ఎన్టీఆర్.. గ్యాంగ్ వార్ మూవీ రాబోతోందా?

ఉప్పెన సినిమాతో దర్శకుడిగా పెద్ద విజయాన్ని అందుకున్న బుచ్చిబాబు సానా గురువు సుకుమార్ బాటలోనే అడుగులు వేసి వైవిధ్యతను చాటుకున్నారు. ఉప్పెన తర్వాత బుచ్చిబాబు అగ్ర హీరో ఎన్టీఆర్ తో తదుపరి సినిమా చేయబోతున్నట్లు చాలా కాలంగా ప్రచారం జరుగుతోంది. తాజా సమాచారం ప్రకారం రూరల్ బ్యాక్ డ్రాప్‌లో గ్యాంగ్ వార్ డ్రామాగా ఈ సినిమాను తెరకెక్కించబోతున్నట్లు తెలిసింది.

వాస్తవ ఘటనల స్ఫూర్తితో బుచ్చిబాబు ఈ కథను సిద్ధం చేసినట్లు చెబుతున్నారు. ఇందులో గత చిత్రాలకు పూర్తి భిన్నంగా కొత్త లుక్‌లో ఎన్టీఆర్ కనిపించనున్నట్లు తెలిసింది. ఇటీవలే ఎన్టీఆర్ ను కలిసిన దర్శకుడు బుచ్చిబాబు సానా ఆయనకు కథను వినిపించినట్లు సమాచారం. పాయింట్ నచ్చడంతో ఎన్టీఆర్ ఈ చిత్రానికి గ్రీన్ సిగ్నల్ ఇచ్చినట్లు వార్తలొస్తున్నాయి. 

లైన్లో రెండు సినిమాలు..

కాగా ఎన్టీఆర్, రామ్‌చరణ్ హీరోలుగా నటించిన ఆర్ఆర్ఆర్ మార్చి లేదా ఏప్రిల్ నెలలో ప్రేక్షకుల ముందుకు రానుంది. అలాగే కొరటాల శివ దర్శకత్వంలో ఎన్టీఆర్ ఓ సినిమా చేయబోతున్నారు. ఫిబ్రవరి 18న ఈ చిత్రం లాంఛనంగా ప్రారంభంకానుంది. ఇందులో మురికివాడ ప్రజల సమస్యల కోసం పోరాడే విద్యార్థి నాయకుడిగా ఎన్టీఆర్ కనిపించబోతున్నట్లు తెలిసింది. ఈ సినిమాలో ఎన్టీఆర్ జోడీగా అలియాభట్ కథానాయికగా నటించనున్నట్లు సమాచారం.