Prabhas | నాగ్ అశ్విన్-ప్రభాస్ మూవీ అప్డేట్.. మేజర్ షెడ్యూల్ పూర్తి

పాన్ఇండియా హీరో ప్రభాస్ వరుసగా సినిమాలు చేస్తూ తెగ బిజీగా ఉన్నాడు. ప్రస్తుతం సలార్, ఆదిపురుష్ చిత్రాలతో తీరిక లేకుండా ఉన్న ఆయన మరోపక్క ఇతర సినిమాలకు కూడా సమయం కేటాయిస్తున్నాడు. మహానటి ఫేమ్ నాగ్ అశ్విన్‌తో 'ప్రాజెక్ట్ కే' అనే సినిమాకు పచ్చజెండా ఊపిన సంగతి తెలిసిందే. తాజాగా ఈ సినిమా గురించి ఆసక్తికర అప్డేట్‌ను బయటపెట్టారు దర్శకుడు. ఈ చిత్రం ఓ మేజర్ షెడ్యూల్ పూర్తి చేసుకున్నట్లు ఆయన స్పష్టం చేశారు. ఓ అభిమాని అడిగిన ప్రశ్నకు సినిమాకు సంబంధించిన అప్డేట్‌ను ట్విటర్ వేదికగా స్పందనను తెలియజేశారు.

"ప్రభాస్ ఇంట్రడక్షన్ సన్నివేశాలతో కూడిన ఓ మేజర్ షెడ్యూల్ పూర్తయింది. జూన్ నెలాఖరు నుంచి కొత్త షెడ్యూల్ ప్రారంభమవుతుంది. రిలీజ్ ఆర్డర్‌లో మనం లాస్ట్ కదా.. తరచుగా అప్డేట్స్ ఇవ్వడానికి ఇంకా సమయం పడుతుంది. నమ్మకంగా ఉండండి. అందరం ప్రాణం పెట్టి పనిచేస్తున్నాం." అని నాగ్ అశ్విన్ ట్విటర్‌లో పేర్కొన్నారు.

'ప్రాజెక్ట్ కే' చిత్రాన్ని 400 కోట్ల భారీ బడ్జెట్‌తో వైజయంతీ మూవీస్ సంస్థ నిర్మిస్తోంది. అమితాబ్, ప్రభాస్, దీపికా పదుకొణె లాంటి భారీ తారాగణం ఇందులో నటిస్తోంది. నాగ్ అశ్విన్ తెరకెక్కిస్తున్న ఈ సినిమా అన్నీ కుదిరితే 2023లో అత్యంత భారీ స్థాయిలో విడుదలయ్యే అవకాశముంది.

సైన్స్ ఫిక్షన్ జోనర్‌లో తెరకెక్కుతున్న ఈ సినిమా సాంకేతికత సహాయం కోసం నాగ్ అశ్విన్ ప్రముఖ వ్యాపారవేత్త ఆనంద మహీంద్రాను సంప్రదించారు. ట్విటర్‌లో ఆయనను ట్యాగ్ చేస్తూ ఆయన మద్దతు కోరారు. అందుకు ఆనంద్ మహీంద్రా కూడా సానుకూలంగా స్పందించి దర్శకుడికి తగిన సహాయం అందేలా తన సిబ్బందిని పురమాయించారు.