Hate crime : 6ఏళ్ల బాలుడిని 26సార్లు పొడిచి చంపిన వృద్ధుడు! ముస్లిం అని..!

US hate crime : అమెరికాలో అత్యంత దారుణ ఘటన వెలుగులోకి వచ్చింది. ఓ 71ఏళ్ల వృద్ధుడు.. ఓ మహిళతో పాటు ఓ బాలుడిపై దాడి చేశాడు. 6ఏళ్ల బాలుడిని కత్తితో 26సార్లు పొడవగా.. అతను ప్రాణాలు కోల్పోయాడు. ఇజ్రాయెల్​- హమాస్​ మధ్య జరుగుతున్న యుద్ధం నేపథ్యంలో ఈ ఘటన జరిగిందని పోలీసులు చెబుతున్నారు.

ఇదీ జరిగింది..

అమెరికాలోని ఇల్లినాయిస్​ ప్రాంతంలో స్థానిక కాలమానం ప్రకారం శనివారం జరిగింది ఈ ఘటన. బాధితులు ముస్లింలు. వారు జోసెఫ్​ జుబా అనే వృద్ధుడి ఇంట్లో అద్దెకు ఉంటున్నారని సమాచారం. మహిళ వయస్సు 32ఏళ్లు. బాలుడి వయస్సు 6ఏళ్లు. పాలిస్తీనియన్​ అమెరికన్​ అని తెలుస్తోంది. మహిళ, బాలుడి మధ్య బంధంపై స్పష్టత లేదు.

కాగా.. ఆ వృద్ధుడు హఠాత్తుగా ఆ ఇంట్లోకి వెళ్లాడు. మహిళ, బాలుడిపై కత్తితో దాడి చేశాడు. మహిళకు తీవ్రమైన గాయాలయ్యాయి. 6ఏళ్ల బాలుడిని 26సార్లు పొడిచాడు. ఫలితంగా అతను ప్రాణాలు కోల్పోయాడు.

Illinois crime news : మరోవైపు.. తీవ్రగాయాలతో పడి ఉన్న మహిళ.. శక్తిని తెచ్చుకుని పోలీసులకు ఫోన్​ చేసింది. ఘటనపై సమాచారం అందుకున్న పోలీసులు.. వెంటనే ఘటనాస్థలానికి పరుగులు తీశారు.

"ఇద్దరు బాధితులను బెడ్​రూమ్​లో గుర్తించాము. వారి శరీరానికి అనేక గాయాలయ్యాయి. ఛాతీ నుంచి రక్తం కారుతూ కనిపించారు," అని పోలీసులు వివరించారు.

బాధితురాలిని ఆసుపత్రికి తరలించారు. ప్రస్తుతం ఆమె అక్కడ చికిత్స పొందుతోంది.

Israel Hamas war : "ఇంటి తలుపు కొట్టాడు. నా గొంతు నులిమి చంపాలని చూశాడు. 'మీ ముస్లింలు చావాలి' అని గట్టిగా అరిచాడు," అని.. ఆసుపత్రిలో చికిత్స పొందుతుండగా.. బాధితురాలు.. బాలుడి తండ్రికి మెసేజ్​ చేసినట్టు పోలీసులు వెల్లడించారు.

కాగా.. బాలుడి మృతదేహానికి పోస్టుమార్టం చేసిన వైద్యులు షాక్​కు గురయ్యారు.

"బాలుడిని చాలా కిరాతకంగా చంపాడు. పోస్టుమార్టం చేస్తుండగా.. అతని కడుపులో నుంచి 7 ఇంచ్​ల బ్లేడ్​తో కూడిన మిలిటరీ స్టైల్​ కత్తిని బయటకు తీశాము," అని వైద్యులు వెల్లడించారు.

Muslim boy killed in US : ఈ ఘటనపై కేసు నమోదు చేసుకున్న పోలీసులు.. నిందితుడిని అరెస్ట్​ చేశారు. ప్రాథమిక దర్యాప్తు చేపట్టిన తర్వాత పలు కీలక విషయాలు వెల్లడించారు.

"ముస్లింలు కావడంతోనే వారిద్దరిపై దాడి జరిగింది. మధ్య ఆసియాలో ఇజ్రాయెల్​- హమాస్​ మధ్య జరుగుతున్న యుద్ధానికి దీనికి లింక్​ ఉందని డిటెక్టివ్​లు నిర్ధరించారు," అని పోలీసులు తెలిపారు.

అమెరికాలో జరిగిన ఈ ద్వేషపూరిత నేరాన్ని ఆ దేశాధ్యక్షుడు జో బైడెన్​ ఖండించారు. "ఇది చాలా దారుణమైన ఘటన," అని అభివర్ణించారు. ఘటనకు సంబంధించిన వార్త విన్న తర్వాత షాక్​కు గురైనట్టు వివరించారు.

"ఇలాంటి ఘటనలకు అమెరికాలో చోటు లేదు. ఇది మనిషి ప్రాథమిక విలువలకు వ్యతిరేకం," అని జో బైడెన్​ అన్నారు. అమెరికావాసులు ఐకమత్యంతో ముందుకొచ్చి.. ఇస్లమఫోబియాను అరికట్టాలని పిలుపునిచ్చారు.