Mohan Babu: అయోధ్య రామ మందిరానికి ఆహ్వానం.. భయమేసింది.. మోహన్ బాబు కామెంట్స్

Mohan Babu Ayodhya Ram Mandir Invitation: 500 ఏళ్ల నాటి భారతీయుల కల నెరవేరబోతోంది. జనవరి 22న అయోధ్యలో శ్రీరాముడి విగ్రహానికి ప్రాణ ప్రతిష్ట చేయనున్నారు. ఈ కార్యక్రమాన్ని దేశం మొత్తం ఓ పండుగలా జరుపుకుంటోంది. ఈ వేడుకకు దేశంలో సినీ, రాజకీయా, క్రీడా ప్రముఖులకు కేంద్ర ప్రభుత్వం ఆహ్వానం పంపింది. అయోధ్య రామ మందిర ప్రారంభోత్సవం సందర్భంగా మంచు మోహన్ బాబు ఫిల్మ్ నగర్ దైవ సన్నిధానంలో ప్రత్యేక పూజలు నిర్వహించారు.

శనివారం రోజున ఫిల్మ్ నగర్‌ దైవ సన్నిదానంలో ప్రత్యేక పూజల అనంతరం మీడియాతో మాట్లాడారు మోహన్ బాబు. ఈ సమయంలో అయోధ్య రామ మందిరానికి ఆహ్వానం అందిన వెళ్లలేకపోతున్నట్లు మోహన్ బాబు తెలిపారు. "ఫిలీం ఇండస్ట్రీకి కాంగ్రెస్ ప్రభుత్వం చాలా చేసింది. ఫిలీం నగర్‌లోని దైవ సన్నిదానం, చిత్రపురి కాలనీ వంటివి ఇచ్చింది. ఫిలీం నగర్ దైవ సన్నిధానం అద్భుతమైన దేవాలయం. ఫిల్మ్ నగర్‌లో దైవ సన్నిధానం దేవాలయాన్ని అందరి కోసం నిర్మించాం" అని మోహన్ బాబు పేర్కొన్నారు.

"ఇక్కడ అన్ని దేవతా మూర్తులున్నారు. విశిష్ణమైన పూజలు జరుగుతాయి. ఈ మధ్య కాలంలో దైవ సన్నిధానం పాలక మండలి చైర్మన్ పదవిని నేను స్వీకరించాను. ఈ దేవాలయంలో 18 మూర్తులు, 15 మంది బ్రాహ్మణోత్తములున్నారు. ఈ దైవ సన్నిధానంలో కోరిన కోరికలన్నీ తీరుతున్నాయని భక్తులు చెబుతున్నారు. తిరుపతి వెంకటేశ్వర స్వామి, సాయి బాబా, శ్రీరాముడు, లక్ష్మీ నరసింహ స్వామి, సంతోషిమాత ఇలా 18 మంది దేవతలు ఇక్కడ కొలువై ఉన్నారు" అని మోహన్ బాబు వెల్లడించారు.

"ఇది రాముడు పుట్టిన దేశం.. ఇది రామ జన్మ భూమి అని ప్రపంచానికి చాటి చెప్పేలా చేశారు మన దేశ ప్రధాని నరేంద్ర మోదీ. అయోధ్యలో రామ మందిరాన్ని ప్రారంభిస్తూ ఇంతటి మహత్తర కార్యక్రమాన్ని చేపట్టిన ప్రధాని మోదీ గారికి కృతజ్ఞతలు తెలియజేస్తున్నాను. జనవరి 22న జరిగే రామ మందిర ప్రారంభోత్సవానికి ఊరూరా తరలి వెళ్తున్నారు. నాకు కూడా అహ్వానం అందింది. సెక్యూరిటీ ఇస్తాం అన్నారు. అయినా భయపడి వెళ్లట్లేదు" అని మోహన్ బాబు చెప్పుకొచ్చారు.

"భద్రతా కారణాల దృష్ట్యా రాలేకపోతోన్నాను క్షమించమని ఉత్తరం రాశాను. రామ మందిర ప్రారంభోత్సవం సందర్భంగా దైవ సన్నిధానంలోనూ ప్రత్యేక పూజా కార్యక్రమాలు జరగనున్నాయి. ఈ నెల 14 నుంచి 22 వరకు (రాములవారి ప్రాణప్రతిష్ట పూర్తయ్యేవరకు) అనేక పూజా కార్యక్రమాలు చేస్తున్నాం. అందరూ వచ్చి విజయవంతం చేయండి" అని మోహన్ బాబు కోరారు.

"అయోధ్య రామ మందిర ప్రారంభోత్సవం సందర్భంగా దైవ సన్నిధానంలో జనవరి 14 నుంచి జనవరి 22 వరకు వైదిక కార్యక్రమాలు జరుగుతున్నాయి. సాయంత్రం పూట భక్తి కీర్తనలు, భరత నాట్య ప్రదర్శనలు జరుగుతున్నాయి. జనవరి 21 సాయంత్రం శ్రీ సీతారామ కళ్యాణ మహోత్సవం జరగనుంది. ఈ కార్యక్రమాలకు అందరూ విచ్చేసి సీతారాముల అనుగ్రహాన్ని పొందగలరు" అని ప్రధాన అర్చకులు రాంబాబు తెలిపారు.

ఇదిలా ఉంటే మంచు మోహన్ బాబు ఇటీవల సన్నాఫ్ ఇండియా సినిమాలో నటించారు. ఈ మూవీ బాక్సాఫీస్ వద్ద డిజాస్టర్‌గా నిలిచింది. ఇప్పుడు పెద్ద కుమారుడు మంచు విష్ణుతో కన్నప్ప మూవీని నిర్మిస్తున్నారు మోహన్ బాబు. కన్నప్ప మూవీని అత్యంత ప్రతిష్టాత్మకంగా భారీ బడ్జెట్‌తో నిర్మిస్తున్నారు.