Komaki MG PRO: రూ.59,999 ధరలో 150 కిమీ రేంజ్ ఇచ్చే కొమాకి ఎంజీ ప్రో ఈ - స్కూటర్ లాంచ్

Komaki MG PRO: కోమాకి ఎంజీ ప్రో లిథియం సిరీస్ ను భారత మార్కెట్లో రూ. 59,999 (ఎక్స్-షోరూమ్) ప్రారంభ ధరతో ప్రవేశపెట్టింది. భారత్ లో మార్కెట్ పెంచుకోవడానికి కొమాకి ఎంజీ ప్రో లిథియం ఎలక్ట్రిక్ వాహన తయారీదారు వ్యూహాత్మకంగా 'హర్ ఘర్ కొమాకి' ప్రచారం చేపట్టారు. ఈ ఎలక్ట్రిక్ స్కూటర్ లో లిథియం-అయాన్ బ్యాటరీ ప్యాక్ ఉంటుంది.

కొమాకి ఎంజీ ప్రో లిథియం సిరీస్ బ్యాటరీ, రేంజ్

కొమాకి ఎంజీ ప్రో లిథియం సిరీస్ మూడు వేరియంట్లలో లభిస్తుంది. వీటిలో ఎంజి ప్రో లి, ఎంజి ప్రో వి, ఎంజి ప్రో + ఉన్నాయి. వీటిలో లీ వేరియంట్ లో 1.75 కిలోవాట్ల సామర్థ్యం కలిగిన బ్యాటరీ ప్యాక్ ఉంటుంది. దీనితో సింగిల్ ఛార్జింగ్ తో 75 కిలోమీటర్లు ప్రయాణించవచ్చు. వీ వేరియంట్ లో సింగిల్ ఛార్జింగ్ తో 100 కిలోమీటర్లు ప్రయాణించగల 2.2 కిలోవాట్ల బ్యాటరీ ఉంటుంది. + వేరియంట్ తో 150 కిలోమీటర్లు సింగిల్ ఛార్జింగ్ తో ప్రయాణించవచ్చు. దీనిలో 2.7 కిలోవాట్ల బ్యాటరీ ఉంటుంది. ఛార్జర్ 4 నుండి 5 గంటల్లో ఈ బ్యాటరీ పూర్తిగా ఛార్జ్ అవుతుంది.

ఫెర్రో-ఫాస్ఫేట్ టెక్నాలజీ

బ్యాటరీ ప్యాక్ లోపల ఫెర్రో-ఫాస్ఫేట్ టెక్నాలజీ ఉంటుంది. ఇది బ్యాటరీలోని సమస్యలను ముందుగానే గుర్తించడానికి 30 కి పైగా సెన్సార్లను కలిగి ఉంది. ఈ స్కూటర్ లలో ఆటో రిపేర్ ఫీచర్ కూడా ఉంది. ఇది స్కూటర్ లో తలెత్తే చిన్నచిన్న సమస్యలను ఆటోమేటిక్ గా పరిష్కరిస్తుంది.

కోమాకి ఎంజీ ప్రో లిథియం సిరీస్: ఫీచర్లు

ఈ ఎలక్ట్రిక్ స్కూటర్లో అడ్వాన్స్ రెజెన్, పార్కింగ్ అసిస్ట్, క్రూయిజ్ కంట్రోల్, రివర్స్ అసిస్ట్ ఉన్న వైర్లెస్ కంట్రోలర్ వంటి ఫీచర్లు ఉన్నాయి. ఇందులో బిఎల్ డిసి హబ్ మౌంటెడ్ యూనిట్ మోటారు ఉంటుంది. ఈ స్కూటర్ డిజిటల్ మ్యాట్రిక్స్ ఇన్స్ట్రుమెంట్ క్లస్టర్ తో పాటు వైర్లెస్ గా అప్డేట్ చేసే సామర్థ్యాన్ని కలిగి ఉంది. లాక్ బై రిమోట్ ఫంక్షన్, ఫ్రంట్ డిస్క్ బ్రేక్, రిపేర్ స్విచ్, టెలిస్కోపిక్ షాకర్, సెల్ఫ్ డయాగ్నసిస్, యాంటీ థెఫ్ట్ లాక్, మొబైల్ ఛార్జింగ్ స్లాట్ వంటి కొన్ని అదనపు ఫీచర్లు కూడా ఈ-స్కూటర్లో ఉన్నాయి.

కొమాకి ఎంజీ ప్రో లిథియం సిరీస్: వారంటీ

కొమాకి ఎంజీ చార్జర్ పై 1 సంవత్సరం వారంటీ, స్కూటర్ మోటార్, బ్యాటరీ, కంట్రోలర్ లపై 3 సంవత్సరాల లేదా 30,000 కిలోమీటర్ల వారంటీ లభిస్తుంది. కోమాకి ఎంజీ ప్రో లిథియం నాలుగు రంగుల్లో లభిస్తుంది: ఎరుపు, గ్రే, బ్లాక్, వైట్. కోమాకి ఎంజీ ప్రో లిథియం లీ వేరియంట్ ధర రూ.59,999 (ఎక్స్-షోరూమ్), ఎంజీ ప్రో వి ధర రూ.69,999, కోమాకి ఎంజీ ప్రో లిథియం + వేరియంట్ ధర రూ.74,999 (ఎక్స్-షోరూమ్).