Ind vs WI: టీమిండియా వైల్డ్‌ సెలబ్రేషన్స్‌.. ఇషాన్‌ కిషన్‌ను బాదేశారు.. వీడియో

పోర్ట్‌ ఆఫ్‌ స్పెయిన్‌: స్టార్‌ ప్లేయర్స్‌ లేకపోయినా విండీస్‌ గడ్డపై యంగిండియా అద్భుతమే చేసింది. ఆ టీమ్‌పై మరో వన్డే మిగిలి ఉండగానే మూడు వన్డేల సిరీస్‌లో తిరుగులేని 2-0 లీడ్‌లోకి దూసుకెళ్లింది. తొలి వన్డేలో కెప్టెన్‌ శిఖర్‌ ధావన్‌ టీమ్‌ను ముందుండి నడపగా.. రెండో వన్డేలో అక్షర్‌ పటేల్‌ బ్యాటింగ్ మెరుపులు అసాధారణమైన విజయాన్ని సాధించిపెట్టాయి.

ఈ రెండు మ్యాచ్‌లో చివరి ఓవర్‌ వరకూ ఎంతో ఉత్కంఠ రేపి చివరికి విజయం ఇండియాను వరించింది. ఆదివారం మ్యాచ్‌లో అయితే ఏకంగా 312 రన్స్‌ టార్గెట్‌ను ఇండియా చేజ్‌ చేయడం విశేషం. ఈ గెలుపుతో సిరీస్‌ కూడా సొంతం కావడంతో డ్రెస్సింగ్‌ రూమ్‌లో సెలబ్రేషన్స్‌ ఓ రేంజ్‌లో సాగాయి. ఈ సెలబ్రేషన్స్‌లోనూ కెప్టెన్‌ శిఖర్‌ ధావన్‌ టీమ్‌ను ముందుండి నడిపించాడు.

ఓ సెల్ఫీ వీడియోలో టీమిండియా వైల్డ్‌ సెలబ్రేషన్స్‌ మనం చూడొచ్చు. ఈ వీడియోను ధావన్‌ తన ట్విటర్‌లో షేర్‌ చేశాడు. చివర్లో అందరూ కలిసి వికెట్‌ కీపర్‌ ఇషాన్‌ కిషన్‌ను సరదాగా బాదడం కూడా ఈ వీడియోలో కనిపిస్తుంది. టాలెంట్‌ మ్యాచ్‌ను గెలిపిస్తుందేమోగానీ.. టీమ్‌ వర్క్‌, ఇంటెలిజెన్స్‌ ఛాంపియన్‌షిప్‌ అందిస్తుంది అని ధావన్‌ ఈ వీడియోకు క్యాప్షన్‌ ఉంచాడు.

చివరి వన్డే కూడా ఇదే గ్రౌండ్‌లో బుధవారం జరుగుతుంది. ఆ మ్యాచ్‌లోనూ గెలిచి సిరీస్‌ క్లీన్‌స్వీప్‌ చేయాలని ఇండియన్‌ టీమ్‌ చూస్తోంది. ఈ మధ్యే రోహిత్‌, బుమ్రా, కోహ్లిలాంటి స్టార్లున్న టీమ్‌ ఇంగ్లండ్‌పై వన్డే సిరీస్‌ గెలవగా.. ఇప్పుడు వాళ్లెవరూ లేకపోయినా విండీస్‌ గడ్డపై మరో సిరీస్‌ గెలిచింది ఈ టీమిండియా.