Fighter rooster Auction in Karimnagar : సజ్జనార్ సార్... ఆ పందెం కోడి నాదే, దయచేసి బహిరంగ వేలం ఆపండి

TSRTC Fighter rooster Auction : ఇటీవలే ఓ ఆర్టీసీ బస్సులో పందెం కోడి దొరికింది. అయితే కోడికి సంబంధించిన వ్యక్తులు ఎవరూ లేకపోవటంతో… ఆ కోడిని డిపోకు తీసుకెళ్లారు అధికారులు. అయితే కోడి దొరికి మూడు రోజులు గడవటంతో… అధికారులు ఓ ప్రకటన విడుదల చేశారు. జనవరి 12వ తేదీన కోడిని వేలం వేస్తున్నట్లు తెలిపారు.

ప్రకటనలో ఏముందంటే…?

కోడి వేలానికి సంబంధించి జనవరి 11వ తేదీన కరీంనగర్ 2 డిపో అధికారులు ప్రకటన విడుదల చేశారు. జనవరి 9వ తేదీన ఓ పందెం కోడిని ఆర్టీసీ బస్సులో మరిచిపోయారని ప్రకటించారు. ఈ కోడిని తీసుకెళ్లేందుకు మూడు రోజులుగా ఎవరూ రాలేదని... ఈ నేపథ్యంలో పందెం కోడిని అంబేడ్కర్ బస్ట్ స్టేషన్ ఆవరణలో వేలం వేస్తున్నట్లు తెలియజేశారు. ఆసక్తిగలవారు బహిరంగ వేలంలో పాల్గొని దక్కించుకోవచ్చని తెలిపారు.

పందెం కోడిని వేలం వేస్తున్నట్లు ఆర్టీసీ అధికారులు ఇచ్చిన ప్రకటన ఆసక్తికరంగా మారింది. అంతేకాదు… ఈ ప్రకటనతో పాటు మొత్తం ఎపిసోడ్ కూడా సోషల్ మీడియాలో తెగ వైరల్ అయింది. అయితే నిబంధనల ప్రకారం లాస్‌ ఆఫ్‌ ప్రాపర్టీ కింద మరిచిపోయిన వస్తువుల గురించి సరైన ఆధారాలతో ఎవరూ రాకపోతే 24 గంటల తర్వాత ఉన్నతాధికారుల ఆదేశాల మేరకు వేలం పాట నిర్వహించాల్సి ఉంటుందని ఆర్టీసీ అధికారులు చెప్పారు. ఈ క్రమంలోనే… ఈ పందెం కోడిని వేలం వేయడానికి ఏర్పాట్లు చేసినట్లు అధికారులు పేర్కొన్నారు.

సీన్ లోకి ఓనర్…!

పందెం కోడి వేలం ముచ్చట టాక్ ఆఫ్ ది తెలుగు స్టేట్స్ గా మారిపోయింది. వేలానికి సమయం దగ్గర పడిన వేళ… సజ్జనార్ సార్ ఆ కోడి నాదే అంటూ ఓనర్ ఎంట్రీ ఇచ్చాడు. ఓ వీడియోను విడుదల చేశాడు. కరీంనగర్ ఆర్టీసీ బస్సులో దొరికిన కోడి తనదే అని చెప్పాడు. తనది నెల్లూరు జిల్లా అని చెప్పిన మహేశ్… బతుకుతెరువు కోసం రుద్రంగికి వచ్చినట్టుగా వీడియోలో వివరించాడు. రుద్రంగి నుంచి కరీంనగర్ మీదుగా నెల్లూరు వెళ్ళే క్రమంలో తెల్లవారుజామున నిద్రమత్తులో కరీంనగర్ బస్టాండ్ బస్ దిగి కోడిని మర్చిపోయానంటూ చెప్పుకొచ్చాడు. పందెంకోడి వేలాన్ని నిలిపివేయాలని డిపో మేనేజర్ ని కోరానని తెలిపాడు. బస్సులో ప్రయాణించిన టికెట్ కూడా తన వద్ద ఉందని చెప్పాడు. కోడికి సంబంధించిన ఫొటోలు, వీడియోలు కూడా తన వద్ద ఉన్నాయని… దయచేసి కోడి వేలాన్ని ఆపాలని కోరాడు.

ఓనర్ సీన్ లోకి రావటం ఆర్టీసీ అధికారుల దృష్టికి వెళ్లినట్లు తెలిసింది. అయితే వేలాన్ని ఆపుతారా..? లేదా…? అనేది ఉత్కంఠగా మారింది.