Rajinikanth: సగర్వంగా జాతీయ జెండాను ఎగురవేయండి.. రజినీ పిలుపు

75వ స్వాతంత్ర్య దినోత్సవం సందర్భంగా దేశవ్యాప్తంగా హర్ ఘర్ తిరంగా ప్రచారం ఊపందుకుంది. ప్రతి ఇంటిపై త్రివర్ణ పతాకాన్ని ఎగురవేయాలని ప్రధాని నరేంద్ర మోదీ ఇచ్చిన పిలుపును అందరూ స్వాగతించాలని, ప్రతి ఒక్కరూ ఈ విధానాన్ని ఆచరించాలని సర్వత్రా క్యాంపైన్ నిర్వహిస్తున్నారు. తాజాగా ఈ జాబితాలో సూపర్ స్టార్ రజినీ కాంత్ కూడా చేరిపోయారు. 75వ స్వాతంత్ర్య దినోత్సవం సందర్భంగా దేశం కోసం ప్రాణాలను త్యాగం చేసిన అమరవీరులను గుర్తు చేసుకుంటూ త్రివర్ణ పతాకాన్ని ఎగురవేయాలని ఆయన కోరారు. ట్విటర్ వేదికగా ఈ మేరకు పోస్టు పెట్టారు.

"భారత దేశానికి ఇది 75వ స్వాతంత్ర్య దినోత్సవం. మన మాృతభూమి స్వేచ్ఛ కోసం నిస్వార్థం తమ జీవితాలను త్యాగం చేసిన వేలాది మంది ప్రజలందరికీ, ఎనలేని పోరాటాలు, కష్టాలు, బాధలు లక్షలాది ప్రజల గౌరవ సూచకంగా నివాళులర్పిద్దాం. అంతేకాకుండా ఐక్యతకు చిహ్నంగా స్వాతంత్ర్య సమరయోధులు, అమరవీరులు, నాయకులందరినీ సత్కరించి కృతజ్ఞతాపూర్వకంగా నివాళులర్పిద్దాం. కుల, మత, రాజకీయాలకు అతీతంగా, మన భారతీయ జెండాను రేపటి తరం చిన్నారులు, యువకులు గర్వపడేలా అందజేద్దాం. ఇళ్లు, కార్యాలయాలు, పని ప్రదేశాల వెలుపల జెండాను ఎగురవేస్తూ 75వ స్వాతంత్ర్య దినోత్సవాన్ని సగర్వంగా జరుపుకుందాం. స్వాతంత్ర్య పోరాట వీరులకు సెల్యూట్ చేస్తూ మన జాతీయ జెండా ప్రతిచోటా రెపరెప లాడిద్దాం. హై హింద్" అటూ రజినీ కాంత్ ట్విటర్ వేదికగా కోరారు.

రజినీకాంత్ ఇప్పటికే తన ట్విటర్ ఖాతా డీపీని జాతీయ జెండా ఉండేట్లు మార్చారు. తాజాగా ఆయన ఇచ్చిన సందేశానికి ప్రజలు, అభిమానులు విపరీతంగా స్పందిస్తున్నారు. రజినీతో పాటు మోహన్ లాల్, అనుపమ్ ఖేర్, అక్షయ్ కుమార్, కంగనా రనౌత్, ఆమీర్ ఖాన్, అమితాబ్ బచ్చన్ తదితరులు తమ ఇళ్ల వద్ద త్రివర్ణ పతాకాలను ఎగురవేశారు.