RRR Movie | 1000 కోట్ల క్లబ్ లో చేరిన ‘ఆర్ఆర్ఆర్’

‘ఆర్ఆర్ఆర్’వ‌సూళ్ల ప్ర‌భంజ‌నం కొన‌సాగుతోంది. భాషాభేదాల‌తో సంబంధం లేకుండా గ‌త సినిమాల రికార్డుల‌న్నీ తిర‌గ‌రాస్తూ క‌లెక్ష‌న్స్ రేసులో వేగంగా దూసుకుపోతున్న‌ది. విడుదలై రెండు వారాలు పూర్తయిన ఈ సినిమా క్రేజ్ కొంచెం కూడా తగ్గలేదు. ప‌ద‌హారు రోజుల వ్య‌వ‌ధిలోనే ఈ సినిమా వెయ్యి కోట్ల క్ల‌బ్ లోకి అడుగుపెట్టింది. త‌క్కువ వ్య‌వ‌ధిలో ఈ ఘ‌న‌త‌ను సాధించిన సినిమాగా చ‌రిత్ర‌ను సృష్టించింది. శ‌నివారం నాటితో ఈ సినిమా వెయ్యి కోట్ల వ‌సూళ్ల‌ను సాధించిన‌ట్లు ట్రేడ్ వ‌ర్గాలు పేర్కొన్నాయి.

ఆమీర్‌ఖాన్ ‘దంగ‌ల్‌’,ప్ర‌భాస్ ‘బాహుబ‌లి ది కంక్లూజ‌న్’ త‌ర్వాత అత్య‌ధిక వ‌సూళ్ల‌ను సాధించిన సినిమాల్లో మూడో స్థానంలో‘ఆర్ఆర్ఆర్’నిలిచింది. హిందీలో స్ట్రెయిట్ సినిమాల‌కు ధీటుగా‘ఆర్ఆర్ఆర్’ వ‌సూళ్ల‌ను సాధించి ఆశ్చర్యపరుస్తోంది. శుక్ర‌వారం నాటికి 213 కోట్ల వ‌సూళ్ల‌ను రాబ‌ట్టిన‌ట్లు త‌ర‌ణ్ ఆద‌ర్శ్ పేర్కొన్నారు. థ‌ర్డ్ వేవ్ త‌ర్వాత బాలీవుడ్‌లో కాశ్మీర్ ఫైల్స్ సినిమా మాత్రమే 204 కోట్ల క‌లెక్ష‌న్స్ సాధించింది. ఆ సినిమా రికార్డును‘ఆర్ఆర్ఆర్’క్రాస్ చేసింది. ఫిక్ష‌న‌ల్ యాక్ష‌న్ ఎంట‌ర్‌టైన‌ర్‌గా తెర‌కెక్కిన ఈ సినిమాలో అల్లూరి సీతారామ‌రాజుగా రామ్‌చ‌ర‌ణ్‌,కొమురం భీమ్‌గా ఎన్టీఆర్ న‌ట‌న‌కు విమ‌ర్శ‌కుల ప్ర‌శంస‌లు ల‌భిస్తున్నాయి. ఈ సినిమాతో ద‌ర్శ‌కుడిగా రాజ‌మౌళి పేరు మరోమారు దేశ‌వ్యాప్తంగా మారుమ్రోగుతోంది.