AB de Villiers: ఆ ముగ్గురి బౌలింగ్ చాలా కష్టం: డివిలియర్స్

AB de Villiers: సౌతాఫ్రికా లెజెండరీ ప్లేయర్ ఏబీ డివిలియర్స్ తెలుసు కదా. ఎలాంటి బౌలర్ అయినా గ్రౌండ్ నలుమూలలా షాట్లు ఆడుతూ.. మిస్టర్ 360 డిగ్రీ ప్లేయర్ గా పేరుగాంచాడు. అయితే అలాంటి ప్లేయర్ కూడా ముగ్గురు బౌలర్లను చూసి భయపడ్డాడట. ఈ విషయాన్ని తాజాగా జియో సినిమాలో రాబిన్ ఉతప్పతో మాట్లాడుతూ ఏబీ వెల్లడించాడు.

ఆ ముగ్గురిలో ఒకరు మన టీమిండియా బౌలర్ జస్‌ప్రీత్ బుమ్రా కాగా.. ఆస్ట్రేలియా మాజీ స్పిన్నర్ షేన్ వార్న్, ఆఫ్ఘనిస్థాన్ స్పిన్నర్ రషీద్ ఖాన్ బౌలింగ్ లో కూడా తాను ఇబ్బంది పడినట్లు అతడు చెప్పాడు. "2006లో తొలిసారి నేను ఆస్ట్రేలియా పర్యటనకు వెళ్లినప్పుడు షేన్ వార్న్ బౌలింగ్ లో ఇబ్బంది పడ్డాను. అతని టెక్నిక్, స్కిల్ వల్ల కాదు కానీ.. అంతటి ప్లేయర్ ఉన్నాడన్న ఆలోచనే భయపెట్టింది. నాకు అప్పటికి అనుభవం లేదు. అతని బౌలింగ్ కష్టమే అని అనిపించింది" అని డివిలియర్స్ చెప్పాడు.

"ఆ మ్యాచ్ సులువుగా అనిపించింది. కానీ అతడు చాలా స్మార్ట్. అద్భుతమైన ప్లేయర్. నా బలహీనత వెంటనే గుర్తు పట్టాడు. నేరుగా వచ్చే బంతులను ఎదుర్కోవడం నాకు కష్టంగా ఉండేది. అలాంటి ఓ బంతికే నేను ఔటయ్యాను. 2005, 06, 07లలో నా బలహీనత అదే. ఇలాంటి చిన్న చిన్న విషయాలను కూడా వార్న్ బాగా గుర్తించగలడు. నేరుగా వచ్చే బంతిని నేను ఆడలేక మిస్సవుతాను. అప్పుడే అదే జరిగింది" అని ఏబీ తెలిపాడు.

ఆరు ఇన్నింగ్స్ లో నాలుగుసార్లు డివిలియర్స్ ను వార్న్ ఔట్ చేశాడు. ఇక వార్న్ కాకుండా బుమ్రా, రషీద్ బౌలింగ్ కూడా తనకు కష్టంగా తోచిందని డివిలియర్స్ చెప్పాడు. "బుమ్రాతో ఎప్పుడూ సవాలే. ఎందుకంటే అతనిలో పోటీతత్వం ఎక్కువ. వెనక్కి తగ్గేవాడే కాదు. అందుకే అతనంటే, అతడు క్రికెట్ ఆడే తీరంటే నాకు గౌరవం. ఇద్దరి మధ్య మంచి పోటీ ఉండేది. ఒకరిపై మరొకరం పైచేయి సాధించుకునేవాళ్లం" అని డివిలియర్స్ చెప్పాడు.

రషీద్ ఖాన్ గురించి కూడా ఏబీ ఇలాగే చెప్పాడు. అతని బౌలింగ్ లో వరుసగా మూడు సిక్స్ లు బాదినా.. తర్వాతి బంతికి ఔట్ చేయాలని చూసేవాడని డివిలియర్స్ వెల్లడించాడు.