Crime | సొంత కూతుళ్లని కూడా చూడని తండ్రి.. ముగ్గురిపై లైంగిక దాడి!
21 March 2022, 7:57 IST
- అతనికి ఐదుగురు సంతానం. అందులో ముగ్గురు కూతుళ్లు ఉన్నారు. ఆ ఆటో డ్రైవర్ తాగేసి వచ్చి.. సొంత కూతుళ్లపైనే లైంగిక దాడికి పాల్పడ్డాడు. వారు ఆత్మహత్యకు సైతం ప్రయత్నించారు.
కూతుళ్లపై తండ్రి లైంగిక దాడి
Father assaults daughter | హైదరాబాద్ వనస్థలిపురంలో దారుణ ఘటన ఆలస్యంగా వెలుగులోకి వచ్చింది. సొంత కూతుళ్లని కూడా చూడకుండా.. ఓ కిరాతక తండ్రి వారిపై లైంగిక వేధింపులకు పాల్పడ్డాడు. వారు ఆత్మహత్య చేసుకునేందుకు సిద్ధపడ్డారు!
ఇదీ జరిగింది..
నల్గొండలోని దేవరకొండకు చెందిన ఓ వ్యక్తి.. ఆటో నడుపుకుంటూ తన కుటుంబంతో కలిసి హైదరాబాద్లోని వనస్థలిపురంలో నివాసముంటున్నాడు. అతనికి ఐదుగురు సంతానం. ముగ్గురు కూతుళ్లు, ఇద్దరు కొడుకులు. పెద్ద కూతురి వయస్సు 20 ఉంటుంది. ఆ వ్యక్తి నిత్యం మద్యం సేవించి ఇంటికొచ్చి నానా రచ్చ చేసేవాడు. ఈ క్రమంలోనే పలుమార్లు కూతుళ్లపై లైంగిక దాడికి యత్నించాడు. భార్య ఎప్పుడు అడ్డుకునేది.
కాగా.. ఈ నెల 17న తాగేసి వచ్చి.. భార్యని కొట్టాడు. ఆమెను ఊరికి పంపించేశాడు. ఆ తర్వాతి రోజు రాత్రి.. మళ్లీ తాగి ఇంటికెళ్లాడు ఆ ఆటో డ్రైవర్. తన 13ఏళ్ల కూతురిపై లైంగిక దాడికి ప్రయత్నించాడు. ఆమె ప్రతిఘటించగా.. మిగితా కుమార్తెలు గట్టిగా అరిచారు. చుట్టుపక్కన వారు వస్తారేమో అని భయపడి.. అతను అక్కడి నుంచి పారిపోయాడు.
అయితే.. బాలికలు షీ టీమ్కు ఫోన్ చేశారు. కానీ గంటలు గడిచినా ఎలాంటి స్పందన లభించలేదు. తండ్రి చేతుల్లో వేధిపులకు గురికావడం కన్నా ఆత్మహత్య చేసుకోవడం మేలని భావించారు. సమీప చెరువు వద్దకు కూడా వెళ్లారు. అక్కడే ఓ మహిళ వారిని చూసింది. వారి ఆత్మహత్య ప్రయత్నాలను అడ్డుకుంది. అసలు విషయం తెలుసుకుని ఓ స్వచ్ఛంద సంస్థ ఫోన్ నెంబర్ వారికి ఇచ్చింది.
ఆ ముగ్గురు.. స్వచ్ఛంద సంస్థకు కాల్ చేయగా.. వారు పోలీసులను అప్రమత్తం చేశారు. బాలికలను పోలీసు స్టేషన్కు తీసుకెళ్లి.. ఫిర్యాదు రాయించుకున్నారు. నిందితుడి కోసం తీవ్రంగా గాలించిన పోలీసులు.. శనివారం రాత్రి అతడిని అదుపులోకి తీసుకున్నారు. ప్రస్తుతం నిందితుడు పోలీసుల రిమాండ్లోనే ఉన్నాడు.