Sangareddy District : ప్రైవేటు పాఠశాల హాస్టల్ లో విషాదం - మంచం మీద పడి విద్యార్థి మృతి
జహీరాబాద్ లోని ఓ స్కూల్ హాస్టల్ లో విషాదం చోటు చేసుకుంది. పడుకునే మంచం తలపై పడటంతో సాత్విక్ (12) అనే విద్యార్థి ప్రాణాలు కోల్పోయాడు. విద్యార్థి తండ్రి ఫిర్యాదు మేరకు పోలీసులు కేసు నమోదు చేసుకొని దర్యాప్తు చేస్తున్నారు. మరోవైపు స్కూల్ ఎదుట విద్యార్థి సంఘాలు ఆందోళన చేపట్టాయి.
ప్రతిరోజు పడుకునే మంచమే ఆ విద్యార్థి పాలిట యమపాశమైంది. హాస్టల్ గదిలో విద్యార్థులు ఆడుకుంటుండగా ప్రమాదవశాత్తు మంచం తలపై పడి ఓ విద్యార్థి మృతి చెందాడు. ఈ విషాద సంఘటన సంగారెడ్డి జిల్లా జహీరాబాద్ పట్టణంలో చోటుచేసుకుంది.
పోలీసులు తెలిపిన వివరాల ప్రకారం… సంగారెడ్డి జిల్లా జహీరాబాద్ పట్టణంలోని సెవెంత్ డే అడ్వెంటిస్ట్ పాఠశాలలో ఈ ఘటన జరిగింది. కర్ణాటక రాష్ట్రంలోని గుల్బర్గా జిల్లా శివరాంపురం గ్రామానికి చెందిన శ్రీకాంత్- సుమలత దంపతుల కుమారుడు సాత్విక్ (12) హాస్టల్ లో ఉంటూ ఐదో తరగతి చదువుతున్నాడు. ఈ క్రమంలో శనివారం ఉదయం విద్యార్థులు వసతి గృహంలో ముగ్గురు పడుకునే మూడంతస్తుల మంచానికి.. పక్కనున్న మరో మంచానికి మధ్య బట్టలు ఆరేయడానికి తాడును కట్టారు. ఆ తాడుతో విద్యార్థులు ఆడుకుంటుండగా సాత్విక్ పైన కూర్చొని ఉన్నాడు.
మంచం తలపై పడడంతో…
అదే సమయంలో సాత్విక్ మంచం పైనుంచి కిందికి దిగుతున్న క్రమంలో బోర్లా పడిపోయాడు. వెంటనే ఇనుప మంచం సాత్విక్ తల వెనక భాగంలో బలంగా పడడంతో తీవ్రంగా గాయపడ్డాడు. వెంటనే స్కూల్ యాజమాన్యం హుటాహుటిన జహీరాబాద్ ఏరియా ఆస్పత్రికి తరలించారు. అప్పటికే విద్యార్థి చనిపోయినట్లు నిర్ధారించారు. కొడుకు మరణ వార్త తెలుసుకుని ఆసుపత్రికి చేరుకున్న తల్లిదండ్రులు కన్నీరు మున్నీరుగా విలపిస్తున్నారు .
విద్యార్థి సంఘాలు ఆందోళన
విద్యార్థి మృతి విషయం తెలుసుకున్న ఎంఈఓ బస్వరాజ్ ఘటన స్థలాన్ని సందర్శించి వివరాలు సేకరించారు. వసతి గృహంలో విద్యార్థి మృతికి కారణమైన ప్రైవేట్ పాఠశాల యాజమాన్యం పై చర్యలు తీసుకోవాలని ఏబీవీపీ విద్యార్థి నాయకులు ఆందోళనకు దిగారు. యాజమాన్యం నిర్లక్ష్యం వల్లే విద్యార్థి సాత్విక్ మృతి చెందాడని ఆరోపించారు. విద్యార్థి కుటుంబాన్ని ఆదుకోవాలని విద్యార్థి సంఘాల నాయకులూ డిమాండ్ చేశారు. పాఠశాల గేటు దూకి లోపలికి వెళ్లేందుకు ప్రయత్నించడంతో పోలీసులు వారిని అదుపులోకి తీసుకుని పోలీస్ స్టేషన్ కు తరలించారు. విద్యార్థి తండ్రి శ్రీకాంత్ పిర్యాదు మేరకు కేసు నమోదు చేసుకొని దర్యాప్తు చేస్తున్నట్లు ఎస్ఐ తెలిపారు.
రోడ్డు ప్రమాదంలో మరో విద్యార్థి :
స్నేహితుని కలవడానికి బైక్ ఫై వెళ్తుండగా ప్రమాదవశాత్తు అదుపుతప్పి ఎంబీఏ విద్యార్థి మృతి చెందాడు. ఈ ఘటన సుచిత్ర సమీపంలో చోటుచేసుకుంది. వివరాల ప్రకారం మెదక్ జిల్లా వెల్దుర్తి మండలం ఆరెగూడెం గ్రామానికి చెందిన అన్నవరం మహిపాల్ రెడ్డి కుటుంబంతో కలిసి హైదరాబాద్ సుచిత్ర సమీపంలో నివాసం ఉంటున్నాడు. అతని కుమారుడు కిషోర్ రెడ్డి (24) ఉన్నత చదువులకు విదేశాలకు వెళ్లి గత నెలలో తిరిగొచ్చాడు.
ఈ క్రమంలో శనివారం అల్వాల్ లో ఉంటున్న స్నేహితుడిని కలవడానికి బైక్ పై బయల్దేరాడు. మార్గమధ్యలో ద్విచక్ర వాహనం అదుపుతప్పి కింద పడిపోయాడు. ఈ ప్రమాదంలో తలకు తీవ్ర గాయాలై కిషోర్ అక్కడికక్కడే మృతి చెందాడు. కుటుంబీకుల ఫిర్యాదుతో కేసు నమోదు చేసుకున్న పోలీసులు దర్యాప్తు చేస్తున్నట్లు తెలిపారు.
