Journalist Yogi Reddy : వరంగల్ లో యువ జర్నలిస్ట్​ఆత్మహత్య, కూతురుకు ఉరేసి తానూ సూసైడ్​

Journalist Yogi Reddy : నిత్యం ప్రజా సమస్యలపై పోరాటం చేసే ఓ యువ జర్నలిస్ట్​ అర్థాంతరంగా తనువు చాలించాడు. తొమ్మిదేళ్ల తన కూతురుకు ఉరేసి, తానూ ఉరి పెట్టుకుని చనిపోయాడు. తన వ్యక్తిగత ఆఫీస్​రూమ్​లో ఇంతటి దారుణానికి పాల్పడగా, ఓరుగల్లు జర్నలిస్టు వర్గాల్లో తీవ్ర విషాదం నెలకొంది. ఘటనకు సంబంధించిన పూర్తి వివరాలు ఇలా ఉన్నాయి. జనగామ జిల్లా లింగాల ఘనపురం మండలం వనపర్తి గ్రామానికి చెందిన గట్టికొప్పుల యుగంధర్​ రెడ్డి అలియాస్​ యోగి (38) కెమెరా మెన్​ గా మీడియాలోకి ఎంట్రీ ఇచ్చాడు. ఆయనకు భార్య స్వప్న, కూతురు ఆద్యా రెడ్డి(9) ఉన్నారు. కాగా ఓ ప్రముఖ యూ ట్యూబ్​ఛానల్లో స్టాఫ్​ రిపోర్టర్​గా పనిచేసిన యోగి.. రెండు నెలల నుంచి ఖాళీగా ఉంటున్నాడు. ఈ క్రమంలోనే కొద్దిరోజుల కిందట హనుమకొండ బాల సముద్రంలోని ఏకశిలా పార్కు ఎదురుగా ఓ ఇంట్లో రూమ్​ అద్దెకు తీసుకుని తన సొంతంగా ఆఫీస్​రన్​చేస్తున్నాడు.

నక్కలగుట్టలోని ఓ ప్రైవేటు స్కూల్ లో నాలుగో తరగతి చదువుతున్న తన కూతురు ఆద్యాను శుక్రవారం ఉదయం యోగి బయటకు తీసుకుని వెళ్లాడు. సాయంత్రమైనా ఇంటికి చేరకపోవడంతో స్వప్న వారికి చాలాసార్లు ఫోన్​ ట్రై చేసింది. కానీ లిఫ్ట్​ చేయకపోవడంతో స్వప్న యోగితో కలిసి ఉండే మిత్రులకు ఫోన్​చేసి సమాచారం ఇచ్చింది. ఆ తరువాత సాయంత్రం సమయంలో ఆఫీస్​ కు వెళ్లినట్టు తెలుసుకుని అక్కడికి వెళ్లి చూడగా.. అప్పటికే ఆఫీస్​ కు డోర్ వేసి కనిపించింది. కిటికీలోంచి చూడటంతో యోగి, మరో వైపు ఆద్యా చీరకు ఉరి వేసుకుని కనిపించడంతో వాళ్లంతా ఒక్కసారిగా షాక్​ అయ్యారు. వెంటనే తలుపులు తొలగించి యోగి, ఆద్యాను కిందికి దించి చూడగా, అప్పటికే యోగి ప్రాణాలు కోల్పోయి కనిపించాడు. ఆద్యా కొన ఊపిరితో ఉన్నట్టు గ్రహించి, హుటాహుటిన బాలసముద్రంలోని ఓ ప్రైవేటు ఆసుపత్రికి తరలించగా, పరీక్షించిన డాక్టర్లు చిన్నారి కూడా మరణించినట్లు నిర్ధారించారు.

కూతురంటే ప్రాణం..!

యోగి రెడ్డికి తన కూతురంటే ఎంతో ప్రేమ. ఆద్యా కూడా తండ్రి అడుగుజాడల్లోనే మెదులుతూ వస్తోంది. ప్రతి విషయంలోనూ తండ్రినే ఫాలో అయ్యేది. ఈ క్రమంలోనే ఇద్దరి మనస్తత్వం కూడా ఒకేలా ఉండేదని వారి సన్నిహితులు చెబుతున్నారు. ఇదిలా ఉంటే దాదాపు రెండు నెలల కిందట యూ ట్యూబ్​ ఛానల్​ లో ఉద్యోగం మానేసిన యోగి.. ప్రస్తుతం ఖాళీగా ఉంటున్నాడు. ఈ క్రమంలోనే ఇతర ఛానల్స్​ లో ప్రయత్నాలు చేస్తున్నాడు. కాగా ఓ వైపు ఇంటి అద్దె భారం, మరో వైపు ప్రస్తుతం వేతనం లేకపోవడంతో ఆర్థిక ఇబ్బందులు తలెత్తినట్లు తెలిసింది. ఈ క్రమంలోనే తాను ఆత్మహత్య చేసుకునేందుకు నిర్ణయించుకున్నట్లు తెలుస్తోంది. తాను చనిపోతే తాను ప్రాణంగా చూసుకునే కూతురు ఆద్యా రెడ్డి భవిష్యత్తు ఎలా ఉంటుందోనని భయపడి పోయిన యోగి.. ముందుగా కూతురుకు ఉరివేశాడు. ఆ తరువాత ఆయనా అదే చీరతో ఉరి వేసుకుని ప్రాణాలు తీసుకున్నాడు.

