Godzilla X Kong: The New Empire Trailer: గాడ్జిల్లా X కాంగ్ ది న్యూ ఎంపైర్ ట్రైలర్ వచ్చేసింది.. మరింత థ్రిల్ పంచుతూ..

Godzilla X Kong: The New Empire Trailer: గాడ్జిల్లా వెర్సెస్ కాంగ్ సినిమా గుర్తుందా? 2021లో వచ్చిన ఈ సినిమాకు ఇప్పుడు సీక్వెల్ రాబోతోంది. ఈ మూవీ పేరు గాడ్జిల్లా X కాంగ్: ది న్యూ ఎంపైర్. ఈ సినిమా ట్రైలర్ భారత కాలమానం ప్రకారం సోమవారం (డిసెంబర్ 4) తెల్లవారుఝామున రిలీజైంది. మూడేళ్ల కిందట ఆ సినిమా పంచిన థ్రిల్ ను మరింత పెంచేలా ఈ సీక్వెల్ ట్రైలర్ ఉంది.

2021లో వచ్చిన గాడ్జిల్లా వెర్సెస్ కాంగ్ మూవీలో ఈ రెండు భారీ జీవులు ఒకదానిపై మరొకటి పైచేయి సాధించడానికి భీకర పోరాటాలు చేశాయి. చివరికి గాడ్జిల్లా నుంచి మానవాళిని రక్షించడంలో కాంగ్ విజయం సాధిస్తుంది. ఈ తాజా సీక్వెల్లో భూమికి బయటి జీవుల నుంచి పొంచి ఉన్న ముప్పును తప్పించడానికి గాడ్జిల్లా, కాంగ్ కలిసి ఫైట్ చేస్తాయి.

గాడ్జిల్లా X కాంగ్ ది న్యూ ఎంపైర్ మూవీ ప్రేక్షకులను సరికొత్త ప్రపంచంలోకి తీసుకెళ్లేలా ఉంది. గతంలో ఎప్పుడూ చూడని ఓ రాక్షస జీవితో ఈ సీక్వెల్లో గాడ్జిల్లా, కాంగ్ ఫైట్ చేయబోతున్నట్లు ట్రైలర్ చూస్తే స్పష్టమవుతోంది. స్కల్ ఐలాండ్, కాంగ్, గాడ్జిల్లాల గురించి మరింత చరిత్రను కూడా ఈ సీక్వెల్ మూవీ ప్రేక్షకుల ముందుకు తీసుకొస్తున్నట్లు కనిపిస్తోంది.

కేవలం మన గ్రహంపైనే జీవం ఉందని మొదట్లో నమ్మేవారు.. కానీ అది తప్పని తేలింది.. ఈ ప్రపంచంలోని ఇప్పటికీ మనం ఊహించని, మనకు తెలియని ఎన్నో రహస్యాలు ఉన్నాయి.. అంటూ ఈ గాడ్జిల్లా X కాంగ్ ది న్యూ ఎంపైర్ ట్రైలర్ మొదలవుతుంది. కాంగ్ లాగే కనిపించే మరో భారీ రాక్షస జీవి ఈ సీక్వెల్లో ఎంట్రీ ఇవ్వబోతోంది.

మానవాళిని రక్షించడానికి ప్రపంచమంతా మరోసారి కాంగ్, గాడ్జిల్లా వైపు చూస్తుంది. ఈ తాజా ట్రైలర్ మరో లెవల్లో ఉందంటూ అభిమానులు కామెంట్స్ చేస్తున్నారు. ముఖ్యంగా ఓ సీన్లో గాడ్జిల్లా, కాంగ్ కలిసి పరిగెత్తడం ఎంతో థ్రిల్లింగా అనిపిస్తుంది. ఈ గాడ్జిల్లా X కాంగ్ ది న్యూ ఎంపైర్ మూవీ ఏప్రిల్ 12, 2024లో రిలీజ్ కానుంది.