RRB Technician Recruitment: ఆర్ఆర్బీ టెక్నీషియన్ రిక్రూట్మెంట్ అప్లికేషన్ విండో రీ ఓపెన్; ఎందుకంటే?

RRB Technician Recruitment: ఆర్ఆర్బీ టెక్నీషియన్ పోస్టులకు దరఖాస్తు విండో అక్టోబర్ 2న పున: ప్రారంభం కానుంది. ఈ విండో 2024 అక్టోబర్ 16 వరకు ఓపెన్ గా ఉంటుందని రైల్వే రిక్రూట్మెంట్ బోర్డు (RRB) ప్రకటించింది. ఈ విండో ద్వారా ఇప్పటికే అప్లై చేసిన వారు తమ దరఖాస్తులో ఏవైనా తప్పొప్పులు ఉంటే సరి చేసుకోవచ్చు. లేదా, ఇప్పటివరకు అప్లై చేయని వారు అప్లై చేసుకోవచ్చు.

ఖాళీలు పెరుగుతున్నందున..

ఈ పోస్ట్ లకు సంబంధించిన ఖాళీలు పెరుగుతున్నందున ఆర్ఆర్బీ టెక్నీషియన్ 2024 అప్లికేషన్ విండో తిరిగి తెరవాలని ఆర్ఆర్బీ నిర్ణయించింది. ఆర్ఆర్బిలు తమ అధికారిక వెబ్సైట్లలో ఈ నోటిఫికేషన్ (RRB Technician Recruitment) జారీ చేశాయి. ఇందులో కొత్త అభ్యర్థులకు, అలాగే, ఇప్పటికే ఉన్న అభ్యర్థులకు ముఖ్యమైన సూచనలు ఉన్నాయి.

అభ్యర్థులకు సూచనలు..

• ఇప్పుడు కొత్తగా ఏదైనా ఒకటి లేదా అంతకంటే ఎక్కువ కేటగిరీలకు దరఖాస్తు చేసుకుని అవసరమైన ఫీజు చెల్లించిన అభ్యర్థులను ప్రస్తుత అభ్యర్థులుగా పరిగణిస్తారు.
• ఇప్పటికే దరఖాస్తు చేసుకున్న అభ్యర్థులు ఎలాంటి అదనపు రుసుము చెల్లించకుండా ఈ విండో ద్వారా అవసరమైన మార్పులు చేయవచ్చు. ఇప్పటికే కొన్ని కేటగిరీలకు దరఖాస్తు చేసుకున్న అభ్యర్థులు.. కొత్తగా చేర్చిన కేటగిరీలకు దరఖాస్తు చేసుకోవచ్చు. లేదా గతంలో ఎంచుకున్న కేటగిరీలను సవరించవచ్చు.
• ప్రస్తుతం ఉన్న అభ్యర్థులకు విద్యార్హతలను సవరించడం, ఫొటోలు, సంతకాలను తిరిగి అప్లోడ్ చేయడం, ఆర్ఆర్బీ, పోస్ట్ ప్రిఫరెన్సెస్ మార్చుకునే వెసులుబాటు ఉంటుంది.
• ప్రస్తుతం ఉన్న అభ్యర్థులు కొత్తగా దరఖాస్తులు సమర్పించాల్సిన అవసరం లేదు.

కొత్తగా ఈ కేటగిరీల్లో పోస్ట్ లు

కేటగిరీ 1 (టెక్నీషియన్ గ్రేడ్ 1 సిగ్నల్) పోస్టుకు దరఖాస్తు చేసి ఫీజు చెల్లించని వారు, టెక్నీషియన్ గ్రేడ్ 3 పోస్టుకు దరఖాస్తు చేసుకోని వారు, సీఈఎన్ 02/2024 కింద టెక్నీషియన్ కోసం కాకుండా ఈ ఏడాది ఆర్ఆర్బీ (RRB) లు నిర్వహించిన ఇతర రిక్రూట్మెంట్ డ్రైవ్లకు దరఖాస్తు చేసుకున్నవారు, గతంలో రిక్రూట్మెంట్ డ్రైవ్ కు దరఖాస్తు చేసుకోని వారిని కొత్త అభ్యర్థులుగా పరిగణిస్తారు. రీ ఓపెన్ చేసిన అప్లికేషన్ విండోలో 2 నుంచి 40 కేటగిరీల కింద టెక్నీషియన్ పోస్టులకు కొత్త అభ్యర్థులు దరఖాస్తు చేసుకోవచ్చు.

అక్టోబర్ 21వరకు..

కొత్త అభ్యర్థులు తమ దరఖాస్తు ఫారాలను సవరించడానికి అక్టోబర్ 17 నుండి 21 వరకు మరో విండో లభిస్తుంది. కొత్త అభ్యర్థులు ఎంప్లాయిమెంట్ నోటిఫికేషన్ లో పేర్కొన్న షరతులకు అనుగుణంగా తమ ఫారాలను ఎడిట్ చేసుకోవచ్చు. విద్యార్హత, జోన్, పోస్ట్ ప్రిఫరెన్సెస్, ఫొటో, సంతకం వంటి ఎడిట్ విండోలో ప్రస్తుత అభ్యర్థులకు పరిమిత ప్రాప్యత ఉంటుంది. ఆర్ఆర్బీ టెక్నీషియన్ రిక్రూట్మెంట్ దరఖాస్తు ఫీజు ఎస్సీ, ఎస్టీ, మహిళా, ట్రాన్స్జెండర్, ఈడబ్ల్యూఎస్ అభ్యర్థులకు రూ.250, ఇతర అభ్యర్థులకు రూ.500గా ఉంటుంది.

హెల్ప్ లైన్స్

ఆర్ఆర్బీ టెక్నీషియన్ రిక్రూట్మెంట్ కు సంబంధించి ఏదైనా సహాయం కోసం, అభ్యర్థులు హెల్ప్ డెస్క్ నంబర్లు - 9592011188, లేదా 01725653333 ఉదయం 10 గంటల నుండి సాయంత్రం 5 గంటల మధ్య సంప్రదించవచ్చు. వారు rrb.help@csc.gov.in ఐడీకి ఇమెయిల్ కూడా చేయవచ్చు.