అనతికాలంలోనే ఫైర్​ఉన్న జర్నలిస్ట్​ గా..

కొంతకాలం వివిధ మీడియా సంస్థల్లో కెమెరా మెన్​ గా పనిచేశాడు యోగి. ఆ తరువాత ఓ పేరు గాంచిన యూట్యూబ్​ ఛానల్​ లో స్టాఫ్​ రిపోర్టర్​ గా చేరాడు. ఈ క్రమంలోనే ప్రభుత్వాల ప్రజావ్యతిరేక విధానాలు, క్షేత్రస్థాయిలో ప్రజల సమస్యలు, విద్యా, వైద్య రంగాలు, తదితర సామాజిక సమస్యలపై తనదైన శైలిలో గళం విప్పేవాడు. దీంతో అనతికాలంలోనే ఓరుగల్లు జర్నలిస్టుల్లో తనకూ ఓ గుర్తింపు తెచ్చుకున్నాడు. ప్రజా సమస్యలపై ప్రశ్నించే వ్యక్తిగా జనాల్లోనూ మంచి పేరు సంపాదించాడు. సీనియర్ జర్నలిస్టుల ప్రశంసలు కూడా అందుకున్నాడు.

స్వగ్రామంలో అంత్యక్రియలు

యోగి కుటుంబంతో కలిసి బాలసముద్రంలోని ఓ అద్దె ఇంట్లో ఉంటున్నాడు. ఆయన మరణించిన విషయం తెలిసిన తరువాత ఇంటి యజమానులు అక్కడ అంత్యక్రియలు నిర్వహించుకునేందుకు నిరాకరించారు. వారి ఇంట్లో ఓ శుభకార్యం ఉండటంతో అంత్యక్రియలకు అభ్యంతరం చెప్పినట్లు తెలిసింది. కాగా శనివారం ఉదయం పోస్టుమార్టం అనంతరం యోగి, ఆద్యా రెడ్డి డెడ్​ బాడీలను బాలసముద్రంలోని వరంగల్ ప్రెస్ క్లబ్​ కు తరలించారు. అక్కడ జర్నలిస్టులంతా నివాళులర్పించిన అనంతరం యోగి స్వగ్రామం జనగామ జిల్లా వనపర్తి గ్రామానికి తీసుకెళ్లారు. కాగా సాటి జర్నలిస్టుల అశ్రు నయనాల నడుమ యోగి, ఆయన కూతురు ఆద్యారెడ్డి అంతిమ యాత్ర నిర్వహించారు.

తీవ్ర విషాదంలో జర్నలిస్ట్​ లోకం

అందరితో కలివిడిగా ఉండే జర్నలిస్ట్​ యోగి.. అర్థాంతరంగా తనువు చాలించడంతో ఓరుగల్లు జర్నలిస్టు వర్గాల్లో తీవ్ర విషాదం నెలకొంది. కాగా ఆర్థిక ఇబ్బందుల వల్లే యోగిలాంటి నిఖార్సైన జర్నలిస్ట్​ ప్రాణాలు కోల్పోయాడని, ఎన్నో ఏళ్లుగా పని చేస్తున్న జర్నలిస్టులకు ప్రభుత్వం అండగా నిలవకపోవడం కూడా యోగి ఆత్యహత్యకు కారణమని వివిధ జర్నలిస్ట్​ సంఘాల నాయకులు అభిప్రాయపడ్డారు. జర్నలిస్టులకు ఇళ్లు, ప్లాట్లు ఇస్తామని నమ్మిస్తూ వస్తున్న ప్రభుత్వాలు.. జర్నలిస్టుల ఆకలి చావులకు కారణమవుతున్నాయని మండిపడ్డారు. ఇప్పటికే ఎంతో మంది జర్నలిస్టులు గూడు లేక ఇబ్బందులు పడుతున్నారని, ఇకనైనా ప్రభుత్వం కలగ జేసుకుని వర్కింగ్​ జర్నలిస్టులకు ఇళ్లు కట్టించి ఇవ్వాలని డిమాండ్​ చేశారు.

(రిపోర్టింగ్: హిందుస్థాన్ టైమ్స్ తెలుగు, వరంగల్ ప్రతినిధి)