payal rajput tamil debut: పాయ‌ల్ రాజ్‌పుత్‌ త‌మిళ్ డెబ్యూ సినిమా ఫ‌స్ట్‌లుక్ రిలీజ్‌...

ఆర్ఎక్స్ 100 సినిమాతో టాలీవుడ్ లోకి ఎంట్రీ ఇచ్చింది పంజాబీ సుందరి పాయల్ రాజ్‌పుత్‌. అభినయం కంటే అందంతోనే ఈ సినిమాలో ఆకట్టుకున్న ఆమె యువతరం కలల రాణిగా మారిపోయింది. గ్లామర్ నమ్ముకొని తెలుగు చిత్రసీమలో లో నిలదొక్కుకునే ప్రయత్నంలో ఉన్న ఈ ముద్దుగుమ్మ సినిమాలతో పాటు వెబ్ సిరీస్ లపై దృష్టిసారిస్తోంది.

తాజాగా పాయల్ రాజ్ పుత్ త‌మిళంలో అరంగేట్రం చేయ‌బోతున్న‌ది. గోల్‌మాల్ పేరుతో ఓ సినిమా చేస్తోంది. ఈ చిత్రంలో జీవా,మిర్చి శివ హీరోలుగా న‌టిస్తున్నారు. పాయ‌ల్ రాజ్‌పుత్‌తో పాటు తాన్య‌హోప్ మ‌రో హీరోయిన్ గా న‌టిస్తోంది. సోమవారం ఈ చిత్ర ఫ‌స్ట్ లుక్ పోస్ట‌ర్‌ను పాయ‌ల్ రాజ్‌పుత్ త‌న ఇన్ స్టాగ్రామ్ ద్వారా అభిమానుల‌తో పంచుకున్న‌ది. నాయ‌కానాయిక‌ల‌తో పాటు జంతువుల ఫొటోలు పోస్ట‌ర్‌లో ఉండ‌టం ఆస‌క్తిని పంచుతోంది.

త‌మిళంలో తాను న‌టించిన తొలి సినిమాను ప్రేక్ష‌కుల‌తో క‌లిసి చూసేందుకు ఆస‌క్తిగా ఎదురుచూస్తున్న‌ట్లు పాయ‌ల్ రాజ్‌పుత్ పేర్కొన్న‌ది. మారిష‌స్ బ్యాక్‌డ్రాప్‌లో ఔట్ అండ్ ఔట్ ఫ్యామిలీ ఎంట‌ర్‌టైన‌ర్‌గా రూపొందుతున్న ఈ చిత్రానికి పొన్ కుమార‌న్ ద‌ర్శ‌క‌త్వం వ‌హిస్తున్నారు. ప్ర‌స్తుతం తెలుగులో మంచు విష్ణుతో ఓ సినిమా చేస్తోంది పాయ‌ల్ రాజ్‌పుత్‌. విలేజ్ బ్యాక్‌డ్రాప్‌లో ఈ చిత్రం తెర‌కెక్కుతోంది.