ShareChat layoffs : షేర్​చాట్​లోనూ జాబ్​ కట్స్​.. 20శాతం మంది ఉద్యోగుల తొలగింపు!

ShareChat layoffs 2023 : 2022లో ప్రపంచాన్ని ఉక్కిరిబిక్కిరి చేసిన 'జాబ్​ కట్స్​' వార్తలు 2023లోనూ కొనసాగుతున్నాయి. అమెజాన్​ వంటి దిగ్గజ సంస్థలు ఉద్యోగులను తొలగించేందుకు సన్నద్ధమవుతున్నాయి. తాజాగా ఈ జాబితాలోకి ప్రముఖ సోషల్​ మీడియా షేర్​చాట్​ కూడా చేరింది! గూగుల్​, టీమాసెక్​ ఆధారిత ఈ షేర్​చాట్​.. తమ ఉద్యోగుల్లో 20శాతం మందిని తొలగిస్తున్నట్టు సోమవారం ఓ ప్రకటన విడుదల చేసింది.

‘ఖర్చులు పెరిగాయి.. తప్పడం లేదు’

బెంగళూరు ఆధారిత మొహల్లా టెక్​ ప్రైవేట్​ లిమిటెడ్​కు చెందిన షేర్​చాట్​తో పాటు ఇదే సంస్థకు చెందిన మోజ్​ యాప్​ నుంచి దాదాపు 500 మంది ఉద్యోగులను తొలగిస్తున్నట్టు తెలుస్తోంది. 5 బిలియన్​ డాలర్లు విలువ చేసే ఈ షేర్​చాట్​లో 2,200కుపైగా మంది ఉద్యోగులు పనిచేస్తున్నారు.

ShareChat layoffs : "మా వద్ద ఉన్న అత్యంత నైపుణ్యమైన ఉద్యోగుల్లోంచి 20శాతం మందిని తొలగిస్తున్నాము. సంస్థ చరిత్రలో మేము తీసుకుంటున్న అత్యంత కఠినమైన, బాధాకరమైన నిర్ణయం ఇదే. స్టార్టప్​ జర్నీ నుంచి మాతో పాటు ఉన్న వారిని తొలగిస్తుండటం నిజంగా బాధాకరమైన విషయమే. కానీ ఖర్చులు విపరీతంగా పెరిగాయి. అంతర్జాతీయంగా నెలకొన్న అనేక కారణాల వల్ల.. జాబ్​ కట్స్​ తీసుకోవాల్సి వస్తోంది," అని సంస్థ ఓ ప్రకటనలో పేర్కొంది.

కాస్ట్​ కటింగ్​ కారణంగా.. కొన్ని ప్రాజెక్టులను పక్కనపెడుతున్నట్టు.. కీలకమైన, ప్రముఖవైన వాటిపైనే దృష్టిసారించనున్నట్టు షేర్​చేట్​ వెల్లడించింది.

ShareChat layoffs news : "ఈ ఏడాది కూడా పరిస్థితులు ఆందోళనకరంగా ఉంటాయని అర్థమైంది. అందుకే చాలా చర్చల తర్వాత ఈ నిర్ణయం తీసుకున్నాము. రానున్న రెండేళ్లు అత్యంత కఠినంగా ఉండున్నాయి. ఈ పరిస్థితుల నుంచి శక్తివంతంగా బయటపడతామని మాకు నమ్మకం ఉంది," అని షేర్​చాట్​ తెలిపింది.

జాబ్​ కట్​కు గురైన ఉద్యోగులకు.. నోటీస్​ పీరియడ్​కు సంబంధించిన పూర్తి జీతం, సంస్థలో ఎన్నేళ్లు పనిచేస్తే..దానికి తగ్గట్టు రెండు వారాల శాలరీ, 2022 డిసెంబర్​ వరకు పూర్తి వేరియబుల్​ పే, 2023 జూన్​ వరకు ఆరోగ్య బీమా కవరేజీని ఇస్తున్నట్టు షేర్​చాట్​ ప్రకటించింది.

వీటితో పాటు 45రోజులకు సంబంధించిన సెలవులను ప్రస్తుత శాలరీకి తగ్గట్టు ఎన్​క్యాష్​ చేసుకునే వెసులుబాటు కల్పించింది షేర్​చాట్​. వీటికి అదనంగా.. లేఆఫ్​కు గురైన ఉద్యోగులు.. ఈ ఏడాది ఏప్రిల్​ 30 వరకు సంస్థకు చెందిన ల్యాప్​టాప్​లను వినియోగించుకోవచ్చని స్పష్టం చేసింది.

1000 మంది అమెజాన్​ ఉద్యోగులు..

Amazon Layoffs 2023 : గతేడాది భారీగా జాబ్​ కట్స్​ చేసిన అమెజాన్​.. ఈ ఏడాది కూడా ఉద్యోగుల తొలగింపుపై దృష్టి పెట్టింది. ప్రపంచవ్యాప్తంగా వివిధ విభాగాల నుంచి మొత్తం 18 వేల ఉద్యోగులను తొలగించనున్నట్లు ఆమెజాన్ ప్రకటించింది. అయితే, ఆ 18 వేలలో భారత్ నుంచి వెయ్యి మంది ఉన్నారని తెలుస్తోంది. పూర్తి వివరాల కోసం ఇక్కడ క్లిక్​ చేయండి.