Telugu Movies Releasing This Week: ఈ వారం థియేట‌ర్ల‌లో స్ట్రెయిట్ వ‌ర్సెస్ డ‌బ్బింగ్ మూవీస్‌ పోటీ - ఏడు సినిమాలు రిలీజ్‌

Telugu Movies Releasing This Week: ఈ వారం కొత్త సినిమాల‌తో థియేట‌ర్లు క‌ళ‌క‌ళ‌లాడ‌బోతున్నాయి. ఫిబ్ర‌వ‌రి 23న థియేట‌ర్ల‌లో మొత్తం ఏడు సినిమాలు రిలీజ్ కాబోతున్నాయి. ఐదు స్ట్రెయిట్ సినిమాల‌తో పాటు రెండు డ‌బ్బింగ్ సినిమాలు త తెలుగు ప్రేక్ష‌కుల్ని ప‌ల‌క‌రించ‌బోతున్నాయి. ఆ సినిమాలు ఏవంటే

సుంద‌రం మాస్ట‌ర్‌...

టాలీవుడ్ క‌మెడియ‌న్ వైవా హ‌ర్ష హీరోగా ఎంట్రీ ఇస్తోన్న సుంద‌రం మాస్ట‌ర్ మూవీ ఫిబ్ర‌వ‌రి 23న థియేట‌ర్ల‌లోకి రాబోతోంది. ఔట్ అండ్ ఔట్ ఎంట‌ర్‌టైన‌ర్‌గా తెర‌కెక్కుతోన్న ఈ మూవీకి మాస్ మ‌హారాజా ర‌వితేజ ప్రొడ్యూస‌ర్‌గా వ్య‌వ‌హ‌రిస్తోన్నాడు.

సుధీర్‌కుమార్ తో క‌లిసి ర‌వితేజ ఈ మూవీని నిర్మించాడు. ఓ గిరిజ‌న‌ ప్రాంతానికి ఇంగ్లీష్ టీచ‌ర్‌గా వెళ్లిన యువ‌కుడి క‌థ‌తో ద‌ర్శ‌కుడు క‌ళ్యాణ్ సంతోష్ సుంద‌రం మాస్ట‌ర్ మూవీని తెర‌కెక్కించాడు. ఈ వారం రిలీజ్ అవుతోన్న సినిమాల్లో సుంద‌రం మాస్ట‌ర్‌పైనే తెలుగు ఆడియెన్స్‌లో ఎక్కువ‌గా క్రేజ్ నెల‌కొంది. సుంద‌రం మాస్ట‌ర్ సినిమాలో దివ్య శ్రీపాద హీరోయిన్‌గా న‌టించింది.

సిద్ధార్థ్ రాయ్‌...

ట్రైల‌ర్‌, టీజ‌ర్స్‌తో అర్జున్‌రెడ్డి, యానిమ‌ల్ సినిమాల‌ను గుర్తుకుతెచ్చిన సిద్ధార్థ్ రాయ్‌ ఫిబ్ర‌వ‌రి 23న రిలీజ్ అవుతోంది. దీప‌క్ స‌రోజ్ హీరోగా ఎంట్రీ ఇస్తోన్న ఈ మూవీకి య‌శ‌స్వి ద‌ర్శ‌క‌త్వం వ‌హిస్తున్నాడు. త‌న్వి నేగి హీరోయిన్‌గా న‌టిస్తోంది. అర్జున్ రెడ్డి ఫేమ్ ర‌ధ‌న్ ఈ మూవీకి మ్యూజిక్ అందిస్తోన్నాడు. యూత్ ఆడియెన్స్‌ను టార్గెట్ చేస్తూ ఈ మూవీ తెర‌కెక్కిన‌ట్లు క‌నిపిస్తోంది.

మ‌స్తు షేడ్స్ ఉన్నాయ్ రా...

ఈ న‌గ‌రానికి ఏమైంది ఫేమ్ అభిన‌వ్ గోమ‌ఠం హీరోగా ఎంట్రీ ఇస్తోన్న మ‌స్తు షేడ్స్ ఉన్నాయ్ రా మూవీ ఈ వారమే తెలుగు ప్రేక్ష‌కుల ముందుకు రాబోతోంది. ఈ న‌గ‌రానికి ఏమైందిలో అభిన‌వ్ చెప్పిన డైలాగ్‌నే టైటిల్‌కు ఫిక్స్ చేస్తూ తెర‌కెక్కిన ఈ మూవీకి తిరుప‌తిరావు ఇండ్ల ద‌ర్శ‌క‌త్వం వ‌హిస్తున్నారు. ల‌వ్ ఎంట‌ర్‌టైన‌ర్‌గా తెర‌కెక్కుతోన్న ఈ సినిమాలో వైశాలిరాజ్ హీరోయిన్‌గా న‌టిస్తోంది.

ఈ మూడు సినిమాల‌తో పాటు ముఖ్య‌గ‌మ‌నిక‌, గ్రౌండ్ సినిమాలు కూడా ఈ వారం తెలుగు ప్రేక్ష‌కుల్ని ప‌ల‌క‌రించ‌బోతున్నాయి.

డ‌బ్బింగ్ సినిమాలు...

మ‌మ్ముట్టి హీరోగా న‌టించిన మ‌ల‌యాళం మూవీ భ్ర‌మ‌యుగం ఫిబ్ర‌వ‌రి 23న తెలుగులో విడుద‌ల‌ అవుతోంది. ఈ సినిమాను సితార ఎంట‌ర్‌టైన్‌మెంట్స్ సంస్థ తెలుగులో రిలీజ్ చేస్తోంది. మ‌ల‌యాళంలో గ‌త వారం రిలీజైన ఈ మూవీ మ‌మ్ముట్టి కెరీర్‌లో హ‌య్యెస్ట్ క‌లెక్ష‌న్స్ రాబ‌ట్టిన మూవీస్‌లో ఒక‌టిగా నిలిచింది. హార‌ర్ క‌థాంశంతో తెర‌కెక్కిన ఈ మూవీకి రాహుల్ స‌దాశివ‌న్ ద‌ర్శ‌క‌త్వం వ‌హించాడు. కంప్లీట్‌గా బ్లాక్ అండ్ వైట్‌లో మూడు పాత్ర‌ల‌తో ప్ర‌యోగాత్మ‌కంగా ఈ మూవీని తెర‌కెక్కించారు.

జ‌యం ర‌వి సైర‌న్‌

జ‌యం ర‌వి, అనుప‌మ ప‌ర‌మేశ్వ‌ర‌న్‌, కీర్తిసురేష్ హీరోహీరోయిన్లుగా న‌టించిన త‌మిళ డ‌బ్బింగ్ మూవీ సైర‌న్ కూడా ఈ శుక్ర‌వార‌మే తెలుగు ప్రేక్ష‌కుల్ని ప‌ల‌క‌రించ‌బోతున్న‌ది. త‌న భార్య మ‌ర‌ణానికి కార‌ణ‌మైన వారిపై ఓ అంబులెన్స్ డ్రైవ‌ర్ ఎలా ప్ర‌తీకారం తీర్చుకున్నాడ‌నే క‌థాంశంతో తెర‌కెక్కిన ఈ మూవీకి ఆంటోనీ భాగ్య‌రాజ్ ద‌ర్శ‌క‌త్వం వ‌హించాడు. త‌మిళంలో మిక్స్‌డ్ టాక్‌ను తెచ్చుకున్న ఈ మూవీ తెలుగు ప్రేక్ష‌కుల్ని ఎంత వ‌ర‌కు మెప్పిస్తుంది అన్న‌ది చూడాల్సిందే. ఈ సినిమాలో కీర్తి సురేష్ పోలీస్ ఆఫీస‌ర్ పాత్ర‌లో న‌టించింది.