Dil Raju | బిగ్ బాస్ విన్న‌ర్ తో దిల్‌రాజు వెబ్‌సిరీస్‌

తెలుగులో పలు విజయవంతమైన చిత్రాలను నిర్మించిన దిల్ రాజు డిజిటల్ ప్లాట్ ఫామ్ లోకి ఎంట్రీ ఇస్తూ తొలి ప్రయత్నంగా ఏటీఎమ్(ఎనీ టైమ్ మెమోరీ) పేరుతో ఓ వెబ్ సిరీస్ ను నిర్మిస్తున్న సంగతి తెలిసిందే.

దిల్ రాజు ప్రొడక్షన్స్,జీ5 సంయుక్తంగా రూపొందిస్తున్న ఈ వెబ్ సిరీస్ కు చంద్రమోహన్ దర్శకత్వ వహిస్తున్నారు. దర్శకుడు హరీష్ శంకర్ తో కలిసి దిల్ రాజు వార‌సులు హర్షిత్,హన్షిత ఈ సిరీస్ ను నిర్మిస్తున్నారు. సోమవారం పూజా కార్యక్రమాలతో ఈ వెబ్ సిరీస్ ను లాంఛనంగా ప్రారంభించారు. దేవుడి పటాలపై చిత్రీకరించిన ముహూర్తపు సన్నివేశానికి దిల్ రాజు క్లాప్ నిచ్చారు.

ఈ సిరీస్ లో బిగ్‌బాస్ సీజ‌న్ 5 విన్న‌ర్ వీజే స‌న్నీహీరోగా నటిస్తున్నారు. బిగ్‌బాస్ ఫేమ్ దివి కీల‌క పాత్ర‌ను పోషిస్తోంది. ఈ వెబ్ సిరీస్‌కు హ‌రీష్ శంక‌ర్ క‌థ‌ను అందిస్తున్నారు. హైద‌రాబాద్ లో జ‌రిగిన భారీ ఏటీఎమ్ దోపిడీ సంఘ‌ట‌న‌ను ఆధారంగా చేసుకొని ఈ సిరీస్ ను రూపొందిస్తున్నట్లు స‌మాచారం. ఈ నెల 27 నుంచి ఈ వెబ్‌సిరీస్ రెగ్యుల‌ర్ షూటింగ్ మొద‌లుకానుంది. ఈ వెబ్ సిరీస్‌కు ప్ర‌శాంత్ విహారి సంగీతాన్ని అందిస్తుండ‌గా పీజీ విందా సినిమాటోగ్రాఫ‌ర్‌గా వ్య‌వ‌హ‌రిస్తున్నారు.