Virat Kohli: వాహ్.. విరాట్ కోహ్లి.. మెస్సీ ఆడిన వరల్డ్ కప్ ఫైనల్ కంటే ఎక్కువ మంది చూశారు

Virat Kohli: విరాట్ కోహ్లియా మజాకా. ఒకప్పుడు క్రికెట్ లో సచిన్ బ్యాటింగ్ చేస్తుంటే ప్రపంచమంతా నిలిచిపోయేది అంటుండేవారు. ఇప్పుడు కెరీర్ లోనే టాప్ ఫామ్ లో ఉన్న కోహ్లి ఆడుతుంటే ప్రపంచం అలాగే ఆగిపోతోంది. వరల్డ్ కప్ 2023లో భాగంగా ధర్మశాలలో న్యూజిలాండ్ పై కోహ్లి ఆడిన ఇన్నింగ్స్ చూడటానికి టీవీ ముందు అభిమానులు ఎగబడ్డారు.

గతేడాది అర్జెంటీనా, ఫ్రాన్స్ ఆడిన ఫుట్‌బాల్ వరల్డ్ కప్ కంటే కూడా ఎక్కువ మంది కోహ్లి ఆటను చూడటం విశేషం. ఆ వరల్డ్ కప్ ఫైనల్లో మెస్సీ, ఎంబాపెలాంటి స్టార్ సాకర్ ప్లేయర్స్ ఉన్నారు. అలాంటి వాళ్లనూ విరాట్ మించిపోయాడు. కోహ్లి ఆడుతున్న సమయంలో డిస్నీ ప్లస్ హాట్‌స్టార్ లో ఒకేసారి 4.3 కోట్ల వ్యూస్ వచ్చాయి. ఏకకాలంలో ఇన్ని వ్యూస్ రావడం ప్రపంచంలోనే తొలిసారి.

ఈ విషయాన్ని హాట్ స్టార్ సోషల్ మీడియా ఎక్స్ ద్వారా వెల్లడించింది. గతేడాది వరల్డ్ కప్ ఫైనల్ ను జియో సినిమా యాప్ ద్వారా ఇండియాలో 3.2 కోట్ల మంది చూశారు. ఇప్పుడు అంతకంటే కోటి మంది ఎక్కువే కావడం విశేషం. న్యూజిలాండ్ తో జరిగిన ఈ మ్యాచ్ లోనూ ఇండియా విజయం సాధించిన విషయం తెలిసిందే. చేజింగ్ కింగ్ కోహ్లి తృటిలో సెంచరీ చేజార్చుకున్నా.. 95 పరుగులతో విజయంలో కీలకపాత్ర పోషించాడు.

ఇప్పటికే వన్డేల్లో 48 సెంచరీలు చేసిన కోహ్లి.. ఈ మ్యాచ్ లో సెంచరీ చేసి ఉంటే సచిన్ 49 సెంచరీల రికార్డును సమం చేసేవాడు. బంగ్లాదేశ్ తో మ్యాచ్ లో కోహ్లి సెంచరీకి రాహుల్ సహకరించినట్లే.. ఈ మ్యాచ్ లోనూ అతని సెంచరీకి జడేజా సహకరించినా.. సెంచరీకి 5 పరుగుల దూరంలో ఉన్నప్పుడు భారీ షాట్ ఆడటానికి ప్రయత్నించి ఔటయ్యాడు.

వరల్డ్ కప్ లో టాప్ ఫామ్ లో ఉన్న విరాట్.. ప్రస్తుతం 354 పరుగులతో టాప్ స్కోరర్ గా ఉన్నాడు. ఇప్పటికే ఐదు మ్యాచ్ లలో ఒక సెంచరీ, మూడు హాఫ్ సెంచరీలు చేయడం విశేషం. అతనితోపాటు కెప్టెన్ రోహిత్ దూకుడైన ఆటతీరు.. సమష్టిగా రాణిస్తున్న బౌలర్లు ఇండియాకు స్వదేశంలో వరల్డ్ కప్ పై ఆశలు రేపుతున్నాయి.