Garlic price in Hyderabad : జేబుకు చిల్లు పెడుతున్న వెల్లుల్లి- భారీగా పెరిగిన ధరలు!
12 December 2023, 8:55 IST
Garlic price in Hyderabad : దేశవ్యాప్తంగా వెల్లుల్లి ధరలు భారీగా పెరుగుతున్నాయి. కొన్ని వారాల్లోనే ధరలు రెట్టింపు అయ్యాయి!
జేబుకు చిల్లు పెడుతున్న వెల్లుల్లి- భారీగా పెరిగిన ధరలు!
Garlic price in Hyderabad : నిన్న మొన్నటి వరకు టమాటా, ఉల్లిపాయల ధరలు పెరిగిన విషయం తెలిసిందే. ఇక ఇప్పుడు.. వెల్లుల్లి వంతు వచ్చినట్టి కనిపిస్తోంది! దేశవ్యాప్తంగా వెల్లుల్లి ధరలు భారీగా పెరుగుతున్నాయి. గడిచిన కొన్ని వారాల్లోనే ఈ ధరలు రెండింతలు పెరగడగం గమనార్హం. దేశంలోని అనేక ప్రాంతాల్లో కేజీ వెల్లుల్లి రూ. 400 పలుకుతోంది. ఇంకొన్ని ప్రాంతాల్లో రూ. 300- రూ. 400 మధ్యలో ఉంది. నవంబర్లో వచ్చిన అకాల వర్షంతో పంట ధ్వంసమవ్వడం, మార్కెట్లో డిమాండ్కు తగ్గ సప్లై లేకపోవడం.. వెల్లులి ధరలకు రెక్కలు రావడానికి కారణం.
హోల్సేల్ మార్కెట్లో కేజీ వెల్లుల్లి ధర సగటున రూ. 130-140గా ఉంది. హై క్వాలిటీ వెల్లుల్లి హోల్సేల్ ధర మాత్రం కేజీకి రూ. 220- రూ. 250 మధ్యలో ఉంది. వాస్తవానికి శీతాకాలంలో వెల్లుల్లి ధరలు కాస్త ఎక్కువగానే ఉంటాయి. ఈసారి పంట నష్టంతో పరిస్థితులు మరింత ఆందోళనకరంగా మారాయి.
Garlic price rise : అయితే.. రానున్న రోజుల్లో కూడా ఇదే పరిస్థితులు కొనసాగవచ్చని ట్రేడర్లు చెబుతున్నారు. ఇప్పట్లో పంట చేతికి రాకపోవచ్చని, ధరలు తగ్గకపోవచ్చని అభిప్రాయపడుతున్నారు.
"స్టాక్ పడిపోతోంది. సప్లై రావడం లేదు. వర్షాకాలంలో వానలు సరిగ్గా పడకపోవడంతో పంట సరిగ్గా పండలేదు. ఇప్పుడు పంట పండినా.. అకాల వర్షాలకు ధ్వంసమైపోయింది. ఇప్పట్లో ధరలు తగ్గకపోవచ్చు. గుజరాత్, రాజస్థాన్, మధ్యప్రదేశ్ నుంచి రావాల్సిన సరకు.. చాలా ఎక్కువ ధర పలుకుతోంది," అని ముంబై ఏపీఎంసీ డైరక్టర్ అశోక్ తెలిపారు.
అకాల వర్షాలకు రైతులు ఎక్కువగా నష్టపోయారు. వాన నీటి నుంచి తమ పంటను కాపాడుకోలేకపోయారు. ఫలితంగా చాలా మందికి రూ. లక్షల్లో నష్టాలు వచ్చాయి.
టామాటా షాక్..
దేశంలో ద్రవ్యోల్బణం తక్కువగానే ఉన్నా.. కొన్ని కూరగాయల రేట్లు మాత్రం ప్రజలను ఎప్పటికప్పుడు భయపెడుతూనే ఉంటున్నాయి. కొన్ని నెలల క్రితం టమాటా ధరలు ఆకాశాన్ని తాకాయి. రీటైల్ మార్కెట్లో కేజీ టమాటా రూ. 220 పలికన సందర్భాలు కూడా ఉన్నాయి. దాని కన్నా ముందు.. కేజీ టమాటా రూ. 20, రూ. 30గా ఉండేది! కొన్ని రోజుల్లోనే ధరలు రెట్టింపు అయ్యాయి. చాలా మంది రైతులు రూ. కోట్లల్లో లాభాలు చూశారు. ఆ తర్వాత పరిస్థితులు మెరుగుపడి, టమాటా ధరలు దిగొచ్చాయి.