కువ కాలంలోనే 9 రాష్ట్రాలు, 40 నగరాలకు స్విగ్గీ విస్తరించింది.

స్విగ్గీ సక్సెస్​ని చూసి వెంచర్​ క్యాపిటలిస్ట్​లు ఈ కంపెనీలో ఇన్వెస్ట్​ చేసేందుకు ముందుకొచ్చారు. ఫలితంగా 2016 స్విగ్గీ అనేక రౌండ్స్​ ద్వారా ఫండ్స్​ని సమకూర్చుకోగలిగింది. ఇప్పుడు ఐపీఓగా స్విగ్గీ స్టాక్​ మార్కెట్​లోకి అడుగుపెట్టనుంది.

అయితే, ఇక్కడ శ్రీహర్షతో పాటు మరో ఇద్దరు కో-ఫౌండర్స్​ దూరదృష్టిని మెచ్చుకోవాలి. అసలు ఎలాంటి ఫుడ్​ డెలివరీ యాప్స్​ని భారతీయులు కనీవినీ ఎరుగని కాలంలో వీరు రిస్క్​ చేశారు. సంస్థను అంచెలంచెలుగా బిల్డ్​ చేశారు. కడుపు నిండితేనే కస్టమర్​ సంతృప్తి చెందుతాడని సర్వీస్​ క్వాలిటీకి ఎప్పుడూ టాప్​ ప్రయారిటీని ఇస్తూ సంస్థను ముందుకు తీసుకెళ్లారు. ఫలితంగా ఇప్పుడు ఇండియాలోనే అతిపెద్ద ఫుడ్​ డెలివరీ ప్లాట్​ఫామ్స్​లో ఒకటిగా స్విగ్గీ నిలిచింది.

సొంతంగా వ్యాపారం చేద్దామని భావిస్తున్న వారందరికి స్విగ్గీ, శ్రీహర్ష జర్నీ ఎంతో స్ఫూర్తిదాయకం!