Emergency Teaser: పూర్తిగా ఇందిరాగాంధీలా మారిపోయిన కంగనా.. ఎమర్జెన్సీ టీజర్‌
Emergency Teaser: భారతదేశ చరిత్రలో చీకటి అధ్యాయంగా భావించే ఎమర్జెన్సీ టైమ్‌పై అదే పేరుతో కంగనా రనౌత్ సినిమా తీస్తోంది. ఈ మూవీ టీజర్‌ గురువారం (జులై 14) రిలీజైంది.
బాలీవుడ్ ఫైర్‌బ్రాండ్‌ కంగనా రనౌత్ డైరెక్షన్‌లో వస్తున్న మూవీ ఎమర్జెన్సీ. ఈ మూవీలో భారత మాజీ ప్రధాని ఇందిరా గాంధీ పాత్రలో కంగనా కనిపిస్తోంది. ఈ మూవీకి సంబంధించిన చిన్న ప్రోమో వీడియోను మేకర్స్‌ గురువారం (జులై 14) రిలీజ్‌ చేశారు.
అందరూ సర్‌ అని పిలిచిన ఆమెను పరిచయం చేస్తున్నా అంటూ కంగనా తన ఇన్‌స్టాగ్రామ్‌ అకౌంట్‌ ద్వారా ఈ వీడియోను షేర్‌ చేసింది. దీనికి ఎన్నో పాజిటివ్ కామెంట్స్ వచ్చాయి. చాలా మంది ఫ్యాన్స్ ఫైర్ ఎమోజీలను పోస్ట్ చేశారు. ఇందులో పూర్తిగా ఇందిరా గాంధీ లుక్‌లో కనిపిస్తున్న కంగనాను చూడొచ్చు. దేశ ప్రధానుల్లో ఇందిరాకు చాలా పవర్‌ఫుల్‌గా పేరుంది.
ఆమె క్యారెక్టర్‌లో నటించడం అంటే మాటలు కాదు. అయితే ఈ మూవీలో ఆమెలాగా కనిపించడంతోపాటు ఇందిర హావభావాలను కూడా అలాగే చూపించడానికి కంగనా బాగానే ప్రయత్నించినట్లు ఈ వీడియోను బట్టి తెలుస్తోంది. ఇందిరాకు గొప్ప ప్రధానిగా పేరున్నా.. దేశంలో ఎమర్జెన్సీ విధించారన్న ఆగ్రహం, అసంతృప్తి కూడా ఆమెపై ఉంది. తాను ప్రధానిగా ఉన్న రోజుల్లో ఓ డిక్టేటర్‌గా పేరున్న ఇందిర.. ప్రపంచ నేతలను కూడా గడగడలాడించారు.
ఈ ఎమర్జెన్సీ మూవీలో ఒక్క డైలాగుతో ఇందిర వ్యక్తిత్వాన్ని చూపించే ప్రయత్నం కంగనా చేసింది. అమెరికా ప్రెసిడెంట్‌ నిక్సన్‌ మీతో ఫోన్‌ కాల్‌ మాట్లాడినప్పుడు మేడమ్‌ అని పిలవొచ్చా అని అడిగారు అంటూ ఆమె పీఏ వచ్చి చెబుతాడు. దానికి ఆమె దీర్ఘంగా ఆలోచించి సరే అంటుంది. అయితే ఆ వెంటనే నా ఆఫీస్‌లో అందరూ నన్ను సర్‌ అనే పిలుస్తారని చెప్పండి అంటూ చాలా గంభీరంగా చెబుతుంది.
అచ్చూ ఇందిరలాగే ఓ కాటన్ చీర, మెడలో హారం, తలకు తెల్ల రంగుతో కంగనా కనిపించింది. ఆస్కార్ విన్నర్‌ డేవిడ్ మలినోవ్‌స్కీ ఈ మూవీలో కంగనాను ఇలా ఇందిరగా మార్చాడు. ఇతడు డార్కెస్ట్‌ హవర్‌, వరల్డ్‌ వార్‌ జీ, ద బ్యాట్‌మ్యాన్‌లాంటి మూవీస్‌కి పని చేశాడు. ఈ చిన్న ప్రోమో వీడియోతోనే ఎమర్జెన్సీ మూవీలో కంగనా.. ఇందిర పాత్రను ఎలా చూపించబోతున్నారో స్పష్టమవుతోంది.
