Breakup Day Quotes | మనసుకు అతిపెద్ద గాయం.. గుండెను కాల్చే మంట ఈ బ్రేకప్!

ప్రేమ ఎంతో మధురం కానీ ప్రియమైన వ్యక్తి కఠినమైనపుడు, ఆ ప్రేమ కూడా కాలకూట విషాన్ని తలపిస్తుంది. మనం ఎంతగానో ప్రేమించిన వ్యక్తి, వారి కోసం గుండెల్లో గుడికట్టి ఆరాధించిన వ్యక్తి మనల్ని కాలదన్ని దూరంగాదూరంగా వెళ్లినపుడు అది ఒక అంతులేని విషాదం. గుండెల్లోంచి దు:ఖం ఉబికుబికి వస్తుంది. చిన్న మనసుకు ఎంత పెద్ద గాయం చేశారనిపిస్తుంది. గుండెకు నిప్పుపెట్టి నిర్ధాక్షణ్యంగా వెళ్లిపోయారనిపిస్తుంది. బ్రేకప్ చేసిన మంట ఎన్ని కన్నీళ్లు కార్చినా చల్లారదు, ఎందరు ఓదార్చిన ఆ బాధ తీరదు.

విడిపోవడం నిజంగా చాలా బాధాకరమైన పరిస్థితి, వారిని ప్రేమించి జీవితంలో చాలా పెద్ద తప్పు చేశామన్న అపరాధ భావన మీలో కలుగుతుంది. ఎంతో నమ్మిన వ్యక్తే నమ్మక ద్రోహం చేసినపుడు, ఇంకా ఏ వ్యక్తిని నమ్మకూడదు అనిపిస్తుంది. మీపై మీకే జాలి, కోపం, అసహ్యం కలుగుతుంది. ప్రతికూల భావాలు మిమ్మల్ని చుట్టుముడతాయి. జీవితం అంతా శూన్యంగా కనిపిస్తుంది.

కానీ, ఒక్కటి మాత్రం నిజం.. బ్రేకప్ తర్వాత మీతో మీరే చేసుకునే సంఘర్షణ కొంతకాలం వరకే ఉంటుంది. ఇది ఒక కఠినమైన పరిస్థితి, ఈ దశను దాటితే, ఆ తర్వాత నుంచి ఉండే జీవితం ఎంతో అందంగా ఉంటుంది, మీలో ఆత్మవిశ్వాసం పెరుగుతుంది.

Breakup Day Quotes- బ్రేకప్ డే కొటేషన్లు

ముల్లును ముల్లుతోనే అన్నట్లుగా బాధను బాధతోనే ఉపశమనం లభిస్తుంది. బ్రేకప్ మిగిల్చిన బాధ నుంచి ఊరట పొందటానికి కొన్ని బ్రేకప్ కొటేషన్లు (Breakup Quotes), జీవిత సత్యాలను ఇక్కడ చూడండి.

కొంతమంది జ్ఞాపకాల్లో మాత్రమే ఉంటారు, జీవితంలో కాదు!

---

నిన్ను భారంగా భావించే బంధంలో బలవంతంగా జీవించడం కంటే..

విడిపోయి ఒంటరిగా జీవించటం మేలు!

---

ప్రేమించిన వారిని మోసం చేయడం నీ తప్పు కాదు..

మోసపోయేంతలా నిన్ను ప్రేమించడం నా తప్పు!

---

తమని తామే ప్రేమించుకోవడానికి ఈరోజుల్లో

మరొకరు నిన్ను ప్రేమిస్తారనుకోవడం అవివేకమే!

---

ఆభరణాలు, ఆస్తులపై మక్కువ ఎక్కువ ఉన్నవారికి

మనసు విలువ ఎలా తెలుస్తుంది?

---

కొన్ని జ్ఞాపకాలు ఎంత మధురమైనవైనా

వాటిని గుర్తుపెట్టుకొని బ్రతకడం చాలా కష్టం!

ప్రేమలో విఫలమైనవాడు జీవితాన్ని గెలుస్తాడు అని చెబుతారు. ఒకరి నుంచి విడిపోయినంత మాత్రాన అది మీ అంతం కాకూడదు, మీ నూతన శఖానికి ఆరంభం కావాలి. మీ ఎదుగుదలను చూసి మిమ్మల్ని దూరం చేసుకున్న వారు ఈర్ష్యపడాలి, మిమ్మల్ని చూసి లోకం గర్వించాలి.