New Year 2024 : న్యూ ఇయర్ వేడుకలపై పోలీసుల ఆంక్షలు- ఈ ఫ్లైఓవర్లపై నో ఎంట్రీ, వాహనదారులకు సూచనలు

New Year 2024 : నూతన సంవత్సర వేడుకల దృష్ట్యా సైబరాబాద్ ట్రాఫిక్ పోలీసులు... ట్రాఫిక్ అడ్వైజరీ జారీ చేశారు. ట్రాఫిక్ పోలీసులు సూచించిన మార్గదర్శకాలను వాహనదారులు, ప్రజలు పాటించాలని కోరారు.

డిసెంబర్ 31న ఈ మార్గాలు మూసివేత

• నెహ్రూ ఔటర్ రింగ్ రోడ్డుపై డిసెంబర్ 31వ తేదీ రాత్రి 10 గంటల నుంచి ఉదయం 5 గంటల వరకు విమానాశ్రయం వైపు వెళ్లే వాహనాలకు తప్ప ఇతర వాహనాలకు అనుమతి లేదు.
• PVNR ఎక్స్ ప్రెస్ వే రాత్రి 10 గంటల నుంచి ఉదయం 5 గంటల వరకు విమానాశ్రయం వైపు వెళ్లే వాహనాలకు తప్ప ఇతర వాహనాలకు అనుమతి లేదు.
• శిల్ప లే అవుట్ ఫ్లైఓవర్, గచ్చిబౌలి ఫ్లైఓవర్, బయో డైవర్సిటీ ఫ్లైఓవర్, షేక్ పేట్ ఫ్లైఓవర్, మైండ్ స్పేస్ ఫ్లైఓవర్, దుర్గంచెరువు ఫ్లైఓవర్,సైబర్ టవర్ ఫ్లైఓవర్, బాబు జగ్జీవన్ ఫ్లైఓవర్ లు రాత్రి 11 గంటల నుంచి ఉదయం 5 గంటల వరకు మూసివేస్తారు.

క్యాబ్ డ్రైవర్లకు పోలీసుల సూచనలు

• క్యాబ్ డ్రైవర్లు, ఆటో డ్రైవర్లు, ట్యాక్సీ డ్రైవర్ లు తప్పనిసరిగా యూనిఫాం ధరించాలి. అన్ని పత్రాలను వెంట ఉంచుకోవాలి.
• ప్రజలతో అనుచితంగా ప్రవర్తించకూడదు లేదా అదనపు చార్జీలు వసూలు చేయకూడదు.
• ఎట్టి పరిస్థితుల్లోనూ క్యాబ్ డ్రైవర్లు రైడ్ ను క్యాన్సిల్ చేయకూడదు. అది మోటార్ వెహికల్ చట్టం-1988 సెక్షన్ 178 చట్టం ప్రకారం నిబంధనలను ఉల్లంఘించిన వారికి రూ.500 జరిమానా విధిస్తారు.

బార్, పబ్ లకు పోలీస్ సూచనలు

• ఏదైనా బార్, పబ్, క్లబ్ లలో మద్యం సేవించిన కస్టమర్లను వాహనాలను నడపటానికి అనుమతిస్తే నేరాన్ని ప్రోత్సహించినందుకు చర్యలు తీసుకుంటారు.
• తాగి వాహనాలు నడపడం వల్ల జరిగే దుష్పరిణామాలపై కస్టమర్లకు సంబంధిత పబ్, క్లబ్, బార్ లు అవగాహన కల్పించడంతో పాటు మద్యం సేవించిన వారి ప్రయాణం కోసం ప్రత్యామ్నాయ ఏర్పాట్లు చేయాలి.

ప్రజలు, వాహనదారులకు పోలీస్ సూచనలు

• ఓవర్ స్పీడ్, రాంగ్ రూట్, సిగ్నల్ జంప్, ర్యాష్ డ్రైవింగ్, హెల్మెట్ లేని ప్రయాణం వంటి ప్రమాదకర ఉల్లంఘనలు చేసే వారిని గుర్తించేందుకు ప్రత్యేక కెమెరాలను ఏర్పాటు
• సైబరాబాద్ పరిధిలోని అన్నీ రహదారులపై రాత్రి 8 గంటల నుంచి డ్రంక్ అండ్ డ్రైవ్ పై విస్తృత తనిఖీల నిర్వహణ
• వాహనదారులు సరైన పత్రాలు సమర్పించని పక్షంలో వారిపై కఠిన చర్యలు తీసుకుంటారు.
• ట్రాఫిక్ పోలీసుల సూచనలను పాటించడంతో పాటు పత్రాలను చూపించడం వాహన డ్రైవర్లు విధి. ట్రాఫిక్ పోలీసుల విధులకు ఆటంకం కలిగిస్తే చట్ట ప్రకారం చర్యలు తప్పవు.
• పబ్లిక్ రోడ్డుపై డ్రైవింగ్ చేసేటప్పుడు ప్రజలు అప్రమత్తంగా, బాధ్యతగా వాహనాలు నడపాలి.

రిపోర్టింగ్ : కేతిరెడ్డి తరుణ్, హైదరాబాద్ జిల్లా