Rahul Gandhi ED case : 10గంటల పాటు విచారణ.. నేడు కూడా..!

Rahul Gandhi ED case : నేషనల్​ హెరాల్డ్​ కేసులో భాగంగా కాంగ్రెస్​ సీనియర్​ నేత రాహుల్​ గాంధీని.. సోమవారం 10గంటలకుపైగా విచారించింది ఈడీ. మంగళవారం కూడా విచారణహకు హాజరు కావాలని ఈడీ అధికారులు.. రాహుల్​కు చెప్పినట్టు సమాచారం.

దేశవ్యాప్తంగా నిరసనలు చేపట్టిన కాంగ్రెస్​.. రాహుల్​కు మద్దతుగా నిలిచింది. సోమవారం ఉదయం.. భారీ ర్యాలీతో రాహుల్​ గాంధీ.. ఢిల్లీలోని ఈడీ కార్యాలయానికి వెళ్లారు. సీనియర్​ నేతలతో పాటు పార్టీ కార్యకర్తలు.. కేంద్రానికి వ్యతిరేకంగా నినాదాలు చేస్తూ, రాహుల్​కు అండగా నిలిచారు. కాగా.. కాంగ్రెస్​ నిరసనలకు ఢిల్లీ పోలీసులు అనుమతివ్వలేదు. ఈ క్రమంలోనే పలు చోట్ల ఉద్రిక్త వాతావరణం నెలకొనగా.. పోలీసుల చర్యలతో పలువురు కాంగ్రెస్​ సీనియర్​ నేతలకు గాయాలైనట్టు సమాచారం.

ఇక ఉదయం 11గంటలకు ఈడీ కార్యాలయం లోపలికి వెళ్లిన రాహుల్​ గాంధీ.. బయటకు వచ్చేసరికి రాత్రి 11గంటలు దాటింది! మధ్యలో 80 నిమిషాల లంచ్​ బ్రేక్​ ఇచ్చారు. ఈ సమయంలో.. ఆసుపత్రిలో చికిత్స పొందుతున్న తన తల్లి, కాంగ్రెస్​ అధ్యక్షురాలు సోనియా గాంధీని రాహుల్​ కలిసినట్టు తెలుస్తోంది.

రాహుల్​ గాంధీపై ఈడీ విచారణ నేపథ్యంలో కేంద్రంపై మండిపడింది కాంగ్రెస్ పార్టీ​. బీజేపీ విద్వేష రాజకీయాల్లో ఇదొక భాగమని విరుచుకుపడింది. కాంగ్రెస్​ ఆరోపణలను బీజేపీ తిప్పికొట్టింది. చట్టానికి ఎవరూ అతీతం కాదని, విచారణ జరగాలని తేల్చిచెప్పింది.

ఇదీ కేసు..

National Herald case : నేషనల్​ హెరాల్డ్​ వార్తాపత్రికను ఏజేఎల్​(అసోసియేటెడ్​ జర్నల్స్​ లిమిటెడ్​) అనే సంస్థ పబ్లీష్​ చేసేది. కాగా.. నేషనల్​ హెరాల్డ్​ మాతృసంస్థగా యంగ్​ ఇండియా వ్యవహరించింది. ఈ యంగ్​ ఇండియాకు సోనియా, రాహుల్​ గాంధీలు ప్రమోటర్లుగా ఉన్నారు. యంగ్​ ఇండియాలో వీరికి 76శాతం వాటా ఉన్నట్టు తెలుస్తోంది.

యంగ్​ ఇండియాలో భారీ ఆర్థిక అవకతవకలు జరిగినట్టు, ఇందులో సోనియా, రాహుల్​ పాత్రలు ఉన్నట్టు ఈడీ ఆరోపిస్తోంది. ఈ క్రమంలోనే రాహుల్​ గాంధీని విచారించింది.

కాంగ్రెస్​ అధ్యక్షురాలిని కూడా ఈ నెల 23న విచారణకు హాజరుకావాలని పిలుపునిచ్చింది ఈడీ.