Gudumba Shankar: పవన్ కల్యాణ్ ఫ్యాన్స్‌కు గుడ్‍న్యూస్.. ఆ సినిమా మళ్లీ థియేటర్లలోకి! ఈనెలాఖరునే రీ-రిలీజ్

Gudumba Shankar 4K: ప్రస్తుతం టాలీవుడ్‍లో రీ-రిలీజ్‍ల హవా నడుస్తోంది. గతంలో బ్లాక్‍బాస్టర్ అయిన చిత్రాలు మళ్లీ థియేటర్లలోకి వచ్చి అభిమానులను అలరిస్తున్నాయి. మంచి కలెక్షన్లను సాధిస్తున్నాయి. ఆ సూపర్ హిట్ చిత్రాలను వెండి తెరపై చూస్తూ మళ్లీ ఎంజాయ్ చేస్తున్నారు ప్రేక్షకులు. కాగా, పవర్ స్టార్ పవన్ కల్యాణ్ నటించిన మరో సినిమా మళ్లీ థియేటర్లలో రీ-రిలీజ్ అయ్యేందుకు రెడీ అయింది. గుడుంబా శంకర్ చిత్రం 19ఏళ్ల తర్వాత మళ్లీ థియేటర్లలోకి రానుంది.

గుడుంబా శంకర్ సినిమా ఈనెల (ఆగస్టు) 31వ తేదీన థియేటర్లలో రీ-రిలీజ్ కానుంది. ఈ చిత్ర నిర్మాత, పవన్ కల్యాణ్ సోదరుడు నాగబాబు ఈ విషయాన్ని వెల్లడించినట్టు తెలుస్తోంది. పవన్ కల్యాణ్ పుట్టిన రోజు సెప్టెంబర్ 2వ తేదీ కాగా.. దీని కంటే ముందే ఆగస్టు 31వ తేదీన గుడుంబా శంకర్ థియేటర్లలోకి అడుగుపెట్టనుంది. మొత్తంగా గత నెల 28న బ్రో సినిమా రిలీజ్ కాగా.. ఈ నెలలో గుడుంబా శంకర్ చిత్రం రీ-రిలీజ్ అవుతుండడం పవన్ కల్యాణ్ అభిమానులకు గుడ్‍న్యూసే.

గుడుంబా శంకర్ సినిమా 2004 సెప్టెంబర్ 10వ తేదీన రిలీజ్ అయింది. ఈ సినిమాలో పవన్ కల్యాణ్ స్టైల్ అప్పట్లో బాగా పాపులర్ అయింది. ఈ మూవీలో డ్రెస్సింగ్‍తో పవన్ ట్రెండ్ సెట్ చేశారు. పవన్ స్టైల్, స్వాగ్ అభిమానులను విపరీతంగా ఆకట్టుకున్నాయి. డైలాగ్ డెలివరీ, కామెడీ టైమింగ్‍తోనూ పవన్ అదరగొట్టారు. ఈ చిత్రంలో హీరోయిన్ మీరా జాస్మిన్ కూడా అద్భుతంగా చేసింది.

గుడుంబా శంకర్ చిత్రానికి సత్యానంద్ కథను అందించగా.. వీరశంకర్ దర్శకత్వం చేశారు. అంజనా ప్రొడక్షన్స్ బ్యానర్‌పై నాగబాబు నిర్మించారు. స్టార్ మ్యూజిక్ డైరెక్టర్ మణిశర్మ అందించిన సంగీతం ఈ సినిమాకు మరో బలంగా నిలిచింది. ‘చిట్టి నడుమునే చూస్తున్నా’ పాట సూపర్ పాపులర్ అయింది. ఇప్పుడు ఏకంగా 19 సంవత్సరాల తర్వాత మళ్లీ థియేటర్లలో అడుగుపెడుతోంది గుడుంబా శంకర్.

పవన్ కల్యాణ్, సుప్రీం హీరో సాయి ధరమ్ తేజ్ కలిసి నటించిన బ్రో సినిమా జూలై 28న రిలీజ్ అయింది. తొలి వారం మంచి కలెక్షన్లను సాధించింది. ఈ చిత్రంలో వింటేజ్ పవన్ కల్యాణ్‍ను చూసి అభిమానులు సంబరపడుతున్నారు. ఇక తదుపరి ఓజీ, ఉస్తాద్ భగత్ సింగ్ సినిమాలు చేయనున్నారు పవన్.