Bro Teaser - Pawan Kalyan: జ్వరంతోనే డబ్బింగ్ చెప్పిన పవన్ కల్యాణ్.. ఆ మూవీ టీజర్ కోసం..

Bro Teaser - Pawan Kalyan: పవర్ స్టార్ పవన్ కల్యాణ్.. స్వల్ప అనారోగ్యానికి గురయ్యాడు. తన రాజకీయ పార్టీ జనసేన కోసం ఆంధ్రప్రదేశ్‍లో వారాహి యాత్ర చేస్తున్న ఆయనకు జ్వరం వచ్చింది. దీంతో యాత్రకు విరామం తీసుకున్నాడు. అయితే, జ్వరం ఉన్నా కూడా ‘బ్రో’ మూవీ టీజర్ కోసం పవన్ కల్యాణ్ డబ్బింగ్ చెప్పాడు. మెగా యంగ్ హీరో సాయి ధరమ్‍ తేజ్‌తో కలిసి బ్రో మూవీలో పవన్ నటిస్తున్నాడు. మల్టీస్టారర్‌గా రూపొందుతున్న ఈ చిత్రానికి సముద్రఖని దర్శకత్వం వహిస్తున్నాడు. తమిళ మూవీ వినోదయ సిత్రంకు రీమేక్‌గా బ్రో తెరకెక్కుతోంది. ప్రస్తుతం టీజర్ సిద్ధమవుతోంది. కాగా, ఈ టీజర్ కోసం పవన్ డబ్బింగ్ చెప్పాడు. వివరాలివే..

టీజర్‌ను అతిత్వరలో రిలీజ్ చేయనున్నట్టు బ్రో మూవీ యూనిట్ ప్రకటించింది. పవన్ కల్యాణ్, సాయి ధరమ్ తేజ్ పంచె కట్టుకొని మాస్ లుక్‍లో ఉన్న పోస్టర్‌ను పోస్ట్ చేసి టీజర్ అప్‍డేట్ అంటూ వెల్లడించింది. వింటేజ్ లుక్‍లో పవన్ లుక్ అదిరిపోయింది. అయితే, ఈ టీజర్‌లో పవన్ కల్యాణ్ డబ్బింగ్ పార్ట్ పూర్తి కాలేదు. దీంతో టీజర్ ఆలస్యమవుతూ వస్తోంది. అయితే, అనారోగ్యం కారణంగా వారాహి యాత్రకు కాస్త విరామం ఇచ్చిన పవన్.. నేడు డబ్బింగ్ చెప్పాడు. జ్వరంతో ఉన్నా సరే.. డబ్బింగ్ చెప్పాడు. మంగళగిరి జనసేన పార్టీ కార్యాలయంలోనే ఇది జరిగింది. ఈ ఫొటోలను డైరెక్టర్ సముద్రఖని ట్వీట్ చేశాడు. ఈ ఫొటోల్లో పవన్ కాస్త నీరసంగా ఉన్నట్టు కనిపించాడు. బ్రో సినిమా జూలై 28న విడుదల కావాల్సి ఉంది.

పవన్ కల్యాణ్ డబ్బింగ్ తీసుకోవటంతో మరో రెండు, మూడు రోజుల్లో బ్రో టీజర్ విడుదలయ్యే అవకాశం ఉంది. ఈ మూవీలో పవన్.. దేవుడి పాత్రలో కనిపించనున్నాడు. ఇక సాయి ధరమ్ తేజ్‍కు జోడీగా కేతిక శర్మ, ప్రియా ప్రకాశ్ వారియర్ హీరోయిన్లుగా నటిస్తున్నారు. బ్రహ్మానందం, సుబ్బరాజు, రోహిణి, తనికెళ్ల భరణి కనిపించనున్నారు. ఈ చిత్రాన్ని టీజీ విశ్వప్రసాద్, వివేక్ కూచిబోట్ల నిర్మిస్తున్నారు. పీపుల్ మీడియా ఫ్యాక్టరీ పతాకంపై ఈ చిత్రం వస్తోంది. ఎస్ థమన్ సంగీతం అందిస్తున్నాడు.

మరోవైపు, సుజీత్ దర్శకత్వంలో ఓజీ సినిమాలోనూ పవన్ కల్యాణ్ నటిస్తున్నాడు. ఈ చిత్ర షూటింగ్‍లోనూ పవన్ పాల్గొనాల్సి ఉంది. పాన్ ఇండియా ఇండియా మూవీగా ఓజీ రూపొందుతోంది. బాలీవుడ్ స్టార్ ఇమ్రాన్ హష్మి ఈ చిత్రంలో విలన్‍గా నటిస్తున్నాడు. ఓజీ మూవీ షూటింగ్ దాదాపు సగం పూర్తయింది.