Assam floods 2022 : అస్సాం వరదల్లో.. 135కు చేరిన మృతుల సంఖ్య

Assam floods 2022 : అస్సాం వరదల్లో మృతుల సంఖ్య 135కు చేరింది. సోమవారం తాజాగా నాలుగు జిల్లాల్లో ఎనిమిది మంది ప్రాణాలు కోల్పోయారు. ఈ వివరాలను ఆ రాష్ట్ర విపత్తు నిర్వహణ అధికారులు వెల్లడించారు.

మరోవైపు తీవ్ర అల్లకల్లోలం మధ్య ప్రజలకు కాస్త ఊరటనిచ్చే వార్త లభించింది. ఆస్సాం వరదల ఉద్ధృతి తగ్గుముఖం పడుతున్నట్టు అధికారులు వెల్లడించారు. కానీ 22జిల్లాల్లోని 2.2 మిలియన్​ మంది ప్రజలపై ఇప్పటికీ వరదల ప్రభావం ఉంది. సిల్చార్​లో పరిస్థితులు మరింత దారుణంగా ఉన్నాయి. మరో రెండు రోజుల్లో పరిస్థితులు మెరుగుపడితే.. అస్సాం వరదల్లో చిక్కుకున్న దిగువ ప్రాంతాల్లో నుంచి నీటిని తీసే ప్రక్రియను ప్రారంభించాలని అధికారులు ఆశిస్తున్నారు.

ఎనిమిది మరణాల్లో ఐదు కచర్​ జిల్లాలో నమోదయ్యాయి. కామ్​రూప్​, మోరిగాన్​, నగౌన్​ ప్రాంతాల్లో కలిపి ముగ్గురు ప్రాణాలు కోల్పోయారు.

"అస్సాం వరదల అనంతరం ఎదురయ్యే ఆరోగ్య సమస్యలను అధిగమించేందుకు హెల్త్​ క్యాంపులు ఏర్పాటు చేయనున్నాము. సిల్చార్​ వ్యాప్తంగా శానిటైజేషన్​ చేసేందుకు ప్రణాళికలు రచించాము," అని ఓ అధికారి వెల్లడించారు.

ప్రస్తుతం.. రోడ్డు మార్గం అందుబాటులో ఉన్న ప్రాంతాలకు సహాయక సామాగ్రి అందిస్తున్నారు. కొన్ని ప్రాంతాల్లో హెలికాఫ్టర్ల సాయంతో ఆ ప్రక్రియను కొనసాగిస్తున్నారు.

ఓవైపు అస్సాం వరదల్లో చిక్కుకున్న ప్రజలను రక్షించేందుకు ఎన్డీఆర్​ఎఫ్​ ప్రయత్నిస్తుండగా.. మరోవైపు వరద బాధితులను ఆ రాష్ట్ర సీఎం హిమంత బిశ్వ శర్మ ఎప్పటికప్పుడు పరామర్శిస్తున్నారు. ప్రజల్లో విశ్వాసాన్ని, ధైర్యాన్ని నింపుతున్నారు.