తాతా నువ్వు కేక.. 102ఏళ్ల వయస్సులోనూ..
04 March 2022, 15:26 IST
- నేటి యువత.. రెండు ఫ్లోర్లు ఎక్కేసరికే.. ‘అమ్మో.. కాళ్లు నొప్పులు’ అనేస్తోంది. అలాంటిది ఓ 102ఏళ్ల వృద్ధుడు.. పరుగులో రికార్డ్ సృష్టించారు. థాయ్లాండ్లో జరిగిన పోటీల్లో.. 100మీటర్ల పరుగు పందేన్ని కేవలం 27.08 సెకన్లలో ముగించి అందరిని ఆశ్చర్యపరిచారు.
సవాంగ్ జనప్రామ్
102 year old man running | థాయ్లాండ్కు చెందిన 102ఏళ్ల సవాంగ్ జనప్రామ్ అనే వృద్ధుడు.. తన పరుగుతో దుమ్మురేపుతున్నారు. ఆ వయస్సులోనూ రికార్డులు సృష్టిస్తున్నారు. తన వయస్సు వారితో జరిగిన పోటీల్లో.. 100మీటర్ల పరుగును 27.08 సెకన్లలో పూర్తి చేసి అందరిని ఆశ్చర్యపరిచారు.
థాయ్లాండ్లోని సముట్ సొంగ్క్రమ్ రాష్ట్రంలో గత వారం.. థాయ్లాండ్ మాస్టర్స్ అథ్లెటిక్స్ ఛాంపియన్షిప్ జరిగింది. 100-105 ఏళ్ల వయస్సున్న వారి విభాగంలో సవాంగ్ పోటీచేశారు. ఆ పరుగులో గోల్డ్ మెడల్ సాధించారు.
థాయ్లాండ్లోనే అతిపెద్ద వయస్సున్న స్ప్రింటర్గా జనప్రామ్కు గుర్తింపు ఉంది. ఇప్పటికి ఎన్నో పోటీల్లో పాల్గొన్నారు. ఎన్నో పతకాలను వెనకేసుకున్నారు. ఎందరికో స్ఫూర్తిగా నిలిచారు. ఇక తాజా పోటీలకు సంబంధించిన వీడియోను ఓ అంతర్జాతీయ వార్తా సంస్థ.. ట్విట్టర్లో షేర్ చేసింది.
"క్రీడలంటే నాకు చాలా ఇష్టం. ఇంకా చెప్పాలంటే.. వాటి వల్లే నేను బలంగా ఉన్నాను. ఆరోగ్యంగా ఉన్నాను. ఎంత శ్రమిస్తే.. అంత ఆకలేస్తుంది. అందుకే నేను చాలా ఎక్కువ తింటాను," అని జనప్రామ్ చెప్పుకొచ్చారు.
Thailand masters athletics championships | పరుగు పందేలతో పాటు జావెలిన్, డిస్కస్ త్రో ఈవెంట్లలో కూడా జనప్రామ్ పాల్గొననున్నారు. వాటిల్లో తన సత్తా చాటాలని భావిస్తున్నారు. అందుకు తగ్గ కసరత్తులు కూడా చూస్తున్నారు.
జనప్రామ్ ఫిట్నెస్పై ఆయన కుమార్తె, 70ఏళ్ల సిరిపాన్ స్పందించారు.
"మా నాన్న ఎప్పుడూ పాజిటివ్గానే ఆలోచిస్తారు. అందుకే ఆయన మానసికంగా ఎంతో ఆరోగ్యంగా ఉంటారు. ఇక భౌతిక ఆరోగ్యం గురించి చెప్పాలంటే.. ఆయన ఇప్పడే చాలా బలంగా ఉన్నారు. ఎన్నడూ లేనంత ఆత్మవిశ్వాసంతో ఉన్నారు," అని సిరిపాన్ వెల్లడించారు.
102 year old man runs race | 25ఏళ్లు వచ్చేసరికే నేటి యూవత ఏ పనిచేయాలన్నా చేతులెత్తేస్తోంది. ఇక నడక, పరుగు వంటి వ్యాయామాలతో కూడిన విషయాలకు చాలా దూరంగా ఉంటోంది. రెండు ఫ్లోర్లు ఎక్కేసరికే.. 'ఆమ్మో.. నడుము నొప్పి, అమ్మో కాళ్ల నొప్పులు' అని బాధపడిపోతోంది. అలాంటిది 102ఏళ్లలో ఈ వృద్ధుడు పరుగులో గోల్డ్ మెడల్ సాధించడం చాలా గొప్ప విషయమే అని చెప్పాలి.
జనప్రామ్ రికార్డులు సామాజిక మాధ్యమాల్లో వైరల్గా మారాయి. చూసిన వారందరూ.. 'వావ్' అంటున్నారు.
అయితే వృద్ధుల పోటీపై నిర్వాహకులు సైతం స్పందించారు. పోటీల్లో పాల్గొనే వారి సంఖ్య ప్రతియేటా పెరుగుతోందంటున్నారు. 1996లో కేవలం 300మంది ఉండేవారని.. ఇక ఇప్పుడు 35-102ఏళ్ల మధ్య వయస్కులు.. 2000 కన్నా ఎక్కువ ఉంటారని వివరించారు.