Kalki 2898 AD: సుప్రీం యాస్కిన్, కాంప్లెక్స్‌ల గురించి ముఖ్యమైన విషయాలు లీక్ చేసిన కల్కి ప్రొడక్షన్ డిజైనర్
Kalki 2898 AD: కల్కి 2898 ఏడీ సినిమా సూపర్ హిట్ అయింది. ఈ చిత్రం సీక్వెల్‍లో ఏం జరుగుతుందోనని ఆసక్తి విపరీతంగా ఉంది. ఈ తరుణంలో ఈ చిత్రం గురించి కొన్ని కీలక విషయాలు లీక్ చేశారు ప్రొడక్షన్ డిజైనర్ నితిన్ జిహానీ.
ఎపిక్ సైన్స్ ఫిక్షన్ మూవీ కల్కి 2898 ఏడీ సినిమా భారీ వసూళ్లతో సక్సెస్‍ఫుల్‍గా దూసుకెళుతోంది. పురాణాల ఆధారంగా దర్శకుడు నాగ్ అశ్విన్ తెరకెక్కించిన ఈ ఫ్యుచరస్టిక్ మూవీపై ప్రశంసలు కూడా అదే రేంజ్‍లో వస్తున్నారు. ప్రభాస్ హీరోగా నటించిన ఈ మూవీ రూ.1,000కోట్ల కలెక్షన్లు దాటేసింది. ఈ మూవీ క్లైమాక్స్‌లో ట్విస్టులు ప్రేక్షకులను ఆశ్చర్యపరిచాయి. అందరి మదిలో చాలా ప్రశ్నలను మిగిల్చాయి. కల్కి 2 చిత్రంలో ఏం జరుగుతుందో అనే ఆసక్తిని పెంచేశాయి. అయితే, ఈ తరుణంలో కల్కి కథ గురించి ఈ మూవీకి ప్రొడక్షన్ డిజైనర్ నితిన్ జిహానీ చౌదరి కీలక అంశాలను లీక్ చేసేశారు.
యాస్కిన్.. కలి కాదట
కల్కి చిత్రంలో సుప్రీమ్ యాస్కిన్ పాత్రను లోక నాయకుడు కమల్ హాసన్ పోషించారు. అయితే, కల్కిలో యాస్కినే కలి అంటూ అంచనాలు ఇంతకాలం చక్కర్లు కొట్టాయి. ఆయన క్యారెక్టరైజేషన్ కూడా అలాగే సాగింది. అయితే, ఈ విషయంలో నితిన్ జిహానీ చౌదరి ఓ కీలక విషయం వెల్లడించారు. సుప్రీం యాస్కిన్.. కలి కాదంటూ లీక్ చేసేశారు. ‘కలి’ అదృశ్య శక్తిగా ఉంటుందని, దాని ఆదేశాల మేరకు సుప్రీం యాస్కిన్ పని చేస్తుంటారని చెప్పేశారు. ఓ యూట్యూబ్ ఛానెల్‍కు తాజాగా ఇచ్చిన ఓ ఇంటర్వ్యూలో ఆయన ఈ విషయాలను వెల్లడించారు. యాస్కిన్ క్యారెక్టర్లో కృష్ణుడి ఛాయలు కూడా కాస్త ఉంటాయని కూడా చెప్పారు.
ఏడు కాంప్లెక్స్‌లు
కల్కి 2898 ఏడీ సినిమాలో కాశీలోని కాంప్లెక్స్‌ను మేకర్స్ చూపించారు. ప్రపంచంలో చివరి నగరం అనడంతో అదొక్క కాంప్లెక్స్ మాత్రమే ఉంటుందని అందరూ భావిస్తున్నారు. అయితే, కల్కి కథలో మొత్తంగా ఏడు కాంప్లెక్స్‌లు ఉంటాయని నితిన్ జిహానీ చెప్పారు. అమెరికా, ఆఫ్రికా ఇలా ప్రపంచంలోని అక్కడక్కడా ఏడు కాంప్లెక్స్‌లు ఉంటాయని వెల్లడించారు. ఆ కాంప్లెక్స్‌లకు హెడ్స్ ఉంటారని తెలిపారు. అయితే, అన్ని కాంప్లెక్స్‌లు యాస్కిన్ సారథ్యంలోనే ఉంటాయని అన్నారు. కలితో యాస్కిన్ మాట్లాడగలుగుతారని వెల్లడించారు.
ఇలా.. కల్కి కథ గురించి కీలక విషయాలను నితిన్ జిహానీ చౌదరి లీక్ చేసేశారు. స్పాయిలర్స్ ఇచ్చేశారు. మరి దర్శకుడు నాగ్ అశ్విన్, నిర్మాతలు ఈ విషయంపై ఏమైనా స్పందిస్తారేమో చూడాలి.
ప్రస్తుతం కల్కి 2 పనుల్లో దర్శకుడు నాగ్ అశ్విన్ చాలా బిజీగా ఉన్నారు. కల్కి సినిమాటిక్ యూనివర్స్ ఎలా ఉండనుందో అనే ఆసక్తి అందరిలోనూ నెలకొంది. కల్కి 2898 ఏడీ క్లైమాక్స్‌లో చాలా ప్రశ్నలను దర్శకుడు మిగిల్చేశారు. దీంతో సీక్వెల్‍పై భారీగా బజ్ ఉంది.
కల్కి 2898 ఏడీ చిత్రం జూన్ 27వ తేదీన రిలీజ్ కాగా.. మొదటి నుంచి భారీ కలెక్షన్లతో దుమ్మురేపుతోంది. రికార్డులను సృష్టిస్తోంది. ఈ చిత్రంలో ప్రభాస్‍తో పాటు అమితాబ్ బచ్చన్, కమల్ హాసన్, దీపికా పదుకొణ్ మెయిన్ రోల్స్ చేశారు. వైజయంతీ మూవీస్ పతాకంపై అశ్వినీదత్ నిర్మించిన ఈ మూవీకి సంతోష్ నారాయణన్ సంగీతం అందించారు. ఈ మూవీ ఇంకా థియేటర్లలో మంచి వసూళ్లను దక్కించుకుంటోంది. దీంతో 10 వారాల తర్వాతే ఈ చిత్రం ఓటీటీలోకి వస్తుందని ఇటీవలే మూవీ టీమ్ క్లారిటీ కూడా ఇచ్చింది.
