Ravi Teja | టైగర్ నాగేశ్వరరావుకు హీరోయిన్ దొరికింది.. స్టార్ హీరోయిన్‌కు సోదరి

మాస్ మహారాజ రవితేజ వరుస చిత్రాలతో దూసుకెళ్తున్నాడు. ఈ ఏడాది ఇప్పటికే ఖిలాడి సినిమాతో ప్రేక్షకుల ముందుకు వచ్చిన ఈయన మరో ప్రాజెక్టును పట్టాలెక్కించనున్నాడు. అదే టైగర్ నాగేశ్వరారవు. ఈ చిత్రానికి సంబంధించిన ఫస్ట్ లుక్ ఇప్పటికే విడుదలై ప్రేక్షకుల్లో అంచనాలను పెంచేసింది. ఉగాది సందర్భంగా ఈ సినిమా ప్రారంభోత్సవాన్ని ఘనంగా ప్రారంభించనుంది చిత్రబృందం. ఈ చిత్రానికి ది కశ్మీర్ ఫైల్స్ సినిమా నిర్మించిన అభిషేక్ అగర్వాల్ నిర్మాత. బాలీవుడ్‌లో తొలి సినిమాతోనే రూ.200 కోట్ల వసూళ్లు సాధించిన ఈయనకు ఇది డ్రీమ్ ప్రాజెక్ట్. తాజాగా టైగర్ నాగేశ్వరారవు చిత్రంలో హీరోయిన్‌ను ఫైనల్ చేసింది చిత్రబృందం.

టైగర్ నాగేశ్వరరావు సినిమాలో హీరోయిన్‌గా నుపుర్ సనన్‌ను తీసుకున్నారు. బాలీవుడ్ టాప్ హీరోయిన్‌గా కొనసాగుతున్న కృతిసనన్ సోదరీయే ఈ నుపుర్. కృతి కూడా తెలుగు చిత్రంతోనే తన సినీ రంగ ప్రవేశం చేసింది. ఇప్పుడు తన సోదరి కూడా తెలుగు చిత్రంతోనే అరంగేట్రం చేయనుండటం విశేషం.

టైగర్ నాగేశ్వరరావు సినిమా వాస్తవికంగా జరిగిన సంఘటనల ఆధారంగా తెరకెక్కుతోంది. 1970వ దశకంలో తెలుగు రాష్ట్రాలను వణికించిన దొంగ జీవితం ఆధారంగా ఈ సినిమా రూపొందిస్తున్నారు. రవితేజ కెరీర్‌లోనే అత్యంత భారీ బడ్జెట్‌తో ఈ చిత్రాన్ని తెరకెక్కిస్తున్నారు.

ఈ సినిమాకు వంశీ కృష్ణ దర్శకత్వం వహిస్తున్నారు. ఇంతకుముందు ఈ దర్శకుడు దొంగాట, కిట్టూ ఉన్నాడు జాగ్రత్త లాంటి విజయవంతమైన సినిమాలను తెరకెక్కించారు. జీవీ ప్రకాశ్ కుమార్ సంగీతాన్ని సమకూరుస్తున్నారు. అభిషేక్ అగర్వాల్ ఆర్ట్స్ పతాకంపై అభిషేక్ అగర్వాల్ ఈ సినిమాను నిర్మిస్తున్నారు. ఉగాది రోజు ఈ చిత్రాన్ని ప్రారంభించనున్నారు.