ఉద్యోగుల సమ్మెతో కొత్త జిల్లాల ఏర్పాటుపై నీలినీడలు!

Employees strike in AP | ఆంధ్రప్రదేశ్​లో జగన్​ ప్రభుత్వం తలపెట్టిన జిల్లాల పునర్వ్యవస్థీకరణపై ఉద్యోగుల నిరవధిక సమ్మె ప్రభావం చూపించే అవకాశముంది. కొత్త జిల్లాలను ఏర్పాటు చేసేందుకు ప్రభుత్వానికి జూన్​ 30వరకే గడువు ఉంది. ఈలోపు చాలా ప్రక్రియలు పూర్తిచేయాల్సి ఉంటుంది. అయితే ప్రభుత్వ ఉద్యోగులు.. విధులకు హాజరుకాకపోతే అవి ఆలస్యమవ్వచ్చు!

జూన్​ 30 వరకే ఎందుకు?

New districts in AP notification | 2020లో మొదలవ్వాల్సిన జనగణన ప్రక్రియ.. కరోనా విజృంభణ కారణంగా వాయిదా పడింది. అయితే జనాభా లెక్కల నిర్వహణకు ముందు జిల్లాలకు సంబంధించిన పూర్తి వివరాలను రాష్ట్రాలు కేంద్రానికి సమర్పించాల్సి ఉంటుంది. ఈ క్రమంలోనే.. కొత్త జిల్లాల ఏర్పాటు, పాత జిల్లాల సరిహద్దులను నిర్ణయించే ప్రక్రియను పూర్తి చేసి.. జూన్​ 30లోగా తమకు సమాచారం అందివ్వాలని డైరక్టర్ ఆఫ్​ సెన్సెస్​​ రజత్​ కుమార్​.. డిసెంబర్​లోనే అన్ని రాష్ట్రాలు, కేంద్రపాలిత ప్రాంతాల ప్రధాన కార్యదర్శులకు లేఖ రాశారు. దీని ప్రకారం.. జగన్​ ప్రభుత్వం తలపెట్టిన కొత్త జిల్లాల ఏర్పాటు జూన్​ 30లోగా పూర్తికావాలి. అయితే ఏప్రిల్​ 2లోగా ఈ ప్రక్రియను పూర్తి చేయాలని ప్రభుత్వం సంకల్పించింది.

మరోవైపు పీఆర్​సీతో పాటు ఇతర సమస్యలపై ప్రభుత్వ ఉద్యోగులు ఆందోళనకు దిగారు. ఫిబ్రవరి 6 నుంచి నిరవధిక సమ్మె చేపట్టనున్నట్టు ప్రకటించారు. ఉద్యోగుల సమ్మె నుంచి ప్రజల దృష్టిని మళ్లించేందుకే.. జిల్లాల పునర్వ్యవస్థీకరణ అంశాన్ని జగన్​ ప్రభుత్వం హడావుడిగా తెరపైకి తీసుకొచ్చిందని పలువురు ఆరోపిస్తున్నారు. ప్రభుత్వం తమ సమస్యను పరిష్కరించకపోతే కచ్చితంగా నిరవధిక సమ్మె చేపడతామని ఉద్యోగులు తేల్చిచెబుతున్నారు.

ప్రక్రియ ఆలస్యం!

కొత్త జిల్లాల ఏర్పాటుపై అభ్యంతరాలు ఉంటే 30 రోజుల్లోగా చెప్పాలని ప్రభుత్వం విజ్ఞప్తి చేసింది. ఆ తర్వాతే అసలైన ప్రక్రియ మొదలవుతుంది. జిల్లాల పునర్వ్యవస్థీకరణలో భాగంగా ప్రభుత్వ ఉద్యోగులను బదిలీ చేయాల్సి ఉంటుంది. ఏ జిల్లాలో పనిచేసేందుకు ఇష్టపడతారు అనే విషయం ఉద్యోగాలు తెలపాల్సి ఉంటుంది. వారిచ్చిన ఆప్షన్లకు తగ్గట్టుగా ప్రభుత్వం చర్యలు తీసుకోవాలి. ఇందుకోసం ప్రభుత్వం.. జిల్లాస్థాయిలో సబ్​కమిటీలు ఏర్పాటు చేయాల్సి ఉంటుంది.

ఉద్యోగులు సమ్మె చేపడితే ఆప్షన్లు పెట్టడం ఆలస్యమవుతుంది. ఫలితంగా ఈ పూర్తి ప్రక్రియ కూడా ఆలస్యమయ్యే అవకాశముంది.