Animal Second Song: యానిమల్ నుంచి రెండో పాట వచ్చేసింది.. ఎమోషనల్‍గా.. మెలోడియస్‍గా..

Animal Second Song: బాలీవుడ్ స్టార్ హీరో రణ్‍బీర్ కపూర్, స్టార్ హీరోయిన్ రష్మిక మందన్నా ప్రధాన పాత్రల్లో నటిస్తున్న యానిమల్ సినిమాపై అందరిలో ఆసక్తి అమితంగా ఉంది. అర్జున్ రెడ్డి ఫేమ్ డైరెక్టర్ సందీప్ రెడ్డి వంగా దర్శకత్వం వహిస్తుండటంతో ఈ మూవీపై అంచనాలు అత్యంత భారీగా ఉన్నాయి. ఇప్పటికే టీజర్‌తో ఈ సినిమాపై ఫుల్ హైప్ ఏర్పడింది. డిసెంబర్ 1వ తేదీన ఈ చిత్రం రిలీజ్ కానుంది. ఈ తరుణంలో యానిమల్ సినిమా నుంచి రెండో పాట రిలీజ్ అయింది. ఈ పాటను ‘నే వేరే’ అనే ఈ రెండో సాంగ్‍ను మూవీ యూనిట్ నేడు (అక్టోబర్ 27) విడుదల చేసింది.

యానిమల్ సినిమా నుంచి వచ్చిన ఈ ‘నే వేరే.. నువ్వు వేరే కాదు నేస్తమా’ అనే పాట వివిధ ఎమోషన్లతో సాగింది. కర్వా చౌత్ వేడుకలో జల్లెడలో రణ్‍బీర్ ముఖాన్ని రష్మిక చూసే సందర్భం కూడా ఉంది. అలాగే, రణ్‍బీర్ ప్రవర్తన నచ్చన మనసులో రష్మిక బాధపడుతుంటారు. రష్మికకు నచ్చజెప్పేందుకు, బుజ్జిగించేందుకు రణ్‍బీర్ ప్రయత్నిస్తుంటారు. ఇలా చాలా ఎమోషనల్‍గా ఈ సాంగ్ సాగింది. లిరిక్స్ కూడా ఆకట్టుకునేలా ఉన్నాయి. యానిమల్ చిత్రానికి శ్రేయస్ పురానిక్ సంగీతం అందిస్తున్నారు.

యానిమల్ సినిమాలో ఈ పాటను కార్తీక్ ఆలపించారు. అనంత శ్రీరామ్ లిరిక్స్ అందించారు. ఈ సాంగ్‍ను మెలోడియస్‍గా స్వరపరిచారు శ్రేయస్. యానిమల్ సినిమాలో ఈ రెండో పాట తెలుగుతో పాటు హిందీలో సంత్రంగ, తమిళంలో పోగదే, మలయాళంలో నే వేరే నాన్, కన్నడలో నా బేరే.. నీ బేరే అనే పేర్లతో రిలీజ్ అయింది. ఆయా భాషల్లో సింగర్లు, లిరిక్ రైటర్లు వేర్వేరుగా ఉన్నారు.

ఇటీవలే రిలీజ్ అయిన యానిమల్ సినిమా టీజర్ ఆకట్టుకుంది. తండ్రీ కొడుకుల కథగా ఇది కనిపిస్తోంది. కుటుంబం కోసం ఎంత దూరమైనా, ఏమైనా చేసే యువకుడిగా రణ్‍బీర్ కనిపించారు. ఆయన చాలా వైలెంట్ క్యారెక్టర్ చేస్తున్నట్టు అర్థమవుతోంది. రణ్‍బీర్ తండ్రి పాత్రను అనిల్ కపూర్ పోషించారు. గీతాంజలి పాత్ర చేశారు రష్మిక. రణ్‍బీర్, రష్మిక మధ్య లవ్ స్టోరీ కూడా ఉండనుంది. యానిమల్ సినిమాలో బేబి డియోల్ విలన్ పాత్ర పోషిస్తున్నారు. ఇటీవలే ఈ సినిమా నుంచి తొలి సాంగ్ కూడా రాగా.. దాంట్లో రణ్‍బీర్, రష్మిక కెమెస్ట్రీ అదిరిపోయింది. టీ-సిరీస్, సినీ1 స్టూడియోస్, భద్రకాళి పిక్చర్స్ ఈ చిత్రాన్ని నిర్మిస్తున్నాయి.