Dil Raju Review: వీళ్ల సినిమాకు నేను రివ్యూ ఇస్తా.. నిర్మాత దిల్ రాజు షాకింగ్ కామెంట్స్

Dil Raju About Revu Movie Review: వంశీ రామ్ పెండ్యాల, అజయ్, స్వాతి భీమిరెడ్డి, ఏపూరి హరి ప్రధాన పాత్రల్లో నటించిన సినిమా రేవు. ఈ చిత్రాన్ని సంహిత్ ఎంటర్టైన్మెంట్స్ బ్యానర్ పారుపల్లి ప్రొడక్షన్‌పై నిర్మాత డాక్టర్ మురళీ గింజుపల్లి, నవీన్ పారుపల్లి సంయుక్తంగా నిర్మించారు.

నిర్మాణ సూపర్ విజన్‌గా జర్నలిస్ట్ ప్రభు, ఎగ్జిక్యూటివ్ నిర్మాతగా సీనియర్ ఫిలిం జర్నలిస్ట్ పర్వతనేని రాంబాబు వ్యవహరిస్తున్నారు. ఈ చిత్రానికి హరినాథ్ పులి దర్శకత్వం వహించారు. రేవు చిత్రం ఆగస్ట్ 23న రిలీజ్ కానుంది. ఈ క్రమంలో శుక్రవారం నాడు (ఆగస్ట్ 16) రేవు ట్రైలర్‌ను లాంచ్ చేశారు. ఈ మేరకు నిర్వహించిన ఈవెంట్‌లో ప్రముఖ నిర్మాత దిల్ రాజు ముఖ్య అతిథిగా విచ్చేశారు.

రేవు ట్రైలర్ లాంచ్ ఈవెంట్‌లో నిర్మాత దిల్ రాజు మాట్లాడుతూ.. "కొత్త వాళ్లు.. కొత్త వాళ్లతో ప్రయోగం చేస్తూనే ఉంటారు. కానీ 99 శాతం ఫెయిల్యూర్.. వన్ పర్సెంట్ సక్సెస్ ఉంటుంది. మురళీ వంటి వారు కొత్త వాళ్లతో సినిమాను చేశారు. కానీ, ప్రభు, పర్వతనేని రాంబాబు వంటి వారు ఉండటం వల్లే మేం అంతా ఇక్కడకు వచ్చాం" అని అన్నారు.

"ఇలాంటి సినిమాను తీయడం గొప్ప కాదు.. ప్రేక్షకుడ్ని థియేటర్ వరకు తీసుకు రావడం గొప్ప విషయం. రేవు కాన్సెప్ట్ బాగుంది. రాంబాబు, ప్రభు నాకు చాలా మంచి సన్నిహితులు. వారు ఈ చిత్రం గురించి చెప్పారు. వీళ్లు వెనకాల ఉండి ఈ సినిమాను తీశారు కాబట్టి.. నేను ముందుండి నడిపించాలని అనుకున్నాను" అని దిల్ రాజు చెప్పారు.

"కొత్త సినిమాలను, చిన్న సినిమాలను ఎంకరేజ్ చేయడంలో నేను ముందుంటాను. కాబట్టి, ఈ సినిమాకు నా సపోర్ట్ ఉంటుంది. ఇంత వరకు వీళ్లు సినిమాని చూసి రివ్యూ రాశారు. ఇప్పుడు వీళ్లు సినిమాను తీశారు. కాబట్టి వీళ్ల సినిమాని చూసి నేను రివ్యూ రాస్తా. నేను రాయబోయే మొదటి రివ్యూ ఇదే" అని నిర్మాత దిల్ రాజు ఇంట్రెస్టింగ్ కామెంట్స్ చేశారు.

జర్నలిస్ట్ ప్రభు మాట్లాడుతూ.. "సినిమాను నేను చూశాను. దీన్ని ముందుకు ఎలా తీసుకెళ్లాలని అనుకున్నారు. ఆ టైంలోనే ఎన్నారై నిర్మాత మురళీ గారు పరిచయం అయ్యారు. వారు కూడా ఈ సినిమాను చూసి రిలీజ్ చేసేందుకు ముందుకు వచ్చారు. తక్కువ బడ్జెట్‌లోనే, ఉన్న పరిమితులతో ఎంత అద్భుతంగా సినిమాను తీయవచ్చు అనే దానికి ఈ సినిమా ఉదాహరణగా నిలుస్తుంది. డైరెక్టర్ హరినాథ్ అందరి వద్ద నుంచి మంచి అవుట్ పుట్ తీసుకున్నారు. సెన్సార్ వాళ్లు కూడా సినిమాను చూసి మెచ్చుకున్నారు" అని తెలిపారు.

"ఈ చిత్రాన్ని నాకు రాంబాబు గారు, ప్రభు గారు చూపించారు. ఇంత మంచి చిత్రాన్ని నాకు చూపించిన వారికి థాంక్స్. వారి వల్లే నా ఈ సినీ జర్నీ మొదలైంది. రేవు సినిమాలోని ప్రతీ పాత్ర ఆడియెన్స్‌తో పాటుగా ఇంట్లోకి వెళ్తుంది. మా సినిమాను రామ సత్యనారాయణ గారు చూశారు. ఆయనకు చాలా నచ్చింది. డీఎస్ రావు గారు కూడా మా మూవీని చూసి మెచ్చుకున్నారు" అని నిర్మాత మురళీ పేర్కొన్నారు.

"మేం అడిగిన వెంటనే మాకోసం వచ్చిన కోదండ రామిరెడ్డి గారికి థాంక్స్. రేలంగి నరసింహారావు ఎన్నో హిట్ చిత్రాలను ఇచ్చారు. అలాంటి దర్శకుడు మా ఈవెంట్‌కు వచ్చి మమ్మల్ని ఆశీర్వదించడం ఆనందంగా ఉంది. మా ఈ ట్రైలర్ లాంచ్ ఈవెంట్‌కు వచ్చిన వారందరికీ థాంక్స్. ఆగస్ట్ 23న మా చిత్రం రానుంది. అందరూ వీక్షించండి" అని నిర్మాత మురళీ తెలిపారు.