TG LAWCET 2024 Updates : లాసెట్ సెకండ్ ఫేజ్ కౌన్సెలింగ్ షెడ్యూల్ విడుదల - ఈనెల 17 నుంచి రిజిస్ట్రేషన్లు, ముఖ్య తేదీలివే

తెలంగాణ లాసెట్‌ 2024 ప్రవేశాలకు సంబంధించి అధికారులు కీలక ప్రకటన చేశారు. మొదటి విడత కౌన్సెలింగ్ పూర్తి కాగా… తాజాగా సెకండ్ ఫేజ్ కౌన్సెలింగ్ షెడ్యూల్ ను విడుదల చేశారు. ఈ విడతకు సంబంధించిన ఆన్ లైన్ రిజిస్ట్రేషన్లు సెప్టెంబర్ 17వ తేదీ నుంచి ప్రారంభం కానున్నాయి. సెప్టెంబర్ 21వ తేదీతో ఈ గడువు ముగుస్తుంది.

సెప్టెంబర్ 17 నుంచి 21వ తేదీల మధ్యనే ఆన్ లైన్ సర్టిఫికెట్ వెరిఫికేషన్ పూర్తి అవుతుంది.సెప్టెంబర్ 23వ తేదీ నుంచి వెబ్ ఆప్షన్లను ఎంచుకోవాలి. ఈ గడువు 24వ తేదీతో పూర్తి అవుతుంది. సెప్టెంబర్ 25వ తేదీన వెబ్ ఆప్షన్లను ఎడిట్ చేసుకోవచ్చు. సెప్టెంబర్ 30వ తేదీన రెండో విడత సీట్లను కేటాయిస్తారు.

సెకండ్ ఫేజ్ లో సీట్లు పొందిన విద్యార్థులు అక్టోబర్ 1 నుంచి 4 తేదీలోపు ఆయా కాలేజీల్లో రిపోర్ట్ చేయాలి. https://lawcet.tsche.ac.in/ వెబ్ సైట్ లోకి వెళ్లి ఈ ప్రాసెస్ ను పూర్తి చేసుకోవచ్చు.

ఈ ఏడాది జరిగిన తెలంగాణ లాసెట్ పరీక్షకు 40,268 మంది హాజరయ్యారు. వీరిలో 29,258 మంది అర్హత సాధించారు. మొత్తంగా 72.66 శాతం మంది అభ్యర్థులు ఉత్తీర్ణులు అయ్యారు. పరీక్ష రాసిన అభ్యర్థులు https://lawcet.tsche.ac.in/ వెబ్ సైట్ లోకి వెళ్లి రిజల్ట్స్ ను చెక్ చేసుకోవచ్చు.

లాసెట్ ర్యాంక్ కార్డు ఇలా డౌన్లోడ్ చేసుకోండి:

• తెలంగాణ లాసెట్ పరీక్ష రాసిన అభ్యర్థులు మొదటగా https://lawcet.tsche.ac.in/ వెబ్ సైట్ లోకి వెళ్లాలి.
• Download Rank Card అనే ఆప్షన్ పై క్లిక్ చేయండి.
• Hall Ticket Number, పుట్టిన తేదీని ఎంట్రీ చేయాలి.
• -గెట్ రిజల్ట్స్ అనే ఆప్షన్ పై క్లిక్ చేస్తే మీ స్కోర్ తో పాటు ర్యాంక్ కార్డు డిస్ ప్లే అవుతుంది.
• ప్రింట్ లేదా డౌన్లోడ్ అనే ఆప్షన్ పై క్లిక్ చేసి ర్యాంక్ కార్డు కాపీని పొందవచ్చు.
• అడ్మిషన్ ప్రక్రియలో ర్యాంక్ కార్డు అత్యంత కీలకం.

2024-2025 విద్యా సంవత్సరానికి రాష్ట్రంలోని లా కాలేజీల్లో మూడేళ్లు, ఐదేళ్ల లా కోర్సుల్లో ప్రవేశాలకు ఉస్మానియా యూనివర్సిటీ(Osmania University) TS LAWCET/ TS PGLCET-2024 ను నిర్వహించింది. ఈ ఏడాదికి సంబంధించి జూన్ 3వ తేదీన టీఎస్ లాసెట్ పరీక్షలను నిర్వహించారు. గతేడాదితో పోల్చితే ఈసారి లాసెట్ కు ఎక్కువ దరఖాస్తులు వచ్చాయి.