‘అమెరికా చెప్పినా జెలెన్స్కీ పట్టించుకోలేదు.. అందుకే ఈ యుద్ధం’
11 June 2022, 11:12 IST
- Russia Ukraine war : రష్యా ఉక్రెయిన్ యుద్ధం మొదలై దాదాపు నాలుగు నెలలు పూర్తవుతోంది. కాగా.. యుద్ధానికి ముందు.. అమెరికా మాటలను ఉక్రెయిన్ అధ్యక్షుడు జెలెన్స్కీ పట్టించుకోలేదని అగ్రరాజ్య అధ్యక్షుడు బైడెన్ వ్యాఖ్యానించారు.
జో బైడెన్
Russia Ukraine war : రష్యా- ఉక్రెయిన్ యుద్ధంపై అమెరికా అధ్యక్షుడు జో బైడెన్ కీలక వ్యాఖ్యలు చేశారు. యుద్ధానికి రష్యా సన్నద్ధమవుతున్నట్టు అమెరికాకు సమాచారం ఉందని, ఆ విషయాన్ని ఉక్రెయిన్ అధ్యక్షుడు వ్లాదిమిర్ జెలెన్స్కీకి చెప్పేందుకు ప్రయత్నించినట్టు వెల్లడించారు. కానీ ఆ సమయంలో అమెరికాను జెలెన్స్కీ పట్టించుకోలేదని, అసలు తాము చెప్పాల్సినది వినలేదని పేర్కొన్నారు.
అమెరికా లాస్ఏంజెల్స్లో జరిగిన డెమొక్రటిక్ ఫండ్రైజర్ కార్యక్రమంలో పాల్గొన్న జో బాడెన్.. ఈ వ్యాఖ్యలు చేశారు. ఉక్రెయిన్కు తాము అండగా నిలిస్తున్నట్టు చెప్పిన ఆయన, యుద్ధం ఆరంభం నుంచి తాము చేపట్టిన చర్యలను వివరించారు.
"రెండో ప్రపంచ యుద్ధం తర్వాత ఇలాంటిది(రష్యా ఉక్రెయిన్ యుద్ధం) ఎప్పుడు జరగలేదు. నేను ఎక్కువ చేసి చెబుతున్నా అని చాలా మంది అనుకున్నారు. కానీ ఆయన(రష్యా అధ్యక్షుడు వ్లాదిమిర్ పుతిన్) యుద్ధానికి సిద్ధపడుతున్నట్టు, ఏ క్షణంలోనైనా సరిహద్దును దాటవచ్చన్నట్టు నాకు తెలుసు. ఆ విషయంపై అసలు సందేహమే లేదు. కానీ జెలెన్స్కీ మమ్మల్ని వినడానికి ఇష్టపడలేదు," అని బైడెన్ అన్నారు.
యుద్ధం వేళ.. తన నాయకత్వ లక్షణాలతో లక్షలాది మందిలో స్ఫూర్తి నింపారు జెలెన్స్కీ. కానీ యుద్ధానికి ముందు.. ఉక్రెయిన్ను జెలెన్స్కీ సిద్ధం చేయలేదని, అందుకే పరిస్థితులు ఇంత తీవ్రంగా ఉన్నాయని విమర్శలు వెల్లువెత్తుతున్నాయి.
ఫిబ్రవరి 24న రష్యా ఉక్రెయిన్ యుద్ధం మొదలైంది. అందుకు కొన్ని రోజుల ముందు నుంచే.. రష్యా యుద్ధం చేయదంటూ అమెరికా హెచ్చరికలను బహిరంగంగానే కొట్టిపడేశారు జెలెన్స్కీ.
కొనసాగుతున్న మారణహోమం..
- ఉక్రెయిన్పై రష్యా దండయాత్ర రోజురోజుకు తీవ్రరూపం దాల్చుతోంది. యుద్ధం మొదలై.. దాదాపు నాలుగు నెలలు గడుస్తోంది. యుద్ధానికి తొందరగా ముగింపు పడకపోతే.. ఇప్పటివరకు తమకు మద్దతుగా నిలిచిన పాశ్చాత్య దేశాలు.. పట్టించుకోవడం మానేస్తాయని ఉక్రెయిన్ ఆందోళన వ్యక్తం చేస్తోంది.
- మరోవైపు యుద్ధంతో ఉక్రెయిన్కు భారీ నష్టమే జరుగుతోంది. ఇప్పటికే వందలాది నగరాలు ధ్వంసమయ్యాయి. కాగా.. రోజుకు 200కుపైగా మంది ఉక్రెయిన్ సైనికులు ప్రాణాలు వీడుతున్నట్టు ఆ దేశం పేర్కొంది. రష్యాను అడ్డుకునేందుకు మరిన్ని ఆయుధాలు కావాలని, తమకు సాయం చేయాలని ప్రపంచ దేశాలను వేడుకుంటోంది.
- తూర్పు ఉక్రెయిన్ పరిస్థితులు దయనీయంగా ఉన్నాయి. రష్యా ఉక్రెయిన్ సైనికుల మధ్య తీవ్ర పోరు నడుస్తోంది. లుహనెస్క్, డోనెస్క్ ప్రాంతాల్లోని నగరాలు, గ్రామాలను ఆక్రమించుకునేందుకు రష్యా సైన్యం తీవ్రంగా కృషిచేస్తోంది. ఈ క్రమంలోనే వందలాది మంది పౌరులు.. ఆయా ప్రాంతాలను విడిచిపెట్టి వలస వెళ్లిపోతున్నారు. సొంత ఊళ్లకు ఎప్పుడు తిరుగొస్తామో అన్న బాధతో కన్నీరు పెట్టుకుంటున్నారు.
- యుద్ధం వేళ ఈయూలో చేరేందుకు ఆసక్తి కనబరిచారు ఆ దేశాధ్యక్షుడు జెలెన్స్కీ. ఉక్రెయిన్ను ఈయూలో కలిపే ప్రక్రియ పూర్తి చేయాలని విజ్ఞప్తి చేశారు. ‘ఉక్రెయిన్ ప్రజలకు ఈయూ అండగా ఉంటుందన్న మాటలను నిజం చేయండి,’ అంటూ వ్యాఖ్యానించారు జెలెన్స్కీ.