Arbaaz Khan: టాలీవుడ్ సినిమాలో విల‌న్‌గా స‌ల్మాన్ ఖాన్ బ్ర‌ద‌ర్ -ఏడేళ్ల త‌ర్వాత రీఎంట్రీ

Arbaaz Khan: స‌ల్మాన్‌ఖాన్ సోద‌రుడు, బాలీవుడ్ న‌టుడు అర్భాజ్‌ఖాన్ టాలీవుడ్‌లోకి రీఎంట్రీ ఇస్తోన్నాడు. అశ్విన్ బాబు హీరోగా న‌టిస్తోన్న కొత్త సినిమాలో అర్భాజ్‌ఖాన్ విల‌న్‌గా క‌నిపించ‌బోతున్నాడు. ఈ విష‌యాన్ని మూవీ ద‌ర్శ‌క‌నిర్మాత‌లు అఫీషియ‌ల్‌గా ప్ర‌క‌టించారు. చిరంజీవి హీరోగా 2005లో రిలీజైన జై చిరంజీవ‌తో టాలీవుడ్‌లోకి ఎంట్రీ ఇచ్చాడు అర్భాజ్‌ఖాన్‌. ఇందులో విల‌న్‌గా న‌టించాడు.

ఆ త‌ర్వాత రాజ్ త‌రుణ్ కిట్టు ఉన్నాడు జాగ్ర‌త్త సినిమా చేశాడు. ఈ రెండు సినిమాలు మిన‌హా తెలుగులో అర్భాజ్‌ఖాన్ మ‌ళ్లీ క‌నిపించ‌లేదు. దాదాపు ఏడేళ్ల త‌ర్వాత టాలీవుడ్‌లోఅశ్విన్ బాబు మూవీకి అర్భాజ్‌ఖాన్‌ గ్రీన్‌సిగ్న‌ల్ ఇచ్చాడు. న్యూ ఏజ్ థ్రిల్ల‌ర్‌గా తెర‌కెక్కుతోన్న ఈ మూవీలో అర్భాజ్‌ఖాన్ పాత్ర కొత్త కోణంలో ఉంటుంద‌ని మేక‌ర్స్ చెబుతున్నారు. ప‌వ‌ర్‌ఫుల్ విల‌న్‌గా అత‌డు క‌నిపిస్తాడ‌ని అంటున్నారు. అశ్విన్ బాబు, అర్భాజ్‌ఖాన్ పాత్ర‌లు పోటాపోటీగా సాగుతాయ‌ని చెబుతున్నారు.

మంగ‌ళ‌వారం సెట్స్‌లో...

ఈ టాలీవుడ్ మూవీ సెట్స్‌లో మంగ‌ళ‌వారం అర్భాజ్‌ఖాన్ అడుగుపెట్టాడు. అశ్విన్‌బాబు, అర్భాజ్‌ఖాన్ మ‌ధ్య కీల‌క స‌న్నివేశాల‌ను చిత్రీక‌రిస్తున్న‌ట్లు స‌మాచారం. ఈ మూవీకి అప్స‌ర్ ద‌ర్శ‌క‌త్వం వ‌హిస్తున్నాడు. గంగా ఎంటర్‌టైన్‌మెంట్స్ బ్యాన‌ర్‌పై మహేశ్వర్ రెడ్డి మూలి ఈ మూవీని ప్రొడ్యూస్ చేస్తున్నాడు.

ఇందులో అశ్విన్‌బాబుకు జోడీగా దిగాంగ‌నా సూర్య‌వ‌న్షీ హీరోయిన్‌గా న‌టిస్తోంది. హైప‌ర్ ఆది కీల‌క పాత్ర పోషిస్తున్నాడు. వికాస్ బాడిస మ్యూజిక్ అందిస్తున్నాడు. ఈ సినిమాకు హ‌నుమాన్‌, మంగ‌ళ‌వారం సినిమాల ఫేమ్ దాశ‌ర‌థి శివేంద్ర సినిమాటోగ్రాఫ‌ర్‌గా వ్య‌వ‌హ‌రిస్తున్నాడు.

అర్భాజ్ రెండో పెళ్లి...

స‌ల్మాన్‌ఖాన్ సోద‌రుడిగా యాక్టింగ్ కెరీర్‌ను ప్రారంభించిన అర్భాజ్‌ఖాన్ హీరోగా, క్యారెక్ట‌ర్ ఆర్టిస్ట్‌గా, విల‌న్‌గా హిందీలోనే ఎక్కువ‌గా సినిమాలు చేశాడు. స‌ల్మాన్‌ఖాన్ హీరోగా న‌టించిన ద‌బాంగ్ 2 మూవీకి డైరెక్ట‌ర్‌గా, ప్రొడ్యూస‌ర్‌గా వ్య‌వ‌హ‌రించాడు. 1998 బాలీవుడ్ న‌టి మ‌లైకా ఆరోరాను పెళ్లి చేసుకున్న అర్భాజ్‌ఖాన్ 2016లో ఆమెకు విడాకులు ఇచ్చాడు.

ఇటీవ‌లే సురాఖాన్ అనే మేక‌ప్ ఆర్టిస్ట్‌ను రెండో పెళ్లిచేసుకున్నాడు. 2019 నుంచి సినిమాల‌కు దూరంగా ఉంటోన్న అర్భాజ్ ఖాన్...నాలుగేళ్ల‌లో కేవ‌లం రెండు సినిమాలు మాత్ర‌మే చేశాడు. మ‌ల‌యాళంలో మ‌మ్ముట్టి హీరోగా న‌టించిన బిగ్‌బ్ర‌ద‌ర్‌లో విల‌న్‌గా క‌నిపించాడు.

హిడింబ త‌ర్వాత‌...

మ‌రోవైపు హిడింబ త‌ర్వాత అశ్విన్‌బాబు హీరోగా న‌టిస్తోన్న మూవీ ఇది. అన్న‌య్య ఓంకార్ ద‌ర్శ‌క‌త్వంలో రూపొందిన రాజుగారి గ‌ది సిరీస్ సినిమాల‌తో అశ్విన్ బాబు హీరోగా గుర్తింపును తెచ్చుకున్నాడు.

అత‌డి గ‌త చిత్రం హిడింబ బాక్సాఫీస్ వ‌ద్ద ప‌ర్వాలేద‌నిపించింది. ఈ మూవీ అనంత‌రం అన్న‌య్య ఓంకార్ ద‌ర్శ‌క‌త్వంలో అశ్విన్ మ‌రో సినిమా చేయ‌బోతున్న‌ట్లు ప్ర‌చారం జ‌రుగుతోంది. కార్తికేయ హిప్పీ మూవీతో టాలీవుడ్‌లోకి ఎంట్రీ ఇచ్చిన దిగంగాన సూర్య‌వ‌న్షీ ఆ త‌ర్వాత సీటీమార్‌, క్రేజీ ఫెల్లోస్ సినిమాలు చేసింది.