Vj Sunny Sound Party: కామెడీనే న‌మ్ముకున్న బిగ్‌బాస్ విన్న‌ర్ - వీజే స‌న్నీ సౌండ్ పార్టీ రిలీజ్ డేట్ ఇదే!

Vj Sunny Sound Party: బిగ్‌బాస్ విన్న‌ర్ వీజే స‌న్నీ క‌మ‌ర్షియ‌ల్ హిట్ కోసం మ‌రోసారి కామెడీనే న‌మ్ముకున్నాడు. సౌండ్ పార్టీ మూవీతో ఆడియెన్స్‌ను న‌వ్వించేందుకు రెడీ అయ్యాడు. ఔట్ అండ్ ఔట్ ఎంట‌ర్‌టైన‌ర్‌గా తెర‌కెక్కిన సౌండ్ పార్టీ మూవీ న‌వంబ‌ర్ 24న థియేట‌ర్ల‌లో రిలీజ్ కానుంది.

సంజ‌య్ శేరి ద‌ర్శ‌క‌త్వం వ‌హిస్తోన్న ఈ సినిమాలో హ్రితిక శ్రీనివాస్ హీరోయిన్‌గా న‌టిస్తోంది. శుక్ర‌వారం ఈ సినిమా ట్రైల‌ర్‌ను రిలీజ్ చేశారు. ఈ శివ‌న్నారాయ‌ణ‌, వీజే స‌న్నీ పంచ్ డైలాగ్స్‌తో ఈ ట్రైల‌ర్ ఆక‌ట్టుకుంటోంది. అడ్డ దారుల్లో డ‌బ్బు సంపాదించాల‌ని క‌ల‌లు క‌నే తండ్రీకొడుకులుగా వీరిద్ద‌రు ఈ సినిమాలో క‌నిపించ‌బోతున్నారు.

సౌండ్ పార్టీ సినిమాలో ఆలీ, 30 ఇయ‌ర్స్ పృథ్వీ, స‌ప్త‌గిరితో పాటు ప‌లువురు టాలీవుడ్ క‌మెడియ‌న్స్ కీల‌క పాత్ర‌లు పోషించ‌బోతున్నారు. బిగ్‌బాస్ తెలుగు సీజ‌న్ 5 విన్న‌ర్‌గా వీజే స‌న్నీ నిలిచాడు.

ఈ షో ద్వారా యూత్‌లో క్రేజ్ సంపాదించుకున్న వీజే సన్నీ ఈ ఏడాది అన్‌స్టాప‌బుల్ మూవీతో పాటు ఏటీఎమ్ అనే వెబ్‌సిరీస్‌లో న‌టించాడు. అన్‌స్టాప‌బుల్ కూడా కామెడీ క‌థ‌తోనే తెర‌కెక్కింది. కానీ వీజే స‌న్నీకి ఈ సినిమా ఆశించిన రిజ‌ల్ట్ అందివ్వ‌లేక‌పోయింది.

కాగా న‌వంబ‌ర్ 24న వీజే స‌న్నీ సౌండ్ పార్టీతో పాటు శ్రీకాంత్ కోట బొమ్మాళి పీఎస్‌, వైష్ణ‌వ్‌తేజ్ ఆది కేశ‌వ సినిమాలు టాలీవుడ్ బాక్సాఫీస్ వ‌ద్ద పోటీప‌డ‌బోతున్నాయి